1 Lishaka limu, Yonatani mwana gwa mfalumi Sauli kamgambiriti mntemba yakajegiti vintu vya kulikomangira, "Gwizi, tugendi kumwambu kuliboma lya Wafilisti". Kumbiti Yonatani kamgambira ndiri tati gwakuyi 2 Sauli, kaweriti kanyawa malingu pasi pa mkomamanga aku Migironi, kunja kwa mji gwa Gibea, pakawera na wantu miya sita. 3 Ahiya mwana gwa Ahitubu mlongu gwakuyi Ikabodi mwana gwa Finehasi, Ahiya mzukulu gwa Eli, mtambika gwa Mtuwa Mlungu kumjini Shilu, kaweriti ndo yakavaliti nguwu yagibikira pashifuwa sha mtambika. Wantu wavimaniti ndiri handa Yonatani kawukiti kala.

4 Pahala pashibokeri Yonatani kapitiri su kasoki kuliboma lwa Wafilisti, kuweriti na matalawu mawili yagasongokiti, uwega awu na uwega umonga. Litalawu limu lishemitwi Bosesi na limonga lishemitwi Sene. 5 Litalawu limu liweriti kushana mwa mji gwa Mikimashi na limonga liweriti kusika pakwegera na mji gwa Gibea.

6 Yonatani kamgambira mntemba ulii yakamjegeriti vintu vya kulikomangira, "Gwizi, tugendi uwega wa pili kuliboma lya wantu awa yawingiziwa ndiri jandu. Pamonga Mtuwa Mlungu hakatutangi, toziya Mtuwa Mlungu kalopuziya ndiri kwa kutumbira wantu wavuwa ama wadidini." 7 Mtemba ulii yakajegiti vintu vya kulikomangira, Kamgambira, "Gutendi shoseri shagufira kutenda. Neni na pamuhera na gwenga toziya liholu lyaku ndo liholu lyangu." 8 Yonatani kawagambira, "Hatuloki kuwagendera wantu walii su wawezi kutulola. 9 Handa pawatugambira tuwahepi, panu patuweriti, su hatugoloki palaa panu pota kuwagendera. 10 Kumbiti pawalonga tuwagenderi su hatuwagendeli toziya ali ndo lilangaliru kuwera Mtuwa Mlungu katutenda tuwakangi." 11 Su, walilangaziya kwa Wafilisti. Shakapanu Wafilisti walonga, "Mloli Waeburaniya walii wankulawa kumalindi kwawaweriti walififa." 12 Wafilisti yawaweriti kuliboma wamshema Yonatani na mntemba yakajegiti vintu vya kulikomangira, "Mwizi, na twenga hatuwalangaziyi shintu."

Yonatani kamgambira mntemba yakamjegiriti vintu vya kulikomangira, "Gumfati, Mtuwa Mlungu katutenda tuwakangi." 13 Su,Yonatani kakwena kwa magulu na mawoku na mntemba uliya kamfata.Yonatani kawakomanga Wafilisti pakawagusiya pasi agawu mntemba ulii kafata kumbeli pakawalaga. 14 Mu makomangu aga ga kwanja Yonatani pakawera na mntemba gwakuyi yakampapiriti vintu vya kulikomangira, kawalagiti wantu handa ishilini mushipandi sha nusu heka. 15 Muisi yoseri ya Wafilisti, wantu woseri wanja kushashatika, wamashonta kungonjeru, wantu yawawera mumalambu, yawawera kuliboma na wakomanga walendemeriti, isi ilendemeriti na kuweriti na lyonga likulu.

