1 Samueli kamgambira Sauli, "Mtuwa Mlungu kantumiti nikulumiki guweri mfalumi gwa wantu wakuyi wa Israeli. Vinu gupikinili visoweru vya Mtuwa Mlungu. 2 Mtuwa Mlungu yakana makakala kalonga hangu, haniwakomangi Waamaleki toziya wawakomangiti Waisraeli pawaweriti wankulawa Misri. 3 Vinu, gugendi gwakawakomangi na kwagamiziya vintu vyoseri vyawawera navi. Naguwaleka wakomu, ila guwalagi woseri. Wapalu kwa wadala, wana na wanonu, wang'ombi, wakondolu, ngamiya na wapunda."

4 Sauli kalishemiti shonta lyakuyi, kalilolalola weri aku mji gwa Telaimu. Kuweriti na shonta laki mbili kulawa israeli na elufu lilongu kulawa Yuda. 5 Shakapanu yomberi na wantu wakuyi wagenditi kumji gwa Amaleki, wawera pawagwadira kululalanda. 6 Sauli kawagambira Wakeni, "Muwuki! Muwamu mwa Waameleki, hera hangu, haniwalagi pamuhera na womberi. Muwuki toziya mwenga muwatendiriti maheri Waisraeli pawalawiti Misri." Su, Wakeni wawuka muwamu mwa Waamaleki.

7 Sauli kawakankiti Waamaleki kwanjira Havila mpaka Shuri, kwagulawa mshenji mwa Misri. 8 Kamlopoliti mfalumi Agagi gwa Waamaleki pakawera mkomu. Kawalaga wantu kwa ukola wa ligumba. 9 Kumbiti Sauli na wantu wakuyi wamlagiti ndiri Agagi, pota kondolu waherepa nentu, wang'ombi waherepa, mwana gwa ng'ombi, wakondolu na shoseri shilii shashiweriti shiherepa washilaga ndiri. Kumbiti vintu vyoseri vidoda na vyaviweriti vifaa ndiri wavyagamisiya.

10 Mtuwa Mlungu kamgambira Samueli, 11 "Njuta toziya nimtenda Sauli kuwera mfalumi. Yomberi kaleka kunfata neni na kajimira ndiri malagalira gangu." Samueli kakalaliti, kamlilira Mtuwa Mlungu pashiru poseri. 12 "Samueli kapikiniriti handa Sauli kaweriti kiza aku Karimeli na kagolosiya shitwalingu sha uholuziya wakuyi, na kagenda Giligali. Hangu shirawu yakuyi, Samueli. Kimukiti mandawira putiputi kagenda kuliwona na Sauli." 13 Samueli pakamsokiti Sauli, Sauli kamgambira Samueli, "Mtuwa Mlungu na kakutekeleri! Ntenda lagiru lya Mtuwa Mlungu lyakandagaliriti ntendi."

14 Samueli kamgambira, "Mbona mpikinira mliru gwa wakondolu na wang'ombi?" 15 Sauli kankula, "Wantu wawalekiti kondolu na ng'ombi waherepa yawawatoliti kwa Waamaleki su kumtambikira Mtuwa Mlungu, Mlungu gwaku, kumbiti wamonga woseri tuwalagiti."

16 Samueli kambera Sauli, "Gunyamali! Hanikugambiri shakang'ambiriti Mtuwa Mlungu leru pashiru." Sauli kalonga, "Gung'ambili."

17 Samueli kamgambira, "Tembera guliwoniti kuwera gwenga gumanika ndiri, Hashi, gwenga guweriti ndiri mlonguziya gwa makabila ga Israeli? Mtuwa Mlungu kakulumika kwa lipaki guweri mfalumi kwa Israeli. 18 Mtuwa Mlungu pakakutumiti kakugambira, gugendi guwalagi Waamaleki woseri toziya watenda vidoda! 19 Ntambu gaa, gulijimira ndiri liziwu lya Mtuwa Mlungu? Ntambu gaa mtugira lopola na hangu kutenda mlandu gudoda kulongolu kwa Mtuwa Mlungu?"

