1 Pa vitwatira avi, Dawudi kamluwiti Mlungu shakutenda, kalonga, "Hashi, ng'endi kumji gumu gwawu gwa miji ya Yuda?"

Mtuwa Mlungu kamgambira, "Gugendi!" Dawudi kamkosiya,

"Ngendi mji goshi?"

Mtuwa Mlungu kamwankula, "Gugendi kumji gwa Hebroni." 2 Hangu, Dawudi kagenditi Hebroni, pamuhera na wadala wakuyi wawili, Ahinoamu kulawa mji gwa Yezireeli na Abigaili, mkenja gwa Nabali, kulawa mji gwa Karimeli. 3 Kawatoliti wamashonta wakuyi, kila muntu pakawera pamuhera na kaya yakuyi na womberi wagenditi kulikala kumiji yayiweriti mbwegabwega mwa Hebroni. 4 "Wantu wa Yuda wamgenderiti Dawudi aku Hebroni wamswaga lipaki kaweri mfalumi gwawu.

Dawudi pakapikiniriti kuwera wantu wa Yabeshi mu Gileadi ndo yawamfintiriti Sauli," 5 kawatumiti walagilagi aku Yabeshi mu Gileadi na ulagilagi, "Mlungu na kawatekereli toziya mlanguziyiti ujimira wenu kwa Sauli, mtuwa gwenu, kwa kumfintira. 6 Hangu, Mtuwa Mlungu kawatenderi maheri na kuwera mwaminika kwa mwenga. Na neni haniwatenderi uheri kulawirana na shitwatira shamshitenditi. 7 Hangu muweri mwana makakala na wagangamala. Sauli, mtuwa gwenu, kahowa na wantu wa Yuda wasyagula weri mafalumi gwawu na kuswaga lipaki."

8 Abineri mwana gwa Neri, mkulu gwa lishonta lya Sauli kaweriti kamtola Ishibosheti mwana gwa Sauli na kumjega aku Mahanaimu. 9 Aku, Abineri kamswaga lipaki Ishibosheti kuwera mfalumi gwa isi ya Gileadi na Ashuru na Yezreeli na Efraimu na Benjamini na Israeli yoseri. 10 Ishibosheti kaweriti na vinja alubayini pakanjiti kuyikolamlima Israeli na yomberi kakolitimlima kwa vinja viwili.

Kumbiti likabila lya Yuda liweriti uwega wa Dawudi. 11 Dawudi kaweriti mfalumi gwa likabila lya Yuda kwa vinja saba na nusu, makawu gakuyi gaweriti aku Hebroni.

12 Aberi mwana gwa Neri, pamuhera na wakulu wa Ishibosheti na mwana gwa Sauli, wawukiti Mahinaimu na kugenda kumji gwa Gibioni. 13 Yoabu mawu gwakuyi wamshemiti Seruya na wantumintumi wamonga wa Dawudi na womberi walawiti na kuliwona na Abineri na wantu yawaweriti nawa kulitanda lyaliwera aku Gibioni. Shipinga shimu uwega wumu wa litanda na shipinga shimonga uwega umonga. 14 Abineri kamgambira Yoabu, "Guwaleki wantemba walikomangi kulongolu kwa twenga!"

Yoabu kankula, "yina."

15 Hangu wantemba ishilini na msheshi awa ndo walaviwa. Kulawa likabila lya benjamini na ishibosheti mwana gwa Sauli, wantemba lilongu na wawili na Dawudi wantemba lilongu na mbili.

16 Kila muntu kalibatana na mnkondu gwakuyi mumtuyi na kulisomana kwa ligumba, hangu woseri wawili waguwa pasi, wahowa. Hangu, pahala panu pashemwa Helikati Gazurimu mana yakuyi luwaga lwa makomangu. Pahala panu paaku Gibioni.

17 Nkondu ya lishaka ali iweriti nkulu. Abineri na wantu wa Israeli wakomingitwi nentu na wantu wa Dawudi. 18 Wana watatu wa Seruya waweriti aku ndo, Yoabu na Abishai na Asaheli waweriti panu. Asaheri kaweriti katuga handa mbawala. 19 Asheri kamfatiti Abineri magenda pota kugalambuka kumliwu ama kumshigi. 20 Abineli pakaloliti kumbeli kamwona Asaheri,

kamgambira, "Hashi, ndo gwenga Asaheri?" Yomberi kankula, "Yina, ndo neni."

21 Abineri kamgambira, "Guleki kunfata neni, guwafati wantemba na kutola lopola zawu." Kumbiti Asaheli koya ndiri kumfata. 22 Shakapanu Abineli kamgambira Asaheli mala ya pili, "Goyi kunfata. Ntambu gaa nikulagi? Kaka gwaku Yoabu hakamoni hashi?" 23 Kumbiti Asaheli kapikaniriti ndiri. Hangu Abineli kamsoma mgoha kumtima shimberimberi na mgoha agu gulawira kumgongu kwa Asaheli, Asaheli kaguwa pasi na kuhowa palaapa. Wantu woseri yawasokiti pahala pakahowiliti Asaheli, wagoloka jii.

24 Kumbiti Yoabu na Abishai wamfatiti Abineli. Mshenji paguzyeta, wasoka kulugongu lwa Ama, lwaluwera kwagulawira mshenji kwa Gia, munjira yayigenda kushiwala sha Gibeoni. 25 Wantu wa likabila lya Benjamini walijojonira pamuhera wawera kumbeli kwa Abineri, hangu wanyawa vipinga vyawu na womberi wagoloka pampindi pa lugongu. 26 Shakapanu Abeneli kamshema Yoabu, "Hashi, hatulikomangi mashaka goseri? Hashi?, Guwona ndiri handa upeleru hawuweri utama? Hashi, hagwendereyi kwa shaka gaa pota kuwagambira wantu waku kuleka kuwafata Waisraeli wayawu?"

27 Yoabu kamgambira, "Handa Mlungu ntambu yakalikala, handa meguweri gwenilongi shitwatira ashi, nakaka, wantu mewendereyi kuwafata walongu wawu mpaka shirawu mandawira." 28 Hangu, Yoabu kagomba mapenka na wantu waleka kuwafata wantu wa Israeli, su walikomanga ndiri kayi.

29 Abineri na wamashonta wakuyi wapititi kululalanda lwa Araba pashiru poseri. Waloka lushemba Yoridani, wagendagenda paliwala poseri mpaka Mahanaimu.

30 Yoabu pakawuyiti kulawa kumfata Abineli, kawajojonira wamashonta wakuyi woseri, kayambula kuwera wamashonta lilongu na tisa wa Dawudi kwahera, pota kumuwalanga na Asaheli. 31 Kumbiti wamashonta wa Dawudi waweriti wawalaga wantu miya tatu sitini kulawa likabila lya Benjamini pamuhera na wantu wa Abineli. 32 Yoabu na wamashonta wakuyi wayitoliti nshimba ya Asaheli, wayifintira kulisembi lya tati gwakuyi, lyaliwera aku Betilehemu. Yoabu na wamashonta wakuyi watyangiti pashiru poseri na payiweriti mandawira wasokiti kumji gwa Hebroni.