1 Ishibosheti mwana gwa Sauli, pakapikiniriti handa Abeneri kalaguwa aku Hebroni, moyu gwakuyi gutwezuka kwa kutira na wantu woseri wa israeli walishera. 2 Ishibosheti mwana gwa Sauli, kaweriti na wantu wawili yawaweriti walongoziya wa vipinga vya ukangala, yumu wamshemiti Baana na yumonga Rekabu. Awa waweriti wana wa Rimoni, muntu gwa likabila lya Benjamini kulawa mji gwa Beeroti, toziya Beeroti viraa guweriti lunda ya likabila lya Benjamini. 3 Wenikaya wa Beeroti watugiriti Gitaimu na wendeleya kulikala aku mpaka leru.

4 Yonatani mwana gwa Sauli, kaweriti na mwana magulu gakuyi galeweleka. Mwana ayu wamshemiti Meshibosheti na pakaweriti na vinja mhanu visoweru vya kuhowa kwa Sauli na Yonatani pazipikinitwi kulawa Yezireli. Yaya yakaweriti kamlolera pakapikiniriti kuwera Sauli na Yonatani walaguwa aku Yezereeli. Kamtoliti Meshibosheti katuga nayu. Kumbiti pakaweriti kakutuga nayu kalongola mwana ayu katuluka, kawera shikwawakwawa.

5 Rebeka na Baana mwana gwa Rimoni Mbeeroti, wagenda ukaya kwa Ishibosheti. Wasokiti aku pashimihi, Ishibosheti pakaweriti. Kankukwoyera ukaya kwakuyi. 6 Wingiliti mnumba pawalitenda handa wafila kutola nganu, wamwona Ishibosheti kagonja kushitanda kwakuyi mngati munumba mwa shumba shakuyi sha kugonja, wamsoma mgoha kumtima wamlaga. 7 Pawamlagiti kala, walongu wawili awa wamlikituliti mtuyi watoloka pawawera wagutola mtuyi agu. Wapita njira ya Araba, wagenda mwanja gwa pashiru poseri. 8 Shakapanu wamjegera Dawudi aku Hiburoni. Na womberi wamgambira mfalumi Dawudi, "Agu ndo mtuyi Ishibosheti mwana gwa Sauli mweni ndo mnkondu gwaku, yakaweriti kafira kukulaga. Mtuwa Mlungu leru kamuwuzilira mfalumi gwangu kwa kumkoma Sauli na wana wakuyi."

9 Kumbiti Dawudi kamwankula Rekabu na Baana, mlongu gwakuyi, wana wa Rimoni, Mbeeruti. "Handa Mlungu ntambu yakalikala, yomberi kankombola neni muntabiku zoseri! 10 Muntu ulii yakiziti kung'ambira kuwera Sauli kahowa, kavimaniti handa kanjegera visoweru viheri, nimubatiti na kumlaga aku. Hangu iweriti ndo lifupu lyanimupiti kulawirana na ulagilagi wakuyi! 11 Muntu mkontola pakamlaga muntu mheri pakawera pashitanda ukaya kwakuyi, hashi, nfiruwa ndiri kumwuzilira toziya ya kulaga muntu ayu, kwa kumlaga muntu ayu!" 12 Dawudi kawagambira wamashonta wakuyi na womberi wawalaga Mekabu na Baana. Wawabata mawoku gawu na magulu gawu. Shakapanu wawatyetiziya kumtera kumbeku kulitanda aku Hebroni. Shakapanu watoliti mtuyi gwa ishibosheti na kufintira mlisembi lya Abineri aku Hebroni.