1 Su, Wafilisti walikomanga nkondu na Waisraeli, na Waisraeli wavuwa wahowiti Sauli na wana wakuyi na Waisraeli wamonga wawatiriti Wafilisti. 2 Wafilisti wamzyengeta Sauli na wana wakuyi, shakapanu wawalaga Yonatani na Abinadabu na Maliki Shua. 3 Nkondu iweriti nkulu nentu kwa Sauli. Waguma misali pawamwoniti wamtenda nentu. 4 Sauli pakamgambiriti muntu yakamjegeriti vintu vya kulikomangira, "Gusomoli ligumba lyaku gunsomi nfuwi, su wantu awa yawawingizitwi ndiri jadu nawiza kunsoma ligumba na kunjongera." Kumbiti yakamjegiti vintu vya kulikomangira vya Sauli kajeriti ndiri toziya katiriti nentu. Hangu Sauli katoliti ligumba lyakuyi mweni na kuliguwira. 5 Shakapanu ulii yakajegiti vintu vya kulikomangira pakawoniti handa Sauli kahowa na yomberi viraa kaguwiriti ligumba lyakuyi, kahowa handa Sauli. 6 Hangu ndo Sauli ntambu yakahowiti na wana wakuyi watatu, viraa na muntu yakamjegiti vintu pamuhera na wantu wakuyi woseri mulishaka lilaa limu ali. 7 Na womberi yawaweriti uwega wa pili wa lulalanda na wamonga yawaweriti wa kwagulawa mshenji mwa lushemba Yoridani pawawoniti waisraeli watira na Sauli na wana wakuyi wahowa, wayihamiti miji yawu, watira. Wafilisti wagenda na kalikala mumiji ayi. 8 Shirawu yakuyi, Wafilisti pawagenditi kutola vintu vya awa yawahowiti wawoniti mitugulu ya Sauli na wana wakuyi kulugongu Giliboa. 9 Walikituliti singu ya Sauli na kumvula vintu vya kulikongira vyakuyi, shakapanu wawatumiti walagilagi muisi yawu yoseri ya Wafilisti kubwera visoweru kunumba za vinyagu vyawu na kwa wantu. 10 Vintu vyakuyi virii vya kulikomangira wavituliti mnumba mwa Maashitaroti, shakapanu wakongera nshimba yakuyi kushibambaza sha mji gwa Beti Sheani. 11 Kumbiti wenikaya wa mji gwa Yabeshi Gileadi pawapikiniriti Wafilisti ntambu yawamtendiriti Sauli, 12 makambaku woseri wawuka, wagenda mwanja pashiru poseri, wayiwusiya nshimba ya Sauli na nshimba za wana wakuyi kulawa kushibambaza sha Beti Sheani, wiza nazi mpaka Yabeshi na kuzilunguziya aku. 13 Shakapanu, wayitola vifupa yawu na kuyisira pasi pa mtera gwa mkwashu aku Yabeshi na womberi woya kuliya shiboga kwa mashaka saba.