1 Shakapanu kaweriti na mivinja selasini pakanjiti kukolamlima. Na kakolitimlima Israeli kwa shaka sha mivinja alubaini na mbili 2 Sauli kawasyaguliti Waisraeli elufu tatu. Pakati pawu, elufu mbili kaweriti nawa aku Mikimashi muisi ya migongu ya Beteli. Elufu yimu waweriti na Yonatani aku Gibea ya Benjamini. Wantu wamonga woseri yawasigaliti kawawuziyiti, kila muntu ukaya kwakuyi. 3 "Yonatani kayikankala ng'onjeru ya mashonta ga Wafilisti aku Gibea, na Wafilisti woseri wapikiniriti visoweru avi. Hangu Sauli kawagambiriti ntumintumi wagombi lipenga muisi yoseri kuwashema Waebraniya." 4 Waisraeli woseri pawapikiniriti handa Sauli kaweriti kalikomanga liboma lya mashonta lya Wafilisti, na Walifilisti wawakalaliriti nentu Waisraeli, su wantu washemitwi kugenda kuwera pamuhera na Sauli aku Giligali. 5 Wafilisti walijojoniriti kugenda kulikomanga na Waisraeli, pawawera na mbutuka za nkondu elufu tatu, mashonta elufu sita yawendesha mbutuka za nkondu na vipinga vya wamashonta wa magulu wavuwa handa mhanga gwa kumpwani, woseri wakweniti pampindi na kunyawa ng'onjeru yawu aku Mikimashi, uwega wagulawa mshenji mwa Beta Aveni. 6 Waisraeli pawawoniti wankutabika toziya waweriti wankulikomagwa nentu, wanjiti kulififa. Wamonga walififiti mumpanga, wamonga mumalindi, wamonga pakati mumatalawu, wamonga mumasembi na wamonga mumanegu gahera mashi. 7 Wamonga walokiti lushemba Yoridani mpaka muisi ya Gadi na isi ya Gileadi. Kumbiti Sauli kaweriti kankali aku Giligali na wantu woseri wamfatiti agawu pawalendemera. 8 Sauli kamheperiti Samueli kwa mashaka saba, handa Samueli ntambu yakalongiti. Kumbiti Samueli kiziti ndiri aku Giligali na wantu wanjiti kumleka Sauli. 9 Su, Sauli kawagambira wantu, "Munjegeri tambiku yenu ya kulunguziwa tolosu na zilii za ponga." Na yomberi kalaviya tambiku ya kulunguziya tolosu. 10 Katepu pakaweriti kamalira kulaviya tambiku ya kulunguziwa tolosu, Samueli kasokiti. Sauli kagenda kumwanka Samueli na kumlamsiya. 11 Samueli kamkosiya, "Gutenda shishi?" Sauli kamwankula, "pamoniti wantu wandeka na gwenga gwiza ndiri, mushaka shagutakuliti gwankwiza na kayi pamoniti Wafilisti walipanga kala kwa nkondu aku Mikimashi, 12 nilihola handa Wafilisti hawizi kunkomanga aku Giligali. Kayi weriti nankali haneniluwi utanga wa Mtuwa Mlungu. Ndo mana mwona ndaviyi namweni tambiku ya kulunguziya." 13 Samueli kamwankula Sauli, "Gutenda shinkalimahala. Gujimira ndiri gakakugambiziyiti Mtuwa Mlungu, Mlungu gwaku. Handa megujimiri, Mtuwa Mlungu mekautuli mashaka goseri ufalumi waku pampindi pa Israeli. 14 Kumbiti vinu ufalumi waku hapeni ulikali, toziya lagiru lyakakugambiriti Mtuwa Mlungu gujimira ndiri. Mtuwa Mlungu kalisakulira muntu yumonga mweni hakamjimiri kwa moyu gwakuyi goseri na ayu ndo yakamsaguliti kuwera mkolamlima gwa wantu woseri." 15 Samueli kawuka kulawa Giligali na kugenda Gibea muisi ya Benjamini. Na Sauli pakawalangiti wantu wa kaweriti nawa, kawoniti wantu miya sita hera. 16 Sauli na mwana gwakuyi Yonatani pamuhera na wantu yawaweriti pamuhera na yomberi, walikaliti aku Gibea muisi ya Benjamini na Wafilisti wagolosiya ng'onjeru aku Mikimashi. 17 Wafilisti wawukiti mungonjeru zawu kugenda kuwakomanga pawawera na vipinga vitatu. Shipinga shimu shiloliti Ofura muisi ya Shuali. 18 Shipinga shimonga shigenditi Beti Horoni na shimonga shigenda mbaka yayigenda lulalanda lwa Seboimu, kugendera kushiwala.

19 "Shaka ashi kwaheriti kuwambala vyuma muisi yoseri ya Israeli, toziya Wafilisti wafiriti kuwalewalera Waebulaniya na walitendera magumba ama misali." 20 Kila Muisraeli kafiliziwiti kuwagendera Wafilisti kukuwa magembi ga kulimira kwa ng'ombi ama sululu ama liwagu ama hengu. 21 Waisraeli waweriti walipa vipandi viwili kwa kukuwira magembi ga kulimira kwa ng'ombi na shipandi shimu sha madini ga feza kwa kukuwira plawu na sululu. Na beyi ya kukuwa liwagu ama msomeru iweriti shipandi shimu sha shekeli 22 Hangu lishaka lya nkondu kwahera muntu muwamu mwawu yakaweriti pamuhera Sauli na Yonatani yakaweriti na ligumba ama mgoha ira hera Sauli na Yonatani mwana gwakuyi. 23 Wafilisti waperekiti shipinga sha mashonta kugenda kulolera shibokera sha Mikimashi.