1 Kuweriti na nkondu ya shipindi shitali pakati pa wantu yawamjimiliti Sauli na walii yawamjimiliti Dawudi. Kumbiti Dawudi kongeriti kupata likakala nentu na nentu na Sauli waweriti wahera likakala nentu.

2 Wana wapalu wa Dawudi wawiwukiti aku Hebroni, gwa kwanja kaweriti Amunoni mawu gwakuyi kaweriti Ahinoamu kulawa Yezireeli, 3 mwana gwa pili kaweriti Kileabu, mawu gwakuyi kaweriti Abigaili mkenja gwa Nabali kulawa Karimeli, gwa tatu kaweriti Abisalomu, mawu gwakuyi kaweriti Maaka, mhinga gwakuyi Talimai mfalumi gwa Geshuri. 4 Mwana gwa msheshi kaweriti Adoniya, mawu gwakuyi kaweriti Hagiti, mwana gwa mhanu kaweriti Shefatia, mawu gwakuyi kaweriti Abitali. 5 Mwana gwa sita kaweriti Itereamu, mawu gwakuyi kaweriti Egila, Wadala wakuyi Dawudi wamwiwuliriti wana woseri awa pakaweriti aku Hebroni.

6 Nkondu payendereyiti pakati pa wamashonta wa Dawudi na wantu wa Sauli, Abineri kongeriti kuligangamaziya.

7 Sauli kaweriti na mdala yumu gwa kunja yawamshema Misipa, mwana gwa Aya. "Su, shipindi shimu, Ishibosheti kamkosiya Abineri, ntambu gaa gugonja na mdala gwa kunja gwa tati gwangu?" 8 Abineri kakalaliti nentu kulawirana na visoweru vya Ishibosheti, kalonga, "Hashi, gulihola neni weza kumgalambuka Sauli? Hashi, gulihola neni nauwega wa Yuda?" Guloli, neni wera mwaminika kwa kaya ya tati gwaku Sauli na walongu wakuyi na waganja wakuyi nikutenda ndiri gusindi na Dawudi mpaka leru. "Ata hangu, leru gumona kuwera nana likosa toziya ya mdala! 9 Mlungu na kantagi pawera neni hapantendi goseri geni Mlungu kamgambiriti hakatendi kwa Dawudi. 10 Mlungu kamlapiliti Dawudi kuwera hakauhamiziyi ufalumi kulawa kwa Sauli na kumpanana yomberi. Yomberi hakakolimlima Israeli na Yuda kulawa Dani aku kushana mpaka Beya Sheba aku kusika!" 11 Ishibosheti kaweza ndiri kulonga shintu, toziya kaweti kamtira nentu Abineri.

12 Su, Abineri katuma walagilagi kwa Dawudi, aku Hebroni wakamgambiri, "Hashi, isi ayi hakakolimlima gaa, vinu gutendi lipatanu na neni na neni hanikutangi kuyitenda Israeli yoseri guyikolimlima gwenga."

13 Dawudi kankula, "Nakaka, hantendi lipatanu na gwenga. Kumbiti nikufira shitwatira shimu handa pamberi hagweni moni gunjegeri uti Mikali mhinga gwa Sauli. Shakapanu hatuliwoni." 14 Dawudi viraa katuma walagilagi kwa Ishibosheti mwana gwa Sauli pakalonga, "gumbuzilili mdala gwangu Mikali yanimyugiti kwa vinduli miya yimu vya Wafilisti." 15 Su, Ishibosheti katumiti wantu wamtola Mikali kulawa kwa mpalu gwakuyi, Palitieli mwana gwa Laishi. 16 Kumbiti Palitieli kagenda pamuhera na mdala gwakuyi agawu pakalira njila yoseri mpaka aku Bahurimu. Abineri kamgambira Palitieli, "Guwuyi ukaya." Na yomberi kawuya,

17 Abineri kayowera na wazewi wa Israeli, kawagambira, "Kwa shaka shitali muweriti mmufira Dawudi kaweri mfalumi gwenu. 18 Vinu mtendi aga toziya Mtuwa Mlungu kamgambiliti hangu Dawudi, kwa liwoku lyaku gwenga Dawudi ntuminintumi gwangu, haniwalopoli wantu wangu wa Israeli kulawa kwa Wafilisti na kulawa wankondu wawu wamonga." 19 Abineri viraa kayowera na wantu wa likabila lya Benjamini, shakapanu wagenda mpaka Hebroni kumgambira Dawudi kuusu galii wantu woseri wa Israeli na likabila lyoseri lya Benjamini shawapataniti kutenda.

