1 Samueli pakaweriti mzewi, kawatenditi wana wakuyi wapalu kuwera wakolamlima wa Israeli. 2 Mwana gwakuyi gwa kwanja mpalu kashemitwi Yoeli, na gwa pili yawamshemiti Abiya. Woseri wawili waweriti wakolamlima aku Beeri Sheba. 3 Kumbiti wana awa wafata ndiri mugenderu gwa tati gwawu. Su wanjiti kulisakulira mota. Wajega swinda na kukolamlima ntambu yayifiruwa ndiri. 4 Su, wakolamlima woseri wa Israeli wajojonikiti pamuhera, na kumgendera Samueli kumjini Rama, 5 wamgambira Guloli, gwenga vinu ndo mzewi na wana waku wafata ndiri mgenderanu gwaku, "Hangu, gutusyaguliri mfalumi gwa kutukolamlima ntambu yagawera maisi gamonga." 6 "Kumbiti shitwatira sha Waisraeli kufira wapananwi mfalumi gwa kuwakolamlima, limfiliziya ndiri Samueli. Na yomberi kamluwa Mtuwa Mlungu." 7 Mtuwa Mlungu kamgambira, "Gupikinili kila shintu wantu shawakugambira, toziya haweni kulemi gwenga, su wanema neni kuwera mfalumi. 8 Kwanjira panuwalaviyiti misri, wandeka neni, wawera wankuwatendera wamlungu wamonga mpaka leru. Vinu matendu gawantendiriti neni ndo gawakutendera na gwenga. 9 Su, guwapikiniri, kumbiti guwaberiziyi na guwagambiri pota kufifa mirandu yeni mfalumi yakakolamlima hakagafiri kulawa kwa mwenga." 10 Hangu, Samueli kawagambira wantu walii yawaweriti waluwa wapananwi mfalumi visoweru vyoseri vya Mtuwa Mlungu. 11 Samueli kawagambira, "Hangu ndo mfalumi gwenu ntambu hakawatenderi. Wana wenu wapalu hakawatendi waendeshi mbutuka zakuyi zyakwegwa farasi, na wamonga kuwera wakwena farasi wakuyi na wamonga watuga mbiru kulongolu kwa mbutuka zakuyi azi toziya ya kumlolera. 12 Hakalisyaguliri wamonga waweri wakulu wa vipinga vya mashonta vyakuyi maelufu na wamonga waweri wakulu wa vipinga vya wantu hamsinihamsini. Hakawatendi wamonga wamlimili lirambu lyakuyi na kubenga viboga vyakuyi. Akawatendi wamonga viraa wamnyawiri vintu vya kulikomangira nkondu, na wamonga wamnyawiri vipuli vya mbutuka yakuyi. 13 Wahinga wenu hakawatoli kuwera wanyawa utuli, wamonga watereka na wamonga wabanika mabumunda. 14 Hakatoli malambu genu maherepa ga viboga na malambu gaherepa ga mizeyituni na malambu gaherepa ga mizabibu na kuwapanana wantumintumi wakuyi. 15 Hakatoli kila lifingu limu pakati pa mafungu lilongu ga viboga vyenu na vya zabibu zyenu na kuwapanana wakulu wakuyi na wantumintumi wakuyi. 16 Hakatoli wantumintumi wenu wapalu na wadala na ng'ombi wenu waherepa na punda wenu waherepa na kuwatenda wamtenderi mahengu gakuyi. 17 Hakatoli lifungu limu lya mafungu lilongu lya kondolu na mbuzi. Na maweni mwenga hamuweri wamanda wakuyi. 18 Shaka ashi, mwenga hamliri toziya ya ntabiku yamupata kulawa kwa mfalumi gwenu mweni mlisyagulira maweni mwenga. Kumbiti Mtuwa Mlungu hapeni kawankuli." 19 Ata hangu wantu walemiti kumpikinira Samueli, walonga, "Ndala! Twenga tufira mfalumi gwetu, 20 su na twenga viraa tuweri handa maisi gamonga. Mfalumi gwetu, hakatutozi, hakatulongoziyi na kutukomangira nkondu zyetu." 21 Samueli pakamaliliti kuwapikinira kila shintu shawatakuliti, kagenda na kumgambira Mtuwa Mlungu. 22 Mtuwa Mlungu kamgambira Samueli, "Guwapikiniri na guwasyaguliri mfalumi." Shakapanu Samueli kawagambira Waisraeli wawuyi ukaya, kila muntu kawuya ukaya kwakuyi.