1 Mfalumi Dawudi kawawalangiti wantu yawaweriti pamuhera na yomberi, kawabagula muvipinga vya maelufu pasi pa wakulu wawu na vipinga vya mamiya na pasi pa wakulu wawu. 2 Dawudi kalilagalira lishonta lyakuyi kunkondu mvipinga vitatu. Shipinga shimu shilonguziwa na Yoabu, shipinga sha pili shilonguziwa na Abishai mwana gwa Seruya, mlongu gwa Yoabu na shipinga sha tatu pasi pa Itai muntu gwa Giti. Shakapanu Dawudi kawagambira woseri, "Neni namweni hang'endi pamuhera na mwenga."

3 Kumbiti wamashonta wamgambira, "Hapeni gulawi, payiwera hatutugi hapeni watufati twenga. Payiwera nusu ya twenga hawahowi viraa hapeni walitendiziyi kwa twenga. Kumbiti gwenga gwana mana kuliku wantu elufu lilongu muwamu mwetu. Hangu gwenga gusigali mjini na kutujegera utanga paguwera mjini."

4 Mfalumi kawagambira, "Lyoseri lyamliwona ndo liherepa kwa mwenga, hanilitendi." Hangu, mfalumi kagoloka kumbwega kuligomi likulu, aku lishonta lyakuyi palipita. Vipinga vya mamiya na maelufu. 5 Mfalumi kawalagalira Yoabu na Abishai na Itai, "Toziya ya neni, mmutenderi mntemba ulii Absalomu kwa upoli." Wamashonta woseri wampikinira mfalumi pakawagambiliti wakulu wa mashonta wakuyi kwa Absalomu.

6 Hangu, lishonta lya Dawudi ligenda kushiwala kulikomanga na walishonta lya Israeli. Makomangu aga gatendekiti mulidowi lya Efraimu. 7 Wamashonta wa Dawudi wawakangiti wamashonta wa Abusolumu. Malaga ga lishaka ali gaweriti makulu toziya wantu malongu mawili elufu walagitwi. 8 Makomangu aga gaeniyiti kuisi yoseri na wantu wavuwa wahowiti kulidowi waweriti wavuwa kuliku walii yawalagitwi kunkondu.

9 Shakapanu Absalomu, pakawera kakwena punda farasi gwakuyi, kaliwoniti na wantumintumi wa Dawudi. Punda farasi ayu pakaweriti kankupita pasi pa lutambi lukulu lwa mtera gwa mwaloni, panu mtuyi gwa Abisalomu gulemetera kumwaloni. Abisalomu kalekwa kankutyeta pampindi. Kumbiti punda farasi gwakuyi kendereya kulongolu. 10 Muntu tunga yakawoniti shitwatira ashi, kamgambira Yoabu, "Nimwona Absalomu pakatyeta kumwaloni."

11 Yoabu kamgambira muntu ayu, "Shishi? Gumwoniti Absalomu? Ntambu gaa, gumkoma ndiri palaa palii mpaka katuluka pasi? Menemaleri na kukupanana vipandi lilongu vya madini ga feza na lufunga."

12 Kumbiti muntu ulii kamgambira Yoabu, "Ata megumpanani utopa wa vipandi elufu yimu vya madini ga feza mumawoku mwangu, mentalipisiyi ndiri liwoku lyangu kumkoma mwana gwa mfalumi. Toziya, tumpikiniriti mfalumi pakakugambira gwenga Abishai na Itai, toziya yaneni mmuloleri mntemba Absalomu. 13 Kumbiti handa menimtenderi kwa udoda na mfalumi mekakupikaniri gwenga gwamweni megulituli gweka na neni."

14 Yoabu kamgambira, "Neni nahera shaka sha kwagamiziya pamuhera na gwenga." Panu Yoabu katola migowa mididini mitatu, kagenda na kumsoma Abisalomu mumoyu, Yoabu pakaweriti kakugenda kumsoma kamwoniti Abusalomu kaweriti kankali mkomu pakatyeta kulutambi lwa mwaloni. 15 Shakapanu, wantemba lilongu yawamjegeriti vintu vya kulikomangira Yoabu, wiza kumzyengeta Abisalomu, wamkoma na kumlaga.

16 Shakapanu Yoabu kagomba lipenka na mashonta woseri wawuya kuwafata wantu wa Israeli, toziya Yoabu kawabeliziyiti. 17 Watola nshimba ya Abisalomu wamwasa kulilindi likulu kulidowi na kumatira limatiru likulu nentu lya mabuwi. Wantu woseri wa Israeli watira, kila yumu ukaya kwakuyi.

