1 Samueli ndo katola supa ndidika ya lipaki lya mizeyituni kamwitira Sauli kumtuyi, kamkisikira na kumgambira, "Mtuwa Mlungu kakulekera lipaki guweri mkolamlima gwa wantu wakuyi. 2 Leru patulekana, haguliwoni na wantu wawili pakwegera na lisembi lya Raheli aku Selisa muisi ya Benjamini. Awa hawakugambili kuwera punda walii yaguweriti guwasakula wawoneka kala. Tati gwaku kaleka kulihola punda, ila kana lyoga kwa gwenga, pakalikosiya kila mala, hantendi hashi kwa mwana gwangu? 3 Kulawa panu hagugendi mpaka kumtera mkulu aku Tabori, pahala peni haguliwoni na wapalu watatu munjira kugenda kumlavilira Mlungu tambiku aku Beteli, gwa kwanja gwawu kana wanambuzi watatu na gwa pili hakaweri katola mabumunda matatu na gwa tatu hakaweri kajega shiwiga sha likuli sha divayi. 4 Hawakulamsiyi na kukupanana mabumunda mawili, na gwenga hagwanki. 5 Shakapanu, pagusoka pahala pakulavilira tambiku Gibea ya Mlungu, pahala pana ng'onjeru ya wamashonta wa Wafilisti panu, paguwera gwapakwegera na mji, haguliwoni na shipinga sha wambuyi wa Mlungu. Wambuyi wa Mlungu awa walawa pahala pakuguwira agawu pawagomba vinubi na ng'oma ndidika na filimbi na zezi na hawaweri wankutunga. 6 Rohu gwa Mtuwa Mlungu hayikwizili kwa likakala, na gwenga hagwanji kutunga pamuhera na womberi na kugalambuka kuwera muntu gwingi. 7 Shaka mirandu ayi payilawira, shoseri shaguweza kutenda gushitendi, toziya Mlungu kapamuhera na gwenga. 8 Hagunongoleri kugenda kumjini Giligali, pahala peni hanikuwoni na kulaviya tambiku ya kulunguziwa na tambiku za ponga. Haguheperi panu kwa shaka sha mashaka saba mpaka nizi na kukulanguziya sha kutenda." 9 Sauli pakagalambukiti su kumleka Samueli, Mlungu kagalambula moyu gwa Sauli. Na goseri galii gakagambilitwi na Samueli galawiliti lishaka ali. 10 Sauli na ntumintumi gwakuyi pawasokiti aku Gibea, kankitwi na shipinga sha wambuyi wa Mlungu. Rohu gwa Mlungu imwiziliti kwa likakala, na Sauli kanja kutunga pamuhera na wambuyi wa Mlungu awa. 11 Wantu yawamjimiliti Sauli pakwanja, pawamwoniti kankutunga, walikosiyana, "Shintu gaa shimkola mwana gwa Kishi? Hashi, ata Sauli ndo yumu gwa wambuyi wa Mlungu?" 12 Muntu tunga, mweni kaya gwa pahala panu, kalonga, "Hashi, tati gwawu ndo gaa?" Hangu kulawira mtakulu, "Hashi, ata Sauli ndo yumu gwa wambuyi gwa Mlungu?" 13 Sauli pakamaliliti kutunga, kagenditi pahala pa kutambikira. 14 Tati mpusu gwa Sauli pakawawoniti Sauli na ntumintumi, kawakosiya, "Muweriti koshi?" Sauli kamuwankula, "Tugenditi kuwasakula punda na patuwoniti wawoneka ndiri tugenditi kumlola Samueli" 15 Tati mpusu uli gwa Sauli kamgambira, "Shondi, gung'ambili shilii shakakugambiriti Samueli." 16 Sauli kankula, "Katugambiriti pota kufifa kuwera punda wawoneka." Kumbiti Sauli kamgambira ndiri tati gwakuyi mpusu handa Samueli kamgambiriti kuwera mekaweri mfalumi.

17 Samueli kawashemiti wantu woseri wajojoniki kulongolu kwa Mtuwa Mlungu aku Mizipa. 18 Pawasokiti kawagambira, "Mtuwa Mlungu, Mlungu gwa Israeli, kalonga hangu, niwalaviyiti Waisraeli muisi ya Misri, niwalopuziya mwenga kulawa kwa Wamisri na falumi zyamonga zyaziwayoniriti. 19 Kumbiti leru ayi mnema neni Mlungu gwenu yaniwalopoliti kulawa muntabika na kwinginika kwenu na mwenga mlonga, ndala, gututuliri mfalumi kwa twenga. Vinu, su, mlitakasiyi mawoseli kulongolu kwa neni pamuhera mumakabila genu na kwa maelufi genu." 20 Shakapanu Samueli kagajega pakwegera makabila goseri ga Israeli, likabila lya Benjamini lisagulwa kwa kugalambula simbi. 21 Kalijega kulongolu likabila lya Benjamini, kulinganira na nkolu zawu na lukolu lwa Matiri lusyaguluwa kwa kugalambula simbi. Upeleru wakuyi kalujega kulongolu lukolu lwa Matiri, na Sauli mwana gwa Kishi kasyagulwa kwa kugalambula simbi. Kumbiti pawamsakuliti wamwona ndiri. 22 Wamkosiya kayi Mtuwa Mlungu, "Hashi, muntu ayu kiza kala panu?" Mtuwa Mlungu kankula Sauli, "Kalififa kuvisanka." 23 Su, wagenditi mbiru, wamsakula Sauli na kumjega. Sauli pakagolokiti muwamu mwa wantu kaweriti mtali kuliku wantu woseri, kwanjira mumawega. 24 Samueli kawagambira wantu woseri, "Ayu ndo muntu yakasyagulitwi na Mtuwa Mlungu muwantu woseri, kwahera yoseri yakawera handa yomberi." Wantu woseri washowangana. "Mfalumi Kalikali mashaka goseri" 25 Shakapanu Samueli kawagambiriti wantu kuusu mahengu ga ufalumi, kagalemba mushitabu na kashituliti kulongolu kwa Mtuwa Mlungu. Shakapanu, Samueli kawagambiriti wantu woseri galii gakafiruwa kupata, kila muntu kagendi ukaya kwakuyi. 26 Viraa, Sauli pamuhera na wantu wana makakala weni Mlungu kashinkuliti miyoyu yawu, wagenditi pamuhera na yomberi ukaya kwakuyi aku Gibea. 27 Kumbiti wantu wamonga yawafaa ndiri shintu, walongiti, "Hashi, muntu ayu kaweza kutulopola?" Wampanana ndiri ligoya Sauli na wampananiti ndiri lifupu lyoseri. Kumbiti yomberi keniti ndiri maya.