1 Sauli pakamaliliti kuyowera na Dawudi, Yonatani mwana gwa Sauli, kakwegitwi nentu na Dawudi, kamfira kwa moyu gwakuyi goseri ntambu yakalifiriti mweni. 2 Kwanjira lishaka ali, Sauli kamtola Dawudi ukaya kwakuyi, kamjimira ndiri kuwuya ukaya kwa tati gwakuyi. 3 Toziya Yonatani kamfiriti Dawudi handa rohu yakuyi, katenditi lipatanu na yomberi. 4 Kavuliti likoti lyakavaliti na kumpanana Dawudi pamuhera na vintu vyakuyi vya kulikomangira, ata ligumba, upindi na mkanda gwakuyi. 5 Koseri Dawudi kwakatumitwi na Sauli, Dawudi kapata ukanka. Hangu, Sauli kamtenda kuwera mkulu gwa mashonta. Mlandu agu guwanemiziya wantu woseri ata wantumintumi wa Sauli.

6 Mashonta pawaweriti wankuwuya ukaya, pamuhera na Dawudi pa kumlaga Mfilisti ulii, wadala kulawa kila mji Muisraeli walawa kugenda kumwanka mfalumi Sauli. Wadala na womberi waweriti wankwimba nyimbu za nemeleru, pawagomba ng'oma na vinubi. 7 Viraa waweriti wankuvina na kwimba nyimbu za kwitikira hangu, "Sauli kalaga maelufu gakuyi na Dawudi kalaga malongu elufu gakuyi." 8 Sauli kafiliziwa ndiri na visoweru vya lwimbu alu, hangu kakalala nentu. Kalonga, "Wampanana Dawudi malongu elufu, kumbiti neni wanupa maelufu hera. Lyalisigaliti ndo kumpanana Dawudi ufalumi." 9 Kwanjira lishaka ali, Sauli kawera kamjimira kayi ndiri Dawudi. 10 Shirawu yakuyi, rohu mkondola yayitumitwi na Mlungu, kamkankala Sauli kwa vumu, kawera kankubotabota handa kana lukwali ukaya kwakuyi. Dawudi kaweriti kankugomba shinubi ntambu yakatenditi mashaka goseri. Sauli kaweriti na mgowa mmawoku mwakuyi, 11 "Su kaliholiti, kamwasiliti Dawudi mgoha mala mbili, hanimyoneri Dawudi mushibambaza. Kumbiti Dawudi kakwepiti mala zoseri mbili." 12 Sauli kaweriti kamtira Dawudi toziya Mtuwa Mlungu kaweriti pamuhera na yomberi, kumbiti Mtuwa Mlungu kaweriti kamleka Sauli. 13 Hangu, Sauli kamwusiya kaya kwakuyi na kumtenda mlonguziya gwa mashonta elufu yimu. Na Dawudi kawalonguziya weri kunkondu. 14 Dawudi kakankiti mukila shintu shakatenditi, toziya Mtuwa Mlungu kaweriti pamuhera na yomberi. 15 Sauli pakawoniti kukanka kwa Dawudi, kawera kamtira. 16 Kumbiti wantu woseri wa Israeli na Yuda wamfiriti Dawudi, toziya kawalonguziya weri munkondu na kuwawuziya kwa ukanka.

17 Sauli kamgambira Dawudi, "Ayu ndo Merabu, mhinga gwakuyi mkulu, hanikuyugiziyi kaweri mdala gwaku guweri shonta gwangu mgangamala na mjimira, gulikomangi nkondu za Mtuwa Mlungu." Sauli kaliholiti kwanjira ayi Wafilisti hawamlagi Dawudi, su shitwatira ashi nakashitenda mweni. 18 Dawudi kamgambira Sauli, "Neni ndo gaa ata mfalumi kaweri mganafu gwangu? Lukolu lwangu namweni na ata wantu wa tati gwangu ndo wamanika ndiri Muisraeli." 19 Kumbiti, shaka shilii Merabu mhinga gwakuyi Sauli mekayugiziwi kwa Dawudi, kayugiziwa kwa Adirieli kulawa mji gwa Mehola. 20 Ata hangu, Mikali mhinga yumonga gwa Sauli kamfiriti Dawudi. Sauli pawamgambiriti kanemelera nentu. 21 Sauli kaliholiti, "Guleki nimyugiziyi ayu su kaweri mgomiziwu kwakuyi. Na pota shashatika Wafilisti hawamlagi." Hangu Sauli kamgambira kawili vinu haweri mganafu gwaku. 22 Shakapanu Sauli kawagambiziya wantumintumi wakuyi pakalonga "Guyoweri pagweka na Dawudi na kumgambira, mfalumi kafiliziwa nentu na gwenga, ata wantumintumi waku viraa woseri wakufira nentu gwenga. Hangu, vinu gujimiri kuwera mganafu gwakuyi mfalumi." 23 Su, wantumintumi wa Sauli wamgambiriti Dawudi visoweru avi pagweka na yomberi kawagambira, "Neni ndo muntu muhushu na gwa pasi hamezi hashi kulaviya mahetu. Hashi mlihola kuwera shitwatira ndiri shikamala neni kuwera mganafu gwa mfalumi?" 24 Wantumintumi walii wamgambiriti Sauli ntambu yakatakuliti Dawudi. 25 Sauli kawagambira, "mugambiri Dawudi hangu. Shilii shakafiriti mfalumi hangu mahetu ga mhinga gwakuyi ndo vinduli miya vya Wafilisti, su kaliwuziliri kwa wankondu wakuyi." Hangu ndo ntambu yakapangiti Dawudi kalaguwi na Wafilisti. 26 Wantumintumi walii pawamgambiriti Dawudi galii mafiru ga Sauli, Dawudi kanemelera hakaweri mganafu gwakuyi. Pamberi pa lishaka lya ndowa, 27 su Dawudi na wantu wakuyi wagenditi, wawalaga Wafilisti miya mbili na kutola vinduli vyawu mpaka kwa mfalumi Sauli. Panu kamwalangira walanga yoseri su mfalumi kaweri mganafu gwakuyi Dawudi. Hangu, Sauli kamyugiziya Dawudi mhinga gwakuyi Mikali kaweri mdala gwakuyi. 28 Kumbiti Sauli pakawoniti pota kufifa Mtuwa Mlungu kaweriti pamuhera na Dawudi, na kuwera Mika mhinga gwakuyi kamfiriti nentu Dawudi, 29 kongeriti kumtira Dawudi. Sauli kawera mnkondu gwa Dawudi mashaka goseri. 30 Shonta lya Wafilisti ligenditi kulikomanga na Waisrali, kumbiti kila mala pawalikomangiti nkondu, Dawudi kapatiti ukanka kuliku wantumintumi wa Sauli, hangu litawu lyakuyi Dawudi lizyumwa nentu.