1 Nentu ya aga, Ahitofoli kamgambiriti Abisalomu, "Gunjimili syaguli wantu elufu lilongu na mbili, mbuki na kumgendera Dawudi leru pashiru. 2 Hanimkomangi pakawera katoka na kutwezuka na neni hanimpanani lyoga. Wantu woseri yawawera pamuhera na yomberi hawatiri. Hanimlagi mfalumi gweka yakuyi, 3 na kuwawuziya wantu woseri kwa gwenga handa mdala gwa ndowa ntambu yakawuya ukaya kwa mpalu gwakuyi. Gwenga gugