1 Dawudi kagenditi kwa mtambika Ahimeleki aku Nobu. Ahimeleki kalawiti kumwanka aku pakawera kankulendemera, kamkosiya, "Ntambu gaa gwiza panu gwekayaku?" 2 Dawudi kamwankula, "Napanu toziya mfalumi kantuma lihengu. Kang'ambiriti nanigambiri muntu yoseri shilii shakantumiti. Tuligambiziyana na wantu wangu handa tuliwoni pahala tunga. 3 Hashi, gwana shintu shoseri shakuya? Nikuluwa mabumunda mhanu ama shoseri shashiwera." 4 Mtambika Ahimeleki kamgambira, "Panu nahera libumunda lya ntambu iraayi. Nanaga mabumunda mananagala. Muweza kupananwa mabumunda aga paiwera wantu waku haweni gonji na wadala pakwegera." 5 Dawudi kamgambira, "Nakaka, mashaka goseri pang'enda kwajili ya lihengu lya gweka, wadala wawera kutali na twenga! Payiwera nshimba za wantemba waneni ndo zinanagala tuweri kulihengu lya ntambu iraa, hashi ndo nentu mulihengu lilii lya gweka?" 6 Hangu mtambika Ahimeleki kampanana mabumunda mananagala, toziya kwaniti ndiri mabumunda gamonga ila aga yagatulwa kulongolu kwa Mtuwa Mlungu kulilingu linanagala, igalambulwa na mabumunda ga syayi na yagalawiti kumotu.

7 Su kaweriti panu lishaka ali ntumintumi yumu gwa Sauli mweni kaweriti kagenda kuguwira kulongolu kwa Mtuwa Mlungu. Ntumintumi ayu kashemitwi Doegi, kulawa Edomu, mkulu gwa walolera vigongolu wa Sauli.

8 Su, Dawudi kamgambira Ahimeleki, "Hashi, gwana ligumba ama mgoha guweza kumpanana? Toziya mahengu ga mfalumi gantenda mbuki kalongola na neni mbuka pota ligumba lyangu pota vintu vya kulikomangira vyoseri." 9 Ahimeleki kankula, "Nanali ligumba lya Mfilisti Goliyati yagumlagiti kululalanda lwa Ela, lya panu, litawalilwa mushitambala kumbeli kwa nguwu yakugibikira pashifuwa sha mtambika. Handa pagulifira, gulitoli, kwahera ligumba limonga panu ira ali hera." Dawudi kalonga, "kwahera ligumba limonga handa ali, gumpanani ali."

10 Shakapanu Dawudi kawuka kendereya kamtugiti Sauli, kagenda kwa mfalumi Akishi gwa Gati. 11 Wantumintumi wa mfalumi wamgambira Akishi, "Ayu Dawudi ndiri? Mfalumi gwa isi ya Israeli? Hashi, ayu ndiri waweriti wankuligambirana mung'oma, pawalonga, Sauli kalaga maelufu ga wantu na Dawudi kalaga malongu elufu ga wantu?"

12 Visoweru avi Dawudi kaweziti ndiri kulyaluwa, kanja kumtira nentu Akishi mfalumi gwa Gati. 13 Hangu kila pawaweriti pakwegera na yomberi, kagalambula tabiya yakuyi, kalitenda kapunganika, kawera kankukwandangakwandanga kuligomi lya mji, na mata gakuyi kagaleka ganyililiki pandevu zakuyi.

14 Akishi kawagambira wantumintumi wakuyi, "Muvimana kuwera muntu ayu ndo kanalukwali, ntambu gaa mumjega kwa neni? 15 Hashi, niwafira wanalukwali nentu, muvimana handa muntu ayu ndo kanalukwali kiza kung'aziya nentu? Ntambu gaa munjegera kanalukwali kizi kung'aziya na vitendu vya ulukwali? Hashi, muntu ayu hakingiri ukaya kwa neni?"