20 Sauli kankula, "Njimiriti liziwu lya Mtuwa Mlungu. Ng'enditi kulii kwakantumiti Mtuwa Mlungu, nimujega Agagi mfalumi gwa Waamaleki, na niwalagiti woseri Waamaleki. 21 Kumbiti wantu watoliti lopola, kondolu na mbuzi na ng'ombi na vintu vyoseri viherepa vyavilaviwitwi vyagamiziwi su kumtambikira Mtuwa Mlungu, Mlungu gwaku, aku Giligali."

22 Samueli kamgambira, "Hashi, Mtuwa Mlungu kasekelera nentu tambiku ya kulunguziwa na malaviwu, teratera kujimira liziwu lyakuyi? Guloli, kumjimira yomberi ndo kuherepa kuliku malaviwu na kumpikinira kuherepa kuliku kutambikira lipaki lya kondolu mpalu. 23 Toziya kumgalambuka Mtuwa ndo ukondola handa uhawi, na mtiti ndo handa ukondola na kuguwira vinyagu. Toziya gulilema lagiru lya Mtuwa Mlungu, na yomberi kakulema kuwera mfalumi,"

24 Sauli kamgambira Samueli, "Ntenda vidoda. Mega lagiru lya Mtuwa Mlungu na lagiru lyaku, toziya niwatiriti wantu wangu, ntenda vyawafiriti. 25 Kumbiti vinu nikuluwa, gunekiziyi vidoda vyangu. Gunjimiri mbuyi pamuhera na gwenga su nwezi kumguwira Mtuwa Mlungu."

26 Samueli kamwankula. "Nakaka, mbeza ndiri kuwuya pamuhera na gwenga. Gwenga gulilema lagiru lya Mtuwa Mlungu na yomberi kakulema kuwera mfalumi gwa Israeli." 27 Samueli pakagalambukiti su kagendi zakuyi, Sauli kakola nguwu yakuyi, nalweni lupapuka. 28 Samueli ndo kamgambiriti Sauli, "Kwanjira leru Mtuwa Mlungu kaulaviya ufalumi wa Israeli kulawa kwa Gwenga na hakampanani muntu gwingi muwamu mwa wapakwegera waku yakawera kaherepa kuliku gwenga. 29 Mlungu gwa Israeli gwa mashaka goseri kapayira ndiri na kagalambula ndiri liholu lyakuyi. Yomberi muntu ndiri ata kagalambuli maholu." 30 Sauli kankula, "Ntenda vidoda. Kumbiti nagunsoniziya kulongolu kwa wazewi na wantu wa neni na Waisraeli. Gunjimiri mbuyi pamuhera na gwenga su nimguwiri Mtuwa Mlungu, Mlungu gwaku."

31 Su, Samueli kawuya pamuhera na yomberi na Sauli kamguwira Mtuwa Mlungu. 32 Shakapanu Samueli kalonga, "Munjegeri panu Agagi mfalumi gwa Waameleki." Agagi kamgendera Samueli pakawera mukunemelera su kaliholiti, "Mponeka hapeni wantagi." 33 Samueli kalonga, "Toziya ligumba lyaku liwalaga ashina mawu wavuwa nawawera na wana na mawu gwaku ntambu yakawera pota mwana muwamu mwa ashina mawu." Kamuhanjangahanjanga Agagi vipandivipandi kulongolu kwa Mtuwa Mlungu aku Giligali.

34 Shakapanu, Samueli kagenda Rama na mfalumi Sauli kawuya ukaya kwakuyi aku Gibea. 35 Kwanjira lishaka ali, Samueli kamwona ndiri Sauli, mpaka lishaka pakahowiti. Ata hangu Samueli kamliliriti Sauli na Mtuwa Mlungu kahinginikiti handa kaweriti kamlumika Sauli mfalumi gwa Israeli.