1 "Wamu wa wapalu kulawa mji gwa Zifu wamgenderiti Sauli aku Gibea wamgambira handa Dawudi kaweriti kalififa kulugongu Hakila, yayililolana na Yeshimoni." 2 Katepu hera, Sauli kagenditi kundundu ya Zifu kumsakula Dawudi pakawera na mashonta yawawera ndiri na lyoga elufu tatu wa israeli. 3 Sauli kagolosiya ngonjeru pampindi pa lugongu Hakila, pakwegera na njira, kwagulawa mshenji mwa Yeshimoni. Kumbiti Dawudi kaweriti kankali kundundu aku. Kavimaniti handa Sauli kaweriti kizi kundundu kumsakula, 4 kawatumiti walolalola, wamgambira kuwera handa ndo nakaka kasoka. 5 Dawudi kalawa, kagenda pahala Sauli pakagolusiyiti ngonjeru. Kapawona pahala peni Sauli pakagolusiyiti ngonjeru. Kapawoniti pahala Sauli pakaweriti kagonja na Abineri mwana gwa Neri, mkulu gwa Shonta lya Sauli, kaweriti kagonja pakwegera na Sauli. Sauli kaweriti kagonja pakati pangonjeru agawu pakazyengetwa na shonta lyakuyi. 6 Dawudi kamgambira Ahimeleki mweni kaweriti Mhiti na Abishai mlongu gwakuyi Yoabu awa mawu gwawu wamshemiti Seruya, "Na gaa hakagendi pamuhera na neni kulugonjeru lya Sauli?" Abishai kamgambira, "Neni hang'endi pamuhera na gwenga." 7 Hangu pashiru, Dawudi na Abishai pawawingiriti jiijii kung'onjeru ya Sauli, wamwona Sauli kagonja pakati pa ng'onjeru ayu na mgoha gwakuyi gusomwa mlitapaka pakwegera na mtuyi gwakuyi. Abineri pamuhera na shonta waweliti wagonja kumzyengeta Sauli. 8 Abishai kamgambira Dawudi, "Leru Mlungu kamtula mumakakala gaku. Su, gundeki nimbabaniki mlitapaka kwa likomangu limu hera lya mgoha, hapeni nimkomi mala mbili." 9 Kumbiti Dawudi kamgambira Abishai, "Nagumlaga, toziya nakaka Mtuwa Mlungu hakamtozi muntu yoseri yakafira kulitalipisiya liwoku lyakuyi kwa msyagulwa gwakuyi yakamswagiti kuwera mfalumi. 10 Yina kwa Mtuwa Mlungu yakawera mkomu, Handa Mtuwa Mlungu mweni hakamlagi Sauli, ama lishaka lyakuyi lya kuhowa halisoki, ama hakagendi kungondu na kuhowera aku. 11 Kumbiti Mtuwa Mlungu kambera nanjera kumtenda yakamsyagula kwa kuswaga lipaki. Kumbiti tutoli mgoha gwaku yaguwera pakwegera na mtuwi gwakuyi pamuhera na shibuyu shakuyi sha mashi, tugendi zetu." 12 Hangu, Dawudi katoliti mgoha gulii na shibuyu sha mashi pakwegera na mtuwi gwa Sauli na yomberi kaligendera zakuyi. Kumbiti kwahera muntu yakawoniti ama kuvimana shisoweru ashi na kwahera yakimukiti, toziya Mtuwa Mlungu kawajegeriti mpota nkulu. 13 Shakapanu, Dawudi kagenda uwega wa pili wa lulalanda alu, kagoloka pampindi kulugongu kutali na shipinga sha Sauli. 14 Kalishema kwa kubota shonta lya Sauli na Abineri mwana gwa Neri pakalonga, "Abineri, Hashi, gumpikinira? Abineri kakosiya, Ndo gaa gwenga yagumshema mfalumi?" 15 Dawudi kamwankula, "Hashi, gwenga gwa mpalu ndiri? Gaa yakawera sawa na gwenga Muisraeli? Mbona su, gumlolera ndiri mfalumi gwaku? Muntu tunga kingira palii kumlaga mtuwa gwaku mfalumi! 16 Gwagugutenditi ndo mlandu mheri ndiri. Nililapa kwa Mtuwa Mlungu yakawera Mkomu, handa gufiruwa kuhowa, toziya gumlolera ndiri mtuwa gwaku, mweni Mtuwa Mlungu kamswaga lipaki. Vinu su guloli, mgoha gwa mfalumi na shibuyu sha mashi vyaviweriti pakwegera na mtuwi gwakuyi handa vyapala!" 17 Sauli kavimaniti liziwu lya Dawudi, kamkosiya, "Hashi, ali ndo liziwu lyaku mwanagwangu Dawudi?" Dawudi kamwankula, "Mtuwa Gwangu, mfalumi, ndo liziwu lyangu." 18 Shakapanu kendereya kulonga, "Kumbiti kwa ntambu gaa, gwenga Mtuwa gwangu, gwendereya gunfati neni ntumintumi gwaku? Ndenda shishi? Nikutendera ukondola gaa? 19 Su, vinu mtuwa gwangu mfalumi, gupikinili visoweru vya ntumintumi gwaku. Payiwera Mtuwa Mlungu ndo yakakusongiziyiti gwizi kwa neni, su na kanki tambiku yaifira kumtendera kagalambuli nfiru yakuyi su guleki kunfata. Kumbiti handa ndo wantu, su Mtuwa Mlungu na kawapangili wantu awa toziya wawawinga kulawa muuhala wakatupanananiti Mtuwa Mlungu pawalonga, payiwera wantu pawalonga gugendi gwakawatenderi wamlungu wamonga. 20 Nagundeka nfuwi muisi ya wahenga, kutali na Mtuwa Mlungu. Ntambu gaa gwenga mfalumi gwa Israeli gulawa kuusakula ukomu wangu handa muntu yakawinga ngwali mumigongu?" 21 Sauli kamwankula, "Neni ndenda makosa. Guwuyi mwanagwangu Dawudi. Hapeni nikutenda kayi toziya leru ukomu wangu uweriti wa mana kulongolu kwaku. Neni nwera mpunginika na nkosa nentu." 22 Dawudi kamwankula, "Gwee mfalumi, mgoha gwaku gwa panu, gumtumi shonta gwaku yumu kizi kagutoli. 23 Mtuwa Mlungu kamlolera kila muntu yakatenda yagajimiluwa kulongolu kwakuyi na yakaminika na muntu yakajimilika kulongolu kwa Mlungu. Leru Mtuwa Mlungu kakutuliti mumawoku mwangu, kumbiti njeriti ndiri kukulaga gwenga toziya gwenga gusyagulwa na yomberi kwa kuswagwa lipaki. 24 Nakaka niusheriti ukomu waku leru, su Mtuwa Mlungu hakausheri ukomu wa neni na kunopuziya kulawa muntabiku zoseri." 25 Sauli kamgambira Dawudi, "Mlungu na kakutekeleri mwana gwangu Dawudi. Hagutendi vitwatira vikulu na gwenga hagukangi muvyoseri." Su, Dawudi kagenda zakuyi, Sauli yomberi kawuya ukaya kwakuyi.