1 Shakapanu Dawudi wamgambiriti, "Gupikinili, Wafilisti wagukomanga mji gwa Keila na wakwapula viboga kuluwaga lwa kukomera." 2 Su, Dawudi kamluwa Mtuwa Mlungu shakutenda, "Hashi, ng'endi kuwakomanga Wafilisti awa?" Mtuwa Mlungu kamwankula, "Yina, gugendi gwakawakomangi Wafilisti na kugulopola mji gwa Keila."

3 Kumbiti wantu wa Dawudi wamgambira, "Handa patuwera palapanu Yuda twankutira, hayiweri hashi su, patugenda Keila na kuwakonga wamashonta wa Wafilisti?" 4 Dawudi kamluwa kayi shakutenda Mtuwa Mlungu, na Mtuwa Mlungu kamgambira, "Gugoloki gugendi Keila toziya hanikutendi guwakanki Wafilisti." 5 Su, Dawudi kagenda Keila pamuhera na wantu wakuyi, na aku kalikomanga na Wafilisti, kawalaga Wafilisti wavuwa na kulopola wang'ombi wavuwa. Hangu Dawudi kalopoliti wenikaya wa Keila.

6 Abiyatali, mwana gwa Ahimeleki, pakatugiliti kwa Dawudi aku Keila, kagenditi na nguwu ya mtambika yakugibikira pashifuwa. 7 Sauli pakagambiluwitwi kuwera Dawudi kasoka kala Keila, kalonga, "Mlungu kamtula mumakakala gangu toziya kalitatira mweni kwa kwingira mumji gwana migomi yana gwiligiziwu." 8 Hangu, Sauli kashemiti wamashonta wagendi Keila na kutenda makomangu, su kumzyengeta Dawudi pamuhera na wantu wakuyi. 9 Dawudi pakapikiniriti mipangu mikondola ya Sauli kwajili yakuyi, kamgambira mtambika Abiyatali, "Gujegi panu nguwu ya mtambika ya kugibikira shifuwa." 10 Sahakapanu Dawudi kaluwa, "Gwee Mtuwa Mlungu, Mlungu gwa Israeli, nakaka neni ntumintumi gwaku, mpikinira handa Sauli kafira kwiza kwagamiziya mji gwa Keila toziya neni na amu. 11 Hashi, wenikaya wa Keila wantaviyi kwa Sauli? Hashi, Sauli hakizi nakaka ntambu yampikiniriti neni ntumintumi gwaku? Gwee Mtuwa Mlungu, Mlungu gwa Israeli, nikuluwa gwankuli neni ntumintumi gwaku."

Mtuwa Mlungu kamwankula, "Sauli hakizi." 12 Dawudi kamkosiya, "Hashi wanikaya wa Keila hawanjegi kwa Sauli, neni pamuhera na wantu wangu?" Mtuwa Mlungu kamwankula, "Hawakulaviyi kwa yomberi."

13 Shakapanu, Dawudi na wantu wakuyi weni waweriti handa miya sita, wawukiti na kugenda poseri pawaweziti kugenda. Sauli pakapikiniriti handa Dawudi katira kala kulawa Keila, kazileka mpanga zakuyi zoseri.

14 Su, Dawudi kasigaliti kumafifu kushiwala, muisi ya migongu ya mbuga za Zifu. Sauli kamsakuliti kila lishaka, kumbiti Mlungu kamtula ndiri mumawoku mwa Shauli. 15 Lishaka limu Dawudi pakaweriti pakwegera na Horeshi kapikinira handa Sauli kagenditi Zifu kiza su kamlagi. 16 Yonatani mwana gwa Sauli kamfatiti Dawudi aku Horeshi, kampanana moyu handa Mlungu kankumlolera. 17 Yonatani kamgambira, "Nagutira, tati gwangu Sauli hapeni kakupati. Gwenga haguweri mfalumi gwa israeli, neni haweri gwa pili gwaku muukulu. Ata sauli tati gwangu kavimana mlandu agu." 18 Woseri wawili awa, watenda lipatanu kulongolu kwa Mtuwa Mlungu. Dawudi kasigala kumjini Horeshi na Yonatani kagenda zakuyi ukaya.

19 Sauli pakaweriti kankala aku Gibea, wantu wamu kulawa mji gwa Zifu wamgendera na kumgambira, "Dawudi kalififa muisi ya twenga aku Horeshi, kulugongu Hakila, lwaluwera uwega wa kusika mwa Yeshimoni. 20 Vinu, mfalumi, gwizi su gutendi yaviwera mumoyu mwaku, na kwa uwega wa twenga, lihengu lya twenga haliweri kukutanga su gumbati Dawudi."

21 Sauli kawawankula, "Mwenga nakaka mumonera lusungu neni, Mtuwa Mlungu na kawatekeleri. 22 Gugendi, mloli kayi, mmani pahala pakalififa, na ndo gaa kamwona pahala panu, toziya ng'ambiruwa handa yomberi ndo mkalamuka nentu. 23 Mloliloli weri kila uwega muvimani pahala pakalififa, shakapanu mnjegeri visoweru vya nakaka. Shakapanu hang'endi pamuhera na mwenga na payiwera kankali kapalapa, su, neni hanimsakuli muwamu mwa maelufu goseri ga wantu wa Yuda."

24 Su, wawuka kugenda Zifu, pakamlongolera Sauli.

Shaka ashi, Dawudi na wantu wakuyi waweriti mundundu ya Maoni mululalanda lwa Araba kusika mwa Yeshimoni. 25 Sauli na wantu wakuyi wanja kumsakula Dawudi. Kumbiti Dawudi pakagambilitwi visoweru avi, kagenditi kulififa kumatalawu, yagawera mumbuga za Maoni na kulikala aku. Sauli pakapikiniriti visoweru avi, kamfatiti Dawudi aku kushiwala za Maoni. 26 Sauli na wantu wakuyi waweriti uwega wumu wa lugongu lwa litalawu na Dawudi na wantu wakuyi waweriti uwega umonga wa lugongu. Dawudi pakaweriti kankulopokera kutuga, Sauli na yomberi kaweriti kankumsegelera kumbata Dawudi. 27 Panu muntu yumu kamgendera Sauli na kumgambira, "Gwizi kalongola, Wafilisti wankuyikomanga isi." 28 Hangu, Sauli kaleka kumfata Dawudi, kagenda kulikomanga na Wafilisti. Ndo mana pahala panu pashemuwa Sera hamilikoti mana yakuyi litalawu lya kubagulana. 29 Dawudi kawukiti pahala panu pa kulififa, kagenda kulikala mumafifu ga mji gwa Engedi.