1 Sauli kamgambiriti mwana gwakuyi Yonatani na wakulu wakuyi kuusu mpangu gwakuyi gwa kumlaga Dawudi. Kumbiti Yonatani, mwana gwa Sauli, kamfiriti nentu Dawudi. 2 Hangu, kamgambira Dawudi, "Tati gwangu kafira kakulagi. Hangu guliloleri weri. Shirawu mandawira, gulififi pahala pa bada, gulikali palaa. 3 Neni hanizi na kugoloka pakwegera na tati gwangu aku kulilambu pahala pagufira kuwera gulififa. Hanyoweri nayu kuusu gwenga na shintu shoseri shanishiyambuli kulawa kwakuyi, hanikugambiri."

4 Yonatani kamzyuma Dawudi kulongolu kwa tati gwakuyi, kamgambira, "Nagutenda ukondola kwa ntumintumi gwaku Dawudi toziya yomberi hakeni tendi vidoda vyoseri kwa gwenga, matendu gakuyi goseri gakakutenderiti mashaka goseri gaweriti maheri kwa gwenga. 5 Kaweriti kala kugahowiziya makaliru gakuyi palii pakagenditi kumlaga Mfilisti Goliyati na Mtuwa Mlungu kawapananiti Waisraeli ukanka mkulu. Gwenga paguguwoniti mlandu gulii gunemeleriti. Ntambu gaa gufira kutenda vidoda kwa kwita mwazi yaguwera ndiri na shidoda kwa kumlaga Dawudi pota toziya?"

6 Sauli kampikiniriti Yonatani, shakapanu, "Nililapa kwa Mtuwa Mlungu yakawera mkomu, hapeni nimlagi Dawudi." 7 Hangu, Yonatani kamshema Dawudi na kumgambira mirandu yoseri ayi. Yonatani kamjega kwa Sauli na Dawudi kamtendera Sauli gambira pakwanja.

8 Pagapititi aga kuweriti na nkondu pakati pa Wafilisti na Waisraeli. Dawudi kalawa kulikomanga na Wafilisti, kawalaga Wafilisti wavuwa na yawasigaliti wamtira. 9 Lishaka limu, rohu idoda yayitumitwi na Mlungu imwizira Sauli pakaweriti kalikala ukaya kwakuyi pakakola mgoha mliwoku, shaka sheni Dawudi kaweriti kankugomba shinubi. 10 Sauli kajeriti kumsoma Dawudi kwa mgowa agu, Kumbiti Dawudi kakwepiti mgoha gwa Sauli na mgoha guguma shibambaza. Dawudi katuga na kutoloka. 11 Pashiru pamu, Sauli katumiti wantu ukaya kwa Dawudi mumuloli handa kamlaa su kapati kumlaga mandawira. Kumbiti Mikali, mdala gwa Dawudi kamgambira Dawudi, "Handa pagutoloka ndiri pashiru shirawu mandawira hagulaguwi." 12 Hangu Mikali kamtangati Dawudi kusuluka kupitira Kulidilisha na yomberi kalawa na kutoloka. 13 Mikali katola shinyagu kashivalasiya mibahira ya mbuzi kumtuwi, shakapanu kashigibikira na nguwu. 14 "Sauli pakatumiti wantu kumbata Dawudi, Mikali kawagambira kuwera Dawudi kalwala." 15 Shakapanu Sauli kawalagalira wawuyi kayi aku, kawalagalira kulonga, "Mumujegi kwa neni Dawudi ata pakawera mumashera su kalaguwi." 16 Wantu walii pawingiliti ukaya kwa Dawudi na kushilola shitanda wawoniti mibahira mbuzi kumtuwi. 17 Shakapanu Sauli kamkosiya Mikali, "Ntambu gaa gumpayira? Gumleka nkondu gwangu katoloki?" Na yomberi Mikali kamwankula Sauli, "kang'ambiriti, Gunteki ng'endi naniza kukulaga."

18 Dawudi pakatolokiti, kagenditi Rama kwa Samueli. Kamgambiriti Samueli mirandu yoseri yakamtenderiti Sauli. Su, Dawudi na Samueli wagenditi na kulikala aku Nayoti iweriti numba ya wambuyi wa Mlungu. 19 "Pamashaka tunga kupita Sauli kagambiluwa kuwera Dawudi kaweriti aku Nayoti mu Rama." 20 Sauli pakajegiti wantu wambati. Kumbiti pawashiwoniti shipinga sha wambuyi wa Mlungu pashitunga na Samueli pakalilonguziya, Rohu ya Mlungu iwizira wantumintumi wa Sauli na womberi viraa wanja kutunga pawavina na kushowangana. 21 Sauli pakagambiruwitwi visoweru avi, katuma wantumintumi wamonga, nawomberi viraa wanja kutunga pawavina na kushowangana. Sauli pakatumiti wantumintumi wamonga kwa mala ya tatu, na womberi viraa wanja kutunga. 22 Mweni ndo kagenda Rama. Pakasokiti palinegu likulu lyaliweriti aku Seku, kamwoniti muntu tunga yomberi kamkosiya, "Samueli na Dawudi wa koshi?" Muntu ayu kamwankula, "Wa Nayoti, mu Rama." 23 Na yomberi Sauli kagenda aku Nayoti mu Rama. Pakasokiti aku, Rohu ya Mlungu imwizira, na yomberi kanja kutunga agawu pakavina na kushowangana pakaweriti munjira mpaka pakasokiti Nayoti mu Rama. 24 Kavuliti nguwu yakuyi kawera kankutunga kulongolu kwa Samueli. Kagonja ntambu iraa ayi paliwala na pashiru. Hangu wantu wanjiti kulikosiya, "Hashi, Sauli na yomberi viraa kawera yumu gwa wambuyi?"