1 Shaka ashi, Wafilisti waliwona pamuhera, walikomangi na Waisraeli. Waisraeli wanyawiti malingu gawu aku Ebenezeri na Wafilisti wanyawa malingu gawu aku Afeka. 2 Wafilisti wawakomangiti Waisraeli na pa makomangu makulu, Waisraeli wasinditi. Waisraeli elufu msheshi walaguwitwi kuluwaga lwa makomangu. 3 Wamashonta wa Israeli yawaponikiti pawasokiti mungonjeru, wazewi wa Israeli walongiti, "Ntambu gaa Mtuwa Mlungu kawaleka Wafilisti watukanki leru? Tugendeni tulijegi Lisandiku lya Lipatanu lya Mtuwa Mlungu kulawa Shilu, su kawezi kugenda na twenga kunkondu na kutulopola kulawa wankondu wetu." 4 Hangu, wawatumiti wantumintumi aku Shilu, na womberi wajegiti Lisandiku lya Lipatanu lya Mtuwa Mlungu yakana makakala, mweni kalikala shifalumi pampindi pa viwumbi vyana mbapatiru yawashemwa Makerubi. Na wana wawili wapalu wa Eli, Hofini na Finehasi wiziti pamuhera na Lisandiku lilii lya lipatanu lya Mtuwa Mlungu. 5 Lisandiku lya lipatanu lya Mtuwa Mlungu palisokiti mungonjeru Waisraeli woseri wabotangiti pawanemelera kwa manemu, mpaka isi yoseri itikinyika. 6 Wafilisti pawapikiniriti liziwu ali lya nemeleru walongiti "Mashowanganu goseri aga kungonjeru ga Waeburaniya gana mana gaa?" Pawavimaniti handa Lisandiku lya Lipatanu lya Mtuwa Mlungu liweriti lisoka kungonjeru zawu, 7 Wafilisti watiriti walonga, "Toziya wamlungu wiza kungonjeru yawu! Shondi twenga! Shitwatila handa ashi hasheni lawiri! 8 Shondi twenga! Ndo gaa yakafira kutulopola kulawa kwa wamlungu awa yawana makakala? Awa ndo wamlungu yawawalagiti Wamisri kwa kila ntambu ya makomangu kushiwala. 9 Vinu, mwenga Wafilisti, mlipananani moyu. Muweri, wagangamala namwiza kuwera wamanda wa Shiebrania handa womberi ntambu yawaweriti wamanda wa twenga. Muweri wagangamala handa wapalu na kulikomanga." 10 Su Wafilisti walikomanga nkondu na Waisraeli wasinditi na kutira kila muntu ukaya kwakuyi. Lishaka ali kuweriti na malaga makulu toziya mashonta elufu selasini yawagenda kwa magulu wa Israeli walagitwi. 11 Lisandiku lya lipatanu lya Mlungu litolitwi na Wafilisti kwa makakala na wana wawili wapalu wa Eli, Hofini na Finehasi walaguwa.

12 Lishaka liraali, muntu yumu gwa likabila lya Benjamini katugiti kulawa kulongolu gwa makomangu mpaka Shilu agawu nguwu zakuyi paziwera zidegekanga na pakawera na lidikudiku pamtuyi gwakuyi kulanguziya hinginika yakaweriti nayi. 13 Eli, kaweriti na lyoga mumoyu kuusu Lisandiku lya Mtuwa Mlungu, kaweriti kalikala mushiti shakuyi, kumpeku mwa njira pakalola. Muntu ulii pakasokiti kumjini na kutakula visoweru avi, wantu woseri wa mji agu waliliti kwa kubotanga. 14 Eli pakapikiniriti liziwu lya kulila, kakosiya, "Umatu awu wa shishi?" Muntu ulii kagenda kalongola kwa Eli su kumgambira visoweru avi. 15 Shaka ashi, Eli kaweriti na vinja tisini na nani na masu gakuyi gaweriti gana lwisi. 16 Muntu ulii kamgambira Eli, "Ntuga kulawa munkondu leru." Eli kamkosiya, "Mwana gwangu, vitwatira viweriti vyahashi aku?" 17 Uli yakajegiti visoweru kalonga, "Waisraeli wawatira Wafilisti. Kuwera na malaga makulu muwamu mwa Waisraeli. Nentu ga goseri, wana waku wawili, Hofini na Finehasi, walaguwa, na Lisandiku lya Lipatanu lya Mlungu litolwa kwa makakala."

18 Muntu ayu pakakantiti Lisandiku lya Mlungu, Eli kaguwiti lugali kulawa kushiti shakuyi kumbeku kuligomi likulu. Eli pakaguwiti singu yakuyi imegekiti toziya kaweriti Mzewi na kanenepiti, na yomberi kahowa. Eli kaweriti mtoza gwa Israeli kwa shaka sha mivinja alubaini.

19 Kayi ilawiriti hangu, mganafu gwakuyi Eli, mdala gwa Finehasi, shaka ashi kaweriti kana yinda, na shaka shakuyi sha kulera shiweriti sha pakwegera. Pakapikiniriti handa Lisandiku lya Lipatanu litolwa kwa makakala na handa mganafu gwakuyi, na mpalu gwakuyi kahowa, mala yimu utama umwanjiti, na kulera kumbiti utama uweriti ukalipa. 20 Su, pakaweriti kankuhowa, wadala yawaweriti wankumtanga wamgambiriti, "Nagutira, toziya gulera mwana mpalu." Kumbiti yomberi kankula ndiri shintu, pota kuwapikinira. 21 Yomberi kamshema mwana gwakuyi Ikabodi, mana yakuyi, "Uweru wa Mlungu uwuka Israeli," pakawera na mana handa Lisandiku lya Lipatanu liweriti litoluwa kwa makakala, kayi mganafu gwakuyi na mpalu gwakuyi, woseri wahowa. 22 Kalonga, "Uweru wa Mlungu uwuka Israeli toziya Lisandiku lya Lipatanu lya Mtuwa Mlungu litoluwa kwa makakala."