1 Pa shaka tunga, Wafilisti wajojoniriti mashonta gawu kala kugenda kulikomanga na Waisraeli. Akishi kamgambira Dawudi, "Guvimani weri handa gwenga na wantu waku mfiruwa kugenda pamuhera na neni kulikomanga nkondu." 2 Dawudi kamwankula Akishi, "Yina! Haguwoni shintu sheni ntumintumi gwaku kaweza kutenda." Akishi kamgambira, "Na neni hanikutendi kuwera mlolera gwangu namweni gwa muukomu wangu."

3 Shaka ashi, Samueli kaweriti kahowiti kala na Waisraeli woseri waweriti wadaya kala na kumfindira kumji gwakuyi gwa Rama. Sauli kaweriti kawawinga kulawa muisi ya watunga na wahawi woseri. 4 Wafilisti wajojonikiti na kunyawa ng'onjeru zawu aku Shunemu, na Sauli kawajojoniriti Waisraeli woseri na kunyawa ng'onjeru zawu kulugongu Giliboa. 5 Sauli pakawoniti shonta lya Wafilisti kanjiti kutira, kanja kulendemera kwa lyoga lyakaweriti nali mumoyu mwakuyi. 6 Ata pakamluwiti Mtuwa Mlungu Shisoweru, Mtuwa Mlungu kamwankula ndiri kwa kulota pota kwa mabuwi ga kukosilira nfiru ya Mlungu yagashemwa Urimu na Tumimu na pota kwa njira ya mambuyi. 7 Sauli ndo kawagambira wantumintumi wakuyi, "Munsakuliri mdala mweni yakaweza kutunga su nimgenderi na kumluwa kampanani shisoweru." Wantumintumi wakuyi wamwankula, "Kwana mtunga yumu aku Endori." 8 Su, Sauli kaligalambula na kuvala nguwu zimonga su nakamanika kuwera ndo mfalumi, kagenda aku pamuhera na wantu wakuyi wawili. Wasoka kwa mdala ayu pashiru, kamgambira, "Guntungili kwa mahoka, gumjegi pasipanu yoseri hanikukandiri." 9 Mdala ulii kamgambira, "Gwenga guvimana nakaka kuwera mfalumi Sauli kawawusiya watunga na wahawi woseri muisi ya Israeli. Vinu ntambu gaa gunyambira su nfuwi?" 10 Sauli kamlapira kwa litawu lya Mtuwa Mlungu, pakalonga, "Nililapa kwa Mtuwa Mlungu yakawera mkomu, handa kwahera toza yoseri hayikupati kulawirana na mlandu agu." 11 Mdala ulii kamkosiya, "Hashi, nikujegeri gaa kulawa aku kwawahowiti?" Sauli kankula, "Gunjegeri Samueli." 12 Mdala ulii pakamwoniti Samueli kagutanga, kamgambira Sauli, "Ntambu gaa gumpayira? Gwenga ndo mfalumi Sauli!" 13 Mfalumi Sauli kamgambira, Nagutira "Guwona shishi?" Mdala ulii kamwankula, "Nimwona lihoka kankulawa mulitapaka." 14 Sauli kamgambira mdala, "Ndo mfanu gwa shishi?" Mdala ulii kamgambira, "Mpalu mzewi kankukwena pampindi, na yomberi kalizyengetiziya lihabiti." Panu, Sauli kavimana handa ayu ndo Samueli. Sauli kang'ong'onala mpaka pasi kwa kumpanana ligoya. 15 Samueli kamgambira Sauli, Ntambu gaa gung'aziya kwa kunjega pampindi? Sauli kankula, "Neni nankutabika nentu! Wafilisti wankulikomanga nkondu na neni na Mlungu kandeka, kanankula ndiri kayi kwanjira ya wambuyi pota kwa kulota. Ndo mana nikushema gung'ambaziyi ntendi hashi." 16 Samueli kalonga, "Ntambu gaa gunduwa shisoweru sheni Mtuwa Mlungu kakulema na kawera mnkondu gwaku? 17 Mtuwa Mlungu kakuntendera shili shakakugambiriti kwa njira ya neni. Mtuwa Mlungu, kautola ufalumi kulawa kwaku na kampanana Dawudi mnkondu gwaku. 18 Toziya, gwenga gulijimira ndiri liziwu lya Mtuwa Mlungu, kugatenda ndiri galii Mtuwa Mlungu kakugambiriti kuwalaga Waameleki. Ndo mana leru Mtuwa Mlungu kakutendera mirandu ayi. 19 Nentu ya aga, Mtuwa Mlungu hakakulekeri gwenga pamuhera na Waisraeli woseri wasindi na Wafilisti. Shirawu, gwenga na wana waku hamuweri pamuhera na neni, ata shonta lya Israeli Mtuwa Mlungu hakawatendi wasindi na Wafilisti." 20 Vumu, Sauli pakawera na lyoga kulawirana na visoweru vya Samueli, kaguwa makukama, kawera ndiri na likakala lyoseri, toziya kaweriti kaliya ndiri shoseri kwa lishaka lyoseri, pashiru na paliwa. 21 "Mdala ulii ndo pakamgenderiti Sauli na kumwona kuwera Sauli kaniti lyoga nentu, kamgambira, ntumintumi gwaku niutuliti ukomu wangu pakwegera na kuhowa kwa kutenda shilii shagung'ambiriti nikutenderi. 22 Vinu, gumpikiniri neni ntumintumi gwaku, hanikutandiri shiboga su guliyi na gwenga haguweri na makakala ga kwendeleya na mwanja gwaku." 23 Sauli kalemiti na kulonga, hapeni ndiyi. "Kumbiti wantumintumi pamuhera na mdala ulii, wazyangazyanga kaliyi na yomberi kawapikinira. Hangu kagolokiti kulawa pasi na kalivaga pashitanda." 24 Mdala ulii kaweriti na ng'ombi shididini yakanenipiti yumu ukaya, katenda kalongola kamlikitula, katola ubumu wa nganu, kaukabanga, katenda libumunda lyalilekeluwa ndiri simika. 25 Kampanana Sauli, kawapanana viraa na wantumintumi wakuyi na womberi waliya. Shakapanu wawuka na kugenda zawu pashiru panu.