1 Vinu, Samueli kahowiti, na Waisraeli woseri wajojonika su kumdaya. Wamsira ukaya kwakuyi aku Rama.

Shakapanu Dawudi kagenda zakuyi kundundu Kuparani. 2 Kuweriti na muntu yumu aku kumjini Maoni mweni kaweriti mshuuzi gwa kondolu kumjini Karimeli. Aku Karimeli kafugiti kondolu wakuyi na kawamoga mibahila. Kaweriti mlunda mali nentu. Kaweriti na kondolu elufu tatu na mbuzi elufu yimu. 3 Muntu ayu wamshemiti Nabali na mdala gwakuyi kashemitwi Abigaili. Abigaili kaweriti mdala kana mahala na kaherepa. Kumbiti Nabali kaweriti muntu gwa shuki na mkondola kayi kaweriti gwa lukolu lwa Karebu.

4 Su, Dawudi pakaweriti kundundu aku kapikiniriti handa Nabali kaweriti kankuwamoga kondolu wakuyi mibahira aku Karimeli. 5 "Hangu, kawatuma wantemba lilongu, kawagambira, mgendi kwa Nabali aku Karimeli mwakamlamsiyi." 6 Mwakamgambiri hangu, "Dawudi kakulamsiyi. Ponga iweri kwa gwenga, kwa walongu waku na woseri yaguwera nawa. 7 Mpikinira handa gwankuwamoga mibahila kondolu waku nfira guvimani handa walolera waku waweriti pamuhera na twenga na twenga hapeni tutendi madoda. Kayi shaka shoseri pawaweriti pamuhera na twenga kumjini Karimeli, wakosa ndiri shoseri. 8 Paguwakosiya, hawakugambili. Vinu nikuluwa wantemba wangu awa wapati shibali kulongolu kwaku, toziya tusoka shaka sha msambu. Shondi guwapanani shoseri shaguwera nashi wantumintumi waku awa na neni mwana gwaku Dawudi." 9 Wantemba walii wa Dawudi wagenditi na kumgambira Nabali ntambu yawalagaliritwi na Dawudi. Shakapanu wahepera shidididni. 10 Nabali kawankula wantumintumi wa Dawudi, "Dawudi ndo gaa? Mwana gwa Yese ndo gaa? Mashaka aga kwana wantumintumi wavuwa yawawatira watuwa wawu. 11 Hashi, ntoli mabumunda gangu, mashi gangu na vinofu vyaniwatuliriti wamoga mibahila ya kondolu wangu na kuwapanana ata mani kwawalawa."

12 Su, wantemba wa Dawudi walii wawuyiti na kumgambira Dawudi ntambu yawagambilitwi. 13 Hangu Dawudi kawagambira wantu wakuyi, "Kila muntu na kalitawi ligumba lyakuyi mshunu." Kila muntu kalitawa ligumba lyakuyi, na Dawudi viraa kalitawa ligumba lyakuyi' wantu miya msheshi wamfata Dawudi na wantu miya mbili wasigala na visanka.

14 Mndemba yumu gwa Nabali, kamgambira Abigaili, mdala gwakuyi Nabali, "Dawudi katuma walagilagi kulawa kundundu su kumlamsiya mtuwa gwetu. Kumbiti yomberi kawawigiriliti. 15 Kumbiti wantu awa waweriti waheli nentu kwa twenga, watutendera ndiri madoda, na shaka shoseri patuweriti nawa aku kundundu kwahera shoseri shashihowiti. 16 Kwa twenga, waweriti walolera pashiru na paliwala shaka shoseri patuweriti twankulolera kondolu. 17 Vinu guliholi kuusu mlandu agu na gwamuwi lya kutenda. Mlandu agu guweza kujega vitwatira kwa mtuwa gwentu na walongu wakuyi woseri. Yomberi ndo muntu mndewu na kwahera muntu yakaweza kuyowera na yomberi."