16 Walolalola wa Sauli aku Gibea muisi ya Benjamini, wawawoniti wantu watangala pawatuga aku na aku. 17 Sauli kawagambira wantu yakaweriti nawa, "Muliwalangi su tuvimani wagaa watupota." Pawawalangiti, wavimaniti handa Yonatani na mntemba yakampapiriti vintu vya kulikomangira kwahera. 18 Sauli kamgambira mtambika Ahiya, "Gulijegi panu Lisandiku lya Mlungu." Shaka ashi Lisandiku lya Lipatanu lya Mlungu liweriti pamuhera na Waisraeli. 19 Sauli pakaweriti kankali kuyowera na mtambika, mumahengu ga Wafilisti ndewu zongereka nentu. Hangu Sauli kamgambira mtambika, "Guleki nagulijega kayi Lisandiku lya Lipatanu." 20 Hangu, Sauli na wantu wakuyi walipanga na kwingira mumakomangu na Wafilisti. Kumbiti Wafilisti wanjiti kulikomanga weni kwa weni kwa ndewu nkulu. 21 Waebulaniya yawaweriti kwa Wafilisti, na yawagenditi nawa mumalingu, wagalambuka na kuwera pamuhera na Waisraeli yawaweriti na Sauli na Yonatani. 22 Ata Waisraeli wamonga yawaweriti walififa mu isi ya migongu ya Efraimu, pawapikiniriti handa Wafilisti waweriti wankutuga na womberi wawafata na kuwakomanga. 23 Hangu Mtuwa Mlungu kawapananiti Waisraeli ukanka.

24 Lishaka lilii, Waisraeli waweriti watoka nentu, toziya Sauli kawalapira wantu, "Muntu yoseri yanakalii shiboga pamberi pa mshenji kuzyeta na pamberi haneniwawuziliri wankondu wangu na kapangiluwi." Hangu kwahera muntu yakalawaliriti shintu shoseri lishaka ali. 25 Wantu woseri pawasokiti pantundu wawoniti lwashi kila pahala. 26 Kumbiti wantu pawawoniti lwashi kila pahala lwakusumangana, kwahera muntu yakajeriti kuliya lwashi alu, toziya watiriti mpangaliru yawagambiritwi na Sauli. 27 Kumbiti Yonatani kapikiniriti ndiri shakawapangaliriti wantu. Hangu katalipisiya luhonga lwakaweriti nalu, kingiziya mulisega lya lwashi, kaliya lwashi alu. Su kaliwona kana makakala. 28 Muntu yumu kamgambira, "Tati gwaku kawalapira wantu pakalonga, muntu yoseri yanakaliyi shiboga leru na kapangiruwi." Na wantu waweriti watoka kwa njala

29 Yonatani kamwankula, "Tati gwangu kawashenyiya wantu. Guloli ntambu yanana makakala toziya ndiya shididini lwashi. 30 Handa wanjagira watwenga pawaliya shididini kulawa mu vintu vyawalopoliti kwa wankondu wawu, metupati makakala, na Wafilisti wavuwa nentu mewalaguwi." 31 Lishaka lilii Waisraeli wawakomiti Wafilisti, kwanjira Mikimashi mpaka Aiyaloni. Shaka ashi Waisraeli waweriti watoka nentu. 32 Su watugiriti vintu vyawalopoliti, wawatola wankondolu, ng'ombi na mwana gwa ng'ombi wawalikitula waliya vinofu na mwazi. 33 Wantu wamonga wamgambira Sauli, "Guloli wankutenda vidoda kwa Mtuwa Mlungu kwa kuliya vinofu yana mwazi." Sauli kawagambira wantu, "Womberi wamgalambuka Mtuwa Mlungu. Mubilingisiyi libuwi likulu paneni panu. 34 Kawagambira, Mgendi mwakawagambiri wantu woseri, kila muntu kajegi ng'ombi ama kondolu gwakuyi panu, wawalikituli na kuwaliya panu. Nawatenda vidoda kwa Mtuwa Mlungu, kwa kuliya vinofu vyana mwazi." Hangu, pashiru palii woseri wawajegiti wang'ombi wawu na kuwalikitula palapalii. 35 Su, Sauli kamnyawira Mtuwa Mlungu shitalawanda shashinyawitwi kwa mabuwi. Panu paweriti pakutambikira pa kwanja Sauli kamnyawiliti Mtuwa Mlungu.

36 Shakapanu Sauli kawagambira wantu, "Tugendeni twakawafati Wafilisti pashiru, twakawakankali na kukwepula lunda zawu mpaka mandawira, hapeni tumleki muntu yoseri mkomu." Wantu wamgambira, "Gutendi shaguwona shiherepa kwa gwenga." Kumbiti mtambika kawagambira, "Kwanja tumkosiyi Mtuwa Mlungu."

37 Hangu, Sauli kamkosiya Mlungu, "Hashi, ng'endi kuwakomanga Wafilisti? Hashi, haguwatendi Waisraeli wawakanki?" Kumbiti Mlungu kankula ndiri shintu lishaka ali. 38 Sauli kalonga, "Mwizi panu mwenga wakulu wa wantu, tuvimani ndo vidoda gaa tutenda leru. 39 Nililapa kwa Mtuwa Mlungu yakawera mkomu na mweni kayilopola Israeli, ata handa ndo mwana gwangu Yonatani, mpaka kalaguwi." Kumbiti kwahera muntu yakalongiti shisoweru. 40 Hangu, Sauli kawagambira, "Mwawoseri mwenga mgoloki uwega ulii, shakapanu neni Yonatani mwana gwangu hatugoloki uwega awu." Womberi wankula, "Gutendi shoseri shaguwona shiherepa." 41 Sauli kalonga, "Gwee Mtuwa Mlungu gwa Israeli, ntambu gaa hagweni nankuli neni ntumintumi gwaku? Gwee Mtuwa Mlungu gwa Israeli, payiwera likosa lya kwaneni ama kwa Yonatani mwana gwangu, su, gwamuwi kwa libuwi lya Ulimu kukosilira nfiru yaku. Kumbiti payiwera likosa ali lya kwa wantu waku wa Israeli, gwamuwi kwa litalawu lya Tumimu kukosilira nfiru yaku." Yonatani na Sauli wapatikaniti kuwera na likosa, kumbiti wantu wawonikaniti wahera likosa. 42 Sauli kalonga, "Mgalambuli simbi kwa kugalambula Urimu na Tumimu pakati pangu na mwana gwangu Yonatani." Yonatani kawoneka kuwera na likosa. 43 Sauli kamgambira Yonatani, "Gung'ambili shagutenditi." Yonatani kankula, "Ndiyiti lwashi shididini kwa kutendera luhonga. Na panu na nakala kuhowa." 44 "Sauli kalonga, Mlungu na kankomangi neni ntambu iraa na nentu handa Yonatani pagulaguwa ndiri."

45 Kumbiti wantu wamgambira Sauli, "Yonatani yakaijegeriti Israeli ukanka mkulu handa awu, ntambu gaa kalaguwi? Shitwatira ashi shiweri kutali. Tulilapa kwa Mtuwa Mlungu yakawera mkomu, ata viri za mtuyi gwakuyi hapeni zituluki pasi. Shakatenditi leru, kashitenda kwa utanga wa Mtuwa Mlungu. Hangu, wantu wamponiziya Yonatani na yomberi kalaguwa ndiri."

46 Shakapanu Sauli kalekiti kuwafata Wafilisti na womberi Wafilisti wawuya mukaya mwawu.

47 Pa Sauli kuwera mfalumi gwa Israeli, kalikomangiti na wankondu wakuyi kila uwega: Wamowabu na Waamoni na Waedomu na wafalumi wa Soba na Wafilisti. Kila pawalikomangiti nkondu, kawakangiti. 48 Kalikomangiti kwa ugangamala, wawakanka Wamaleki. Kawalopuziyiti Waisraeli kulawa kwa wantu woseri yawaweriti wankuwakomanga.

49 Wana wapalu wa Sauli waweriti Yonatani, na Ishivi na Maliki Shua. Wahinga wakuyi wawili, mwiwuka gwa kwanja kashemitwi Merabu na mpusu kashemitwi Mikali. 50 Mdala gwakuyi Sauli kashemitwi Ahinoamu mhinga gwa Ahimaasi. Mkulu gwa shonta lya Sauli wamshemiti Abineri, mwana gwa Neri, yakaweriti mjomba gwa Sauli. 51 Tati gwa Sauli kaweriti Kishi na tati gwa Abineri kaweriti Neri, waweriti wana gwa Abieli.

52 Kuweriti na makomangu makulu pakati pa Israeli na Wafilisti shaka shoseri Sauli pakaweriti mfalumi na kila mala Sauli pakampatiti muntu kana likakala ama shikambaku kamtoliti kaweri pamuhera na shonta lyakuyi.