1 Pa mwezi gumu kupita mfalumi Nahashi gwa Amoni kagenditi na mashonta wakuyi, na kuguzyengeta mji gwa Yabeshi Gileadi. Wenikaya wa mji gwa Yabeshi Gileadi wamgambira Nahashi, "Gutendi lipatanu na twenga, na twenga hatukutenderi." 2 Kumbiti kawagambira, "Hantendi majimiranu na mwenga handa pamjimira. Handa hanimwipi kila yumu gwenu lisu lyakuyi lya kumliwu, hangu haniwasoniziyi Waisraeli woseri kulongolu kwa maisi gamonga." 3 Wakulu wa Yabeshi wamgambira, "Gutupanani shipindi sha mashaka saba su tuwatumi walagilagi muisi yoseri ya Israeli. Handa kwahera muntu yoseri gwa kutulopola, hatulilaviyi twaweni kwa gwenga." 4 Shaka walagilagi walii pawasoki kumjini Gibea, kwakalikaliti Sauli, watakula visoweru avi na wantu woseri wanja kulira kwa kubotanga.

5 Vinu, Sauli kaweriti kankulawa kulilambu pakawera na ng'ombi wakuyi, kakosiya, "Wantu wana shishi? Toziya gaa walira?" Wamgambira visoweru vyawajegiti walagilagi kulawa Yabeshi. 6 Mala, Sauli pakapikiniriti visoweru avi, Rohu ya Mlungu imwizira kwa likakala na yomberi kakalala nentu. 7 Katola wang'ombi washipalu wawili kawahanjangahanjanga vipandivipandi, kawalagalira walagilagi wavipitiziyi kila pahala muisi ya Israeli pawalonga, "Muntu yoseri yakalema kumfata Sauli na Samueli munkondu, wang'ombi wa shipalu wakuyi hawatendwi hangu." Lyoga liwingira Wasraeli toziya ya Mtuwa Mlungu mekawezi kutenda. Hangu woseri walawiti kwa pamuhera. 8 Sauli pakawajojoniriti Waisraeli aku Bezeki kaweriti na wantu laki tatu kulawa Israeli na elufu selasini kulawa Yuda. 9 "Wawagambira walagilagi walii yawalawiti kulawa Yabeshi, Muwagambiri hangu wantu wa Yabeshi Gileadi. Shirawu, shaka mshenji paguwera gukalipa, hamuweri mlopuluwa." Wantu wa Yabeshi pawapatiti visoweru avi wanemeleliti nentu. 10 Hangu, wamjongera Nahashi pawamgambira, "Shirawu hatulilaviyi kwa gwenga na gwenga hagututenderi shoseri shaguwona ndo shiheri." 11 Pashiru palii, Sauli kawabagula wantu muvipinga vitatu. Mandawira putiputi, wingira mungonjeru ya wankondu, na kuwakangala Wamoni. Kusoka paluwala wankondu wavuwa waweriti walikituluwa kutali. Walii yawaponikiti wapalasika vuluvulu, kila muntu katugira kwakuyi.

12 Waisraeli ndo wamgambira Samueli, "Wa koshi wantu walii yawatakuliti Sauli nakawera mfalumi pampindi petu? Gutujegeri wantu awa, tuwalagi."

13 Kumbiti Sauli kawagambira, "Kwahera muntu yoseri hakawalagi leru, toziya mulishaka ali, Mtuwa Mlungu kayilopuziya Israeli." 14 Samueli kawagambira, "Tugendeni woseri Giligali na tutendi majimiranu ga syayi tumbweri kayi Sauli kuwera mfalumi." 15 Wantu woseri wagenda Giligali na pawasokiti aku, watenda majimiranu handa Sauli kaweri mfalumi kulongolu kwa Mtuwa Mlungu. Na Sauli pamuhera na wantu woseri wa Israeli wanemelera Nentu.