20 Abineri pakamgendereti Dawudi, kaweriti na wantu ishilini, Dawudi kawatandiriti msambu na kuwapanana shiboga na virandu. 21 Pa shiboga kupera Abineri kamgambira Dawudi, "Neni vinu hang'endi mtuwa gwangu mfalumi. Hawizi na kutenda majimiranu na gwenga, su guweri mfalumi gwawu na gwenga haguwakolimlima woseri ntambu yagufira." Dawudi kamgambira nembuka Abineri na yomberi kawuka kwa ponga.

22 Shakapanu, Yoabu na wantu wamu wa Dawudi wawuyiti kulawa mumakomangu, wajega lopola zivuwa. Kumbiti Abineri kawera ndiri pamuhera na Dawudi aku Hebroni toziya Dawudi kaweriti kamgambiriti nembuka kagendi zakuyi na yomberi kawuka kwa ponga. 23 "Yoabu pakawuyiti na lishonta lyakuyi lyoseri lyakaweriti nalu, kagambiluwa handa Abineri mwana gwa Neri, kaweriti kiza kumwona mfalumi Dawudi na yomberi kalonga nembuka kagendi zakuyi na Abineri kawuka kwa ponga." 24 Yoabu kamgenderiti mfalumi na kumgambira, "Vinu gutenda shishi? Guloli Abineri kiziti kwaku, ntambu gaa gumleka kagenda? 25 Hashi, guvimana kuwera Abeneri mwana gwa Neri kiziti kukupayira? Kiziti su kavimani makakala ga lishonta lyaku na goseri gagutenda!"

26 Yoabu pakalawiti kuyowera na Dawudi, katumiti walagilagi wambati Abineri na womberi wamwona kulinegu lya Sira na kumwuziya, kumbiti Dawudi kavimaniti ndiri shitwatira ashi. 27 Abineri pakawuyiti Hebroni, Yoabu kamtola na kumwingiziya kushumba sha mngati kuligomi likulu handa kafira kuyowera na yomberi kwa bada. Shakapanu Yoabu kamsoma Abineri kumtima toziya Abineri kaweriti kamlaga Asheri mlongu gwakuyi na Abineri kahowa. 28 Shakapanu Dawudi pakapikiniriti visoweru avi kalongiti, "Neni na ufalumi wangu twahera likosa kulongolu kwa Mtuwa Mlungu kwa kulaguwa kwa Abineri mwana gwa Neri. 29 Malaguwa aga hagaweri pampindi pa mtuyi gwa Yoabu na kwa kaya yoseri ya tati gwakuyi! Nakamu hakuweri na muntu munumba ya Yoabu yakana ulweri kulawa ufira, ama ungumbula ama yakatyangira luhonga ama yakaguwa kwa ligumba ama yakahera shiboga!" 30 Yoabu na mlongu gwakuyi Abishai wamlagiti Abineri toziya kaweriti kamlaga mlongu gwawu Asaheri shaka sha nkondu aku Gibeoni.

31 Shakapanu, mfalumi "Dawudi kamgambira Yoabu na walii woseri yawaweriti pamuhera na yomberi, wapapuli nguwu zawu, wavala nguwu za mafafa su wamdayiliri Abineri. Shaka pawagenditi kufintira, mfalumi Dawudi kagendegenditi kumbeli kumashera." 32 Abineri kafintilitwi aku Hebroni na mfalumi kadayiti kwa liziwu pakawera kumbeku kulisembi, viraa wantu woseri watenditi ntambu iraa ayi. 33 Mfalumi kamdayilira Abineri pakalonga:

"Hashi, iwera hashi Abineri kahowa gambira mngalimahala?

34 Mawoku gaku gatawalirwa ndiri

na magulu gaku gatawalilwa ndiri pingu.

Kahowa handa muntu yakalagitwi na wakontola!"

Na wantu woseri wamliliriti kayi.

35 Shakapanu, wantu woseri wagenditi kumzyangazya Dawudi kalii shintu shoseri shaka shashiweriti shankali paliwala. Kumbiti Dawudi kalirapa kamgambira, "Mlungu na kandagi pandawalira shintu shoseri mpaka mshenji pagwinala!" 36 Wantu woseri yawawoniti vitwatira avi na womberi wafiliziwitwi, handa kila shintu shakatenditi mfalumi shiwafiliziyiti. 37 Hangu, lishaka lilii, Waisraeli woseri wavimaniti handa iweriti ndiri nfiru ya mfalumi Dawudi kumlaga Abineri mwana gwa Neri. 38 Mfalumi Dawudi kawagambiriti wantumintumi wakuyi, "Hashi, muvimana ndiri kuwera leru mkulu na muntu yakamanikana nentu kahowa mu Israeli? 39 Tembera swagwa lipaki su weri mfalumi, kumbiti leru neni nahera likakala. Awa wana wa Seruya ndo wandewu nentu. Mtuwa Mlungu na kawatozi teratera na ukontola wawu!"