1 Mumwanjiru gwa shinja sha syayi, shaka shilii wafalumi pawagenditi kunkondu, Dawudi kamlagaliliti Yoabu na wakulu wakuyi pamuhera na Waisraeli woseri kulikoma na womberi wawakomiti na wawalopuliti Waamoni na kuluzyengeta mji gwa Raba. Kumbiti Dawudi kasigala Yerusalemu.

2 Lishaka limu, shaka sha pashimihi, Dawudi kimuka kushitanda kagenda kulitala lya liboma lyakuyi. Pakaweriti kankutyanga aku kumpindi, kamwona mdala yumu yakoga mashi, mdala ayu kaweliti kaherepa nentu. 3 Dawudi kamlagaliliti muntu kumkosiya mdala ayu ndo gaa. Muntu ayu kamgambira Dawudi "Mdala ayu ndo Betisheba mhinga gwa Eliabu na mdala gwa Uria muntu gwa likabila lya Hiti." 4 Su, Dawudi kawalagalila walagilagi wamjegi. Betisheba kiza kwa Dawudi, Dawudi kagonja nayu, mdala ayu kaweriti kalipunga hera kulawa mumashaka gakuyi ga mwezi shakapanu kawuya ukaya kwakuyi. 5 "Mdala ayu kapata yinda na yomberi katuma visoweru kwa Dawudi kuwera handa kana yinda yakuyi."

6 Su, Dawudi kawalagalila wantu wamjegeri Yoabu ulagilagi yaulonga hangu, "Gumjegeri Uria muntu gwa likabila lya Hiti kwaneni." Na yomberi kamlagalila Uriya kwa Dawudi. 7 Uriya pakasokiti kwakuyi, Dawudi kamkosiyiti visoweru vya Yoabu na wantu woseri na ntambu ya nkondu. 8 Shakapanu Dawudi kamgambira Uriya, "Guwuyi ukaya kwaku gwakwoyeri." Uriya kalawa ukaya kwa mfalumi na mala mfalumi kamjegera lifupu. 9 Kumbiti Uriya kawuyiti ndiri ukaya kwakuyi, ila kagonja pamuhera na walolera woseri wa mtuwa gwakuyi kuligomi likulu. 10 Dawudi pakagambilitwi handa Uria kagenda ndiri ukaya kwakuyi, Dawudi kamkosiya Uria, "Gwenga gulawa mwanja, ntambu gaa gugenda ndiri ukaya kwaku?"

11 Uria kamwankula Dawudi "Lisandiku lya patanu lya Mtuwa Mlungu, pamuhera na mashonta woseri wa Israeli na Yuda walikala kuvisasa kunkondu. Mtuwa gwangu Yoabu na wantumintumi waku woseri watula ng'onjeru kushiwala, hayiweri hashi neni ng'endi ukaya nikalandi na kuliya na kugonja na mdala gwangu? Ntambu kulila mumoyu mwaku yayendereya kulikala, hapeni ndendi shintu sha ntambu ayi."

12 Shakapanu, Dawudi kamgambira Uria, "Su, gulikali panu leru viraa na shirawu hanukuleki guwuyi." Hangu Uriya kasigala kumjini Yerusalemu lishaka ali. Lishaka lyalifatiti, 13 Dawudi kamshemeriti Uria kuliya na kulanda ukaya kwakuyi, kamtenda Uria kaloweri. Ata hangu, pashiru palii Uria kagenda ndiri ukaya kwakuyi, ila kagonja muulili wakuyi pamuhera na walolera wa mtuwa gwakuyi.

14 Mandawira yakuyi, Dawudi kamlembera luhamba Yoabu na kampa Uriya kaijegi kwa Yoabu. 15 Muluhamba alu Dawudi kalemba hangu, "Gumtuli Uria kulongolu, pahala pa makomangu makulu nentu, shakapanu gumleki aku na kuwuya kumbeli su kakomangwi, kafuwi." 16 Su, Yoabu pakaweriti kankuguzyengeta mji kamtula Uria pahala peni kavimana handa mashonta wa wankondu wawu waweriti wagangamala nentu. 17 Mashonta wa wankondu walawa na kulikomanga na Yoabu. Wamu wa wantumintumi wa Dawudi, walagitwi. Uria yakaweriti muntu gwa likabila lya Hiti na yomberi kalagitwi Viraa.

18 Shakapanu, Yoabu kajega visoweru vyoseri kwa Dawudi pakamgambira ntambu ya nkondu. 19 Yoabu kamgambiziya ntumintumi ayu yakamlagaliliti hangu, "Pakamgambiti kala mfalumi vitwatira vyoseri ntambu ya nkondu, 20 pakakalala na kukukosiya, ntambu gaa mgenditi pakwegera na mji pamuweriti mwankulikomanga? Mmaniti ndiri handa memgumwi misali kulawa kushibambaza sha mji gwawu? 21 Gaa kamlagiti Abimeleki mwana gwa Yerubesheti? Kaweriti ndiri mdala yumu kumji gwa Tebesi mweni kayasiti libuwi lya kusagira kulawa kushibambaza na libuwi limlaga Abimeleki? Su gwenga hagumgambiri hangu, ata ntumintumi gwaku Uria yakaweriti muntu gwa likabila lya Hiti na yomberi kahowa."

22 Mlagilagi ulii kagenda kwa Dawudi na kumgambira goseri gakalagalilitwi na Yoabu kagatakula. 23 Mlagilagi ulii kamgambira Dawudi, "Wankondu wetu waweriti na likakala kuliku twenga, walawiti kunja kumji na kutukomanga kushiwala. Hangu twenga tuwawuziyiti mpaka kuligomi lya mji. 24 Shakapanu watuguma misali twenga wantumintumi waku kuwala kushibambaza. Wamu wa wantumintumi waku walagitwi. Ata ntumintumi gwaku Uria yakaweriti muntu gwa likabila lya Hiti kahowa."

25 Dawudi kamgambira mlagilagi ulii, "hagumgambiri hangu Yoabu, shitwatira ashi nashikugaziya toziya ligumba lyahera masu, nkondu imlaga muntu yoseri ulii. Su, gongeri makomangu na guguhalibisiya mji agu. Ndo ntambu ya kumpanana moyu Yoabu."

26 Betisheba mdala gwa Uria pakapikiniriti handa mpalu gwakuyi kahowa, kamdayilira mpalu gwakuyi. 27 Shaka sha kudayilira pashiperiti, Dawudi kalagalira Betisheba katolwi na kujegwa ukaya kwakuyi. Betisheba kawera mdala gwa Dawudi na yomberi kamlelera mwana mpalu. Kumbiti shitwatira ashi shakalitenditi Dawudi shimkalaziyiti Mtuwa Mlungu.