1 Pakahowiti kala Sauli, Dawudi kawuyiti pakawakankiti kala Waameleki, kalikaliti Sikilagi kwa mashaka mawili. 2 Lishaka lyalifatiti, muntu yumu kulawa kulugonjeru lya Sauli, nguwu yakuyi payiwera kayideganga kwa kulanguziya hinginika na pakawera na lidiku kumtuwi kamgenderiti Dawudi. Pakasokiti kwa Dawudi, kaliyasiti pasi kulongolu kwakuyi kamsuntamalira. 3 Dawudi kamgambira, "Gulawa koshi?" Na yomberi kamgambira,

"Ntoloka kulawa lugonjeru lwa Waisraeli."

4 Dawudi kamgambira,

"Gung'ambili vitwatira vyaviweriti aku." Muntu ulii kamwankula, "Wantu wetu wayituga nkondu na wamashonta wetu wavuwa walaguwa. Nentu ya aga, Sauli na mwana gwakuyi Yonatani viraa walaguwa."

5 Dawudi kamkosiya mntemba ulii, "Guvimana hashi handa Sauli na mwana gwakuyi wahowa?"

6 Mntemba ulii kankula, "Ilawira paweriti kulogongu Giliboa. Nimwoniti Sauli kayegemera mgowa gwakuyi na mbutuka ya wakwena farasi ya wankondu wakuyi iweriti pakwegera nayu. 7 Sauli pakaloliti kumbeli, kamonoti, kanshema. Nitika, neni panu! 8 Yomberi kankosiyiti, gwenga gwa gaa? Neni nimgambira, neni na Mmaleki. 9 Shakapanu Sauli kalonga, gusegeleri gundagi toziya ntenduwa nentu na kutama kukalipa. Kumbiti ndo nankali mkomu. 10 Hangu, ng'enditi pakwegera na yomberi na kumlaga, toziya nivimana handa pakaguwa pasi hakahowi. Kumbiti lijenjeri lyaliweriti pamtuwi pakuyi na likembi lyaliweriti mmawoku mwakuyi, vyoseri nikujegera gwenga, mtuwa gwangu."

11 Dawudi kakola nguwu zakuyi na kuzipapula kwa kulangaziya hinginika nentu. Ata wantu yawaweriti pamuhera na Dawudi watenditi ntambu iraa. 12 Walira na kudaya, na koya kuliya mpaka pamihi toziya ya kulaguwa kwa Sauli na mwana gwakuyi Yonatani na kuwalilira wantu wa isi ya Israeli weni ndo wantu wa Mlungu, toziya wantu wavuwa walagitwi kunkondu.

13 Dawudi kamkosiya mntemba ulii yakamjegeriti visoweru, "Gulawa koshi?"

Yomberi kankula, "Neni Mmaleki, kumbiti nilikala muisi yaku handa mhenga."

14 Dawudi kamkosiya, "Iweriti haa gwenga gutira ndiri kutalipisiya liwoku lyaku na kumlaga muntu yakasyagulitwi na Mtuwa Mlungu kwa kuswagwa lipaki?" 15 Shakapanu, Dawudi kamshema yumu gwa wantemba wakuyi kamgambira, "Gumlagi muntu ayu!" Mntemba ulii kamkoma Mmaleki ulii na kumlaga. 16 Dawudi kalonga, "Mlandu agu haguweri gwaku gamweni, toziya gulilanguziya gamweni pagulonga, nimlaga muntu yakasyagulitwi na Mtuwa Mlungu kwa kuswagwa lipaki."

17 Dawudi kimbiti lwimbu lwa kudaya toziya ya Sauli na mwana gwakuyi Yonatani. 18 Dawudi kalongiti wantu wa Yuda wafundwi lwimbu alu lwa kudaya lweni lulembwa mushitabu sha Yashari. Dawudi kimba hangu.

19 "Mumigongu ya Israeli, wakulu wetu walaguwa.

Mashonta wetu wagagamala waguwa!"

20 "Shitwatira ashi namwagambira wantu wa mji gwa Gati

pota muvinjira vya mji gwa Ashikeloni.

Hera hangu, wadala wafilisti hawanemeleri,

Wahinga yawamumana ndiri Mlungu, hawanemeleri."

21 "Mwenga migongu ya Giliboa,

namuwera na mangami ama mvula nayitowa pambindi penu.

Pota malambu genu mashaka goseri nagalaviya shoseri.

Toziya ngawu za wagangamala zilekwa aku mukusoniziwa,

Ngawu ya Sauli iswagitwi ndiri lipaki."

22 Misali ya "Yonatani yendeleyiti kulaga,

ligumba lya Sauli lyendeleye kulaga.

Mashaka goseri kalagiti wavuwa

Yina, ndagiti wagangamala."

23 "Sauli na Yonatani,

waweriti pamuhera

Makaliru na kuhowa viwabagula ndiri,

waweriti wayewuka handa ndapu

nakaka, wana likakala kuliku simba."

24 "Mwenga wahinga wa Israeli, mumliliri Sauli!

Kawavalasiyiti nguwu nsheri za ukulu,

kazilembiziyiti nguwu zyenu kwa zahabu."

25 "Ntambu gaa wagangamala waguwiti!

Wahowa pawawera mumakomangu.

Yonatani wamlaga kulugongu."

26 "Moyu gwaku gwana hinginika toziya yaku, mlongu gwangu Yonatani.

Guwera kwa neni mashaka goseri muntu gwa kufiliziya!

Ufiru waku kwa neni uwera wa kulikankasha,

wa kulikangasha kuliku ufiru wa mdala."

27 "Mashonta wagangamala waguwa,

na vintu vyawu vya kulikomangira konkondu vilekwa, vyahera lihengu."