18 Absalomu, Shaka sha ukomu wakuyi, kaweriti kalinyawira na kuligolosilila lupanda lwaluwera kululalanda lwa Mfalumi, kwa kalongiti, "Neni nahera mwana mpalu gwa kuhala litawu lyangu su liholuwi." Lupanda kalupananiti litawu lyakuyi na lushemuwa "Lupanda lwa Abisalomu" mpaka leru.

19 Shakapanu, Ahimaasi mwana gwa Sadoki, kalonga, "Gundeki ntugi kumjegera mfalumi visoweru avi kuwera Mlungu kamlopola kulawa muwankondu wakuyi."

20 Yoabu kamgambira, "leru, hapeni gujegi visoweru avi. Guweza kujega visoweru avi lishaka limonga. Kumbiti leru hapeni gujegi visoweru vyoseri toziya mwana gwa mfalumi kahowa." 21 Shakapanu Yoabu kamgambiriti muntu yumu, muntu gwa likabila lya Kushi, "Gwenga, gugendi gwakamgambiri mfalumi galii yagaguwoniti." Muntu gwa likabila lya Kushi kang'ong'onala kwa ligoya kulongolu kwa Yoabu, kawuka mbiru.

22 Shakapanu Ahimaasi mwana gwa Sadoki kamgambira kayi Yoabu,

"Vidoda ndiri, gundeki ng'endi nimtugiri muntu ulii gwa likabila lya Kushi!" Yoabu kamgambira, "Mwana gwangu hashi gufira kutuga? Gwenga hapagufupwi shoseri kwa visoweru avi!"

23 Ahimaasi kamgambira, "Shoseri shagufira shirawiri na shirawiri, hantugi." Su, Yoabu kamgambira,

"Yina, gutugi." Su Ahimaasi katuga pakafata njira ya kululalanda lwa Yoridani na kumlongolera muntu gwa likabila lya Kushi ulii.

24 Dawudi kaweriti kalikala pakati pa migomi mikulu miwili ya mji. Na mlolera gwa migomi mikulu kakwena kushibambaza mpaka pampindi pa migomi na pakanyasuliti masu gakuyi kawona muntu katuga gweka yakuyi. 25 Mlolera ayu kabota kamgambira mfalumi. Mfalumi kalonga, "Handa ka gweka yakuyi, guvimani kana visoweru." Muntu ulii kongera kusegelera.

26 Shakapanu mlolera kamwona muntu gwingi kankutuga, kamshema kayi mlolera gwa ligomi likulu pakalonga, "Guloli, muntu gwingi kankutuga gweka yakuyi!"

Mfalumi kalonga, "Yomberi viraa kankujega ulagilagi."

27 Mlolera ulii kalonga, "Mona kuwera ulii yakatuga nentu ndo Ahimaasi mwana gwa Sadoki." Mfalumi kalonga,

"Ayu ndo muntu mheri, kankutujegera visoweru viheri."

28 Hangu Ahimaasi kamgambira mfalumi kwa liziwu likulu, "Vitwatira vyoseri viherepa." Kang'ong'onala kulongolu kwa mfalumi, kasuntamala na kulonga, "Kakwiswi Mtuwa Mlungu, Mlungu gwaku, kakupanana ukanka kwa wantu yawakugalambukiti gwenga, mtuwa gwangu mfalumi!"

29 Mfalumi kamgambira, "Hashi, mntemba Abisalomu kakashina?"

Ahimaasi kalonga, "Yoabu pakantumiti neni ntumintumi gwaku moniti kuweriti na showanganu zivuwa, kumbiti nivimaniti ndiri mana yakuyi."

30 Mfalumi kalonga, "Gugoloki gulikali kumbwega na kugoloka panu." Su, Ahimaasi kagenda kumbwega na kugoloka jii.

31 Shakapanu pakasokiti kwa muntu gwa likabila lya Kushi ulii na yomberi kalonga, "Kwana visoweru viheri kwa gwenga mtuwa gwangu mfalumi! Toziya Mtuwa Mlungu leru ayi kakulopola kulawa mumakakala ga woseri walii yawafiliti kukulaga gwenga!"

32 Mfalumi kamkosiya,

"Hashi mntemba Abisalomu kakashina?" Muntu gwa likabila lya Kushi kalonga, "Mtuwa gwangu mfalumi, wankondu waku pamuhera na woseri yawagoloka toziya ya gwenga pawakufilira vidoda, gawapati gambira ayu mntemba Abisalomu."

33 Panu mfalumi kinginikiti nentu, kakwena kushumba sha lijengu shashiweriti pampindi pa ligomi likulu na kulira. Pakaweriti kankukwena, kaweriti kankulira pakalonga, "Nyeno mwana gwangu! Abisalomu, mwana gwangu Abisalomu! Mehowi neni! Gwee, Abisalomu mwana gwangu! Mwana gwangu!"