18 Abigaili katenda kalongola, katola mabumunda miya mbili, mihaku yalikuli miwili ya divayi, mikunguwi miya ya zabibu ziyuma, mabumunda ga tini miya mbili, na vintu vyoseri avi kavipapiziya mpunda. 19 Kamgambira mndemba gwakuyi ulii, "Gulongoleri! Neni hanikufati." Kumbiti kamgambira ndiri mpalu gwakuyi shoseri. 20 Pakaweriti kankuselera, kakwena punda gwakuyi na kushigwa na lugongu uwega wumu, kaliwona vumu na Dawudi na wantu wakuyi pawawera wankugenda uwega kwakalawiti. 21 Dawudi kaweriti kankulihola, "Neni nweriti nankulolera lunda yoseri ya Nabali kundundu pota mota yoseri na kwahera shintu shakuyi shoseri shashihowiti na yomberi kandipa madoda kwa maheri ganimtenderiti. 22 Mlungu kandagi neni payiwera shirawu mandawira haneniwalagi wapalu wakuyi woseri." 23 Abigaili pakamwoniti hera Dawudi, kasuluka kalongola kulawa kumpindi kwakuyi na kung'ong'onala kulongolu kwa Dawudi mpaka sheni shakuyi shishingula pasi. 24 Kalyasiti pamagulu ga Dawudi na kumgambira, "Mtuwa gwangu, likosa lyoseri liweri kwa neni hera. Nduwa noweri na gwenga neni ntumintumi gwaku. Nikuluwa gupikinili visoweru vya ntumintumi gwaku. 25 Nagumholera Nabali mweni ndo muntu mdoda toziya ntambu yaliwera litawu lyakuyi Nabali, ndo ntambu yakawera. Yomberi wamshema Nabali na nakaka yomberi ndo muntu mngali mahala. Mtuwa gwangu, wantemba waku paguwatumiti, neni ntumintumi gwaku nuwawoniti ndiri. 26 Su mtuwa gwangu, nililapa kwa Mtuwa Mlungu yakawera Mkomu na ntambu yakawera mkomu, handa toziya Mtuwa Mlungu kakulewelera naguwuzilira kwa kwita mwazi mweni gwenga, guwaleki wankondu waku na woseri walii yawakufilira madoda waweri wahera mahala gambira Nabali. 27 Mtuwa gwangu, nikuluwa gutoli lifupu ali lyanakujegeriti na guwapanani wantemba yawakufata. 28 Nduwa gunekiziyi neni ntumintumi gwaku. Mtuwa Mlungu hakakutendi guweri mfalumi na wiwuka viraa, gwenga mtuwa gwangu, gwankulikomanga nkondu ya Mtuwa Mlungu, shaka shoseri sha ukomu waku guwoneka na shidoda shoseri. Ama shaka shoseri sha ukomu waku hapeni gutendi shoseri shashiwera shikontola. 29 Pawalawira wantu wakufata na kufira kuwagamiziya ukomu waku, Mtuwa Mlungu, Mlungu gwaku, hakauponiziyi ukomu waku pamuhera na yawawera wakomu. Kumbiti ukomu wa wankondu waku hauwasiluwi kutali kalongola, handa muntu yakasa libuwi kwa vombelo. 30 Pa Mtuwa Mlungu kakutendera maheri goseri gakakugambiliti na kukusyagula kuwera mkolamlima gwa Israeli, 31 gwenga mtuwa gwangu, hapeni guweri na toziya ya kujuta pota kulipikinira vidoda kulawirana na kwita mwazi pota toziya ya kuwuzilira. Kumbiti, mtuwa gwangu, Mtuwa Mlungu pakawera kakutendera maheri aga, nikuluwa gunholi neni ntumintumi gwaku."

32 Dawudi kamgambira Abigaili, "Kakwiswi Mtuwa Mlungu, Mlungu gwa Israeli, yakakutumiti leru kuliwona na neni. 33 Nonga mayagashi Mtuwa Mlungu yakakupananiti luhala kwa kundewelera kuwera na likosa lya kwita mwazi na kuliwuzilira neni namweni. 34 Kwa nakaka, Mtuwa Mlungu gwa israeli, kandewelera naniwalaga. Megutendi ndiri kalongola kwiza kuliwona na neni, kwa nakaka, shirawu mandawira kwahera mpalu yoseri gwa Nabali na wantu wakuyi mewasigali wakomu." 35 Shakapanu, Dawudi kanka vintu vyoseri vyeni Abigaili kaweriti kamjegera, kamgambira Abigaili, "Guwuyi ukaya kwaku kwa ponga. Guloli, mpikinira gagutakuliti na kuluwa kwaku nikwanka."

36 Abigaili pakawuyiti ukaya, kamwoniti Nabali kankutenda msambu mkulu ukaya kwakuyi handa gwa mfalumi. Nabani kaweriti kalinemiziya nentu mumoyu toziya kaweriti kalowera nentu. Hangu kamgambira ndiri shoseri mpaka mandawira. 37 Mandawira, Abigaili pakawoniti mpalu gwakuyi divayi imuwuka, kamgambira mirandu yoseri na palapalii Nabali kalilimuka na kaleweleka, kawera handa libuwi. 38 Mashaka lilongu shakapanu, Mtuwa Mlungu kamkomiti Nabali kahowa.

39 "Dawudi pakapikiniriti handa Nabali kahowa, kalonga, Kakwiswi Mtuwa Mlungu mweni kamwuzilira Nabali kwa kunigiranga na yomberi Mtuwa Mlungu kanewelera neni ntumintumi gwakuyi kutenda makontola. Mtuwa Mlungu kamtoza Nabali kwa ukondola wakuyi. Shakapanu Dawudi katumiti wantu su wamyugiri Abigaili kaweri mdala gwakuyi." 40 Wantumintumi wa Dawudi pawasokiti kwa Abigaili aku Karimeli, wamgambira, "Dawudi katutuma kukutola su guweri mdala gwakuyi."

41 Abigaili kagolokiti na kung'ong'onala kulongolu kwawu mpaka pasi, kalonga, "Neni ndo ntumintumi hera na kala kugulula magulu ga wantumintumi wa mtuwa gwangu." 42 Abigaili katenditi kalongola, kagoloka na kukwena pampindi pa punda gwakuyi, pakalifata na wantumintumi wakuyi wadala mhanu, kagenda na wantumintumi wa Dawudi na yomberi kawera mdala gwa Dawudi.

43 Kayi Dawudi kaweriti kamyuga Ahinoamu kulawa Yezireeli. Hangu wawili awa wawera wadala wakuyi. 44 Shaka ashi, Sauli kaweriti kamyugiziya mhinga gwakuyi mikali, mweni kaweriti mdala gwa Dawudi, kwa Paliti mwana gwa Laishi, kulawa mji gwa Galimu.