1 Mfalumi Dawudi pakaweriti kankulikala kuliboma lyakuyi na Mtuwa Mlungu kampanana ponga kulawa kwa wankondu wakuyi woseri, 2 mfalumi kamgambira Natani, mbuyi yakaweriti mbuyi gwa Mlungu, "Guloli vinu, neni nilikala mnumba ya mitera ya mibani, ila lisandiku lya Mtuwa Mlungu lilikala mngati mliringu."

3 Natani kamgambira mfalumi, "Gugendi gwakatendi shoseri shaguliholera mmoyu mwaku, kwa kuwera Mtuwa Mlungu ka pamuhera na gwenga." 4 Kumbiti pashiru palapalii Mtuwa Mlungu kamgambira Natani, 5 "Gugendi gwakamgambili ntumintumi gwangu Dawudi, Mtuwa Mlungu kalongi ntambu ayi hashi, gwenga hagunyawiri numba ya kulikala? 6 Kwanjira lishaka lilii paniwalaviyiti Waisraeli kuisi ya Misri mpaka leru nilikala ndiri kunumba. Ntyanga kila pahala pawera nilikala mliringu. 7 Kila pahala pang'enditi na Waisraeli woseri hanenimkosiyi mkulu yoseri yanimsyaguliti kuwalonguziya wantu wa neni Israeli ntambu gaa gunyawira ndiri numba ya mitera ya mibani?"

8 "Su, gumgambiri ntumintumi gwangu Dawudi, Mtuwa Mlungu gwa Mashonta kalonga hangu, nikulaviyiti mmaliwuziyu kwaguweriti gwankuwalolera kondolu, su guweri mkulu gwa wantu waneni Israeli. 9 Kwanjira shaka ashi wera pamuhera na gwenga koseri kwagugenditi na niwalaga wankondu kulongolu kwaku koseri. Hanikutendi kuwera gumanika handa wakulu wamonga pasipanu. 10 Neni haniwasyaguliri wantu wangu wa Israeli pahala pa kulikala, su walikali pahala pawu weni pota kuwoniluwa kayi. 11 Na wantu wandewu yawatendera likakala hapeni wawatabisiyi kayi handa mashaka gapititi.Kwanjira shaka paniwasyaguliti walonguziya kwa wantu waneni Israeli na neni hanikuloleri kulawirana na wankondu woseri. Kayi neni Mtuwa Mlungu hanikubweleri kuwera hanikupanani wiwuka hawuweri wafalumi. 12 Paguhowaku na kufintirwa na kuwera pamuhera na wambuyi waku, hanimtendi yumu gwa wana waku gamweni gwenga kaweri mfalumi na neni haniwutendi ufalumi wakuyi uweri na makakala. 13 Yomberi ndo yakafira kunyawa numba toziya yaneni na haniwutendi ufalumi wakuyi hawulikali mashaka goseri. 14 Neni haweri tati gwakuyi na yomberi hakaweri mwana gwangu. Pakatenda makontola, hanimsyatangi gambira muntu ntambu yawakamsyatanga mwana gwakuyi kwa mboku. 15 Kumbiti hapeni mbusiyi ufiru wangu kwakuyi ntambu yambusiyiti kwa Sauli, yanimwusiyiti kulongolu kwaku. 16 Hantendi yimu ya numba yaku hawakolimlima mashaka goseri."

17 Natani kamgambira Dawudi kila shintu shakalanguziwitwi mumalola aga na Mlungu.

18 Shakapanu mfalumi Dawudi kingira Muliringu linanagala na kulivaga kulongolu kwa Mtuwa Mlungu, shakapanu kaluwa, "Neni na gaa, gwee Mtuwa Mlungu na kaya yangu ndo shishi ata gunyasula mpaka panu pawera leru. 19 Kayi shitwatira ashi shiweriti shididini pamasu paku gwee Mtuwa Mlungu, nentu ya aga gulonga haguwatenderi wantu wa kaya yangu mirandu mikulu muvinja vivuwa vyaviza hashi ndo ntambu yaguwatendera wantu! 20 Nikugambili shishi vinu, neni ntumintumi gwaku Dawudi? Gwenga gumana neni ntumintumi gwaku, gwee Mtuwa Mlungu! 21 Kulawirana na shii shagutakuliti na kwa kufira kwaku, gutenda makulu goseri aga su gunfundi neni ntumintumi gwaku. 22 Kulawirana na gatupikiniriti, gwenga Mtuwa Mlungu ndo mkulu. Kwahera yakawera handa gwenga na kwahera Mlungu gwingi ila gwenga. 23 Kayi ndo wantu gaa pasipanu weni waweza kulinganira na wantu waku Israeli, weni Mlungu gwakuyi kagenditi kuwalopola su waweri wantu wakuyi? Gwenga Mlungu gutenda vitwatira vikulu vya kulikangasha toziya ya wantu waku yaguwalopuliti kulawa Misri na kukutenda gumaniki pasipanu poseri. Kayi guwawinga wantu wa maisi gamonga na wamulungu wawu kulongolu kwawu. 24 Guwagangamaziya wantu waku wa Israeli toziya yaku gamweni, su waweri wantu waku mashaka goseri na gwenga Mtuwa Mlungu guwera Mlungu gwawu."

25 "Su, vinu, gwenga Mtuwa Mlungu, guyimaliri ntakula yagung'ambiliti neni ntumintumi gwaku na viraa na kaya ya neni ntambu yagulongiti. 26 Litawu lyaku halikwiswi mashaka goseri na wantu hawalongi, Mtuwa Mlungu yakana uwezu ndo Mlungu yakakolamlima Israeli.’ Na walongu wangu, neni Dawudi ntumintumi gwaku, hawagangamali kulongolu kwaku. 27 Toziya gwenga, Gwee Mtuwa Mlungu yakana uwezu, Mlungu gwa Israeli! Gung'ubutulira neni ntumintumi gwaku, pagulonga hanikunyawiri numba, toziya ayi neni ntumintumi gwaku ntirandiri kulaviya luwa ayi kulongolu kwaku."

28 "Vinu, gwee Mtuwa Mlungu, gwenga ndo Mlungu na visoweru vyaku ndo nakaka na gung'ambira neni ntumintumi gwaku mlandu agu mheri. 29 Hangu, nikuluwa kaya ya neni ntumintumi gwaku ipati kulikali mashaka goseri kulongolu kwaku, toziya gwenga Mtuwa Mlungu gulonga hangu, viraa kwa tekelera zaku kaya ya neni hayitekelerwi mashaka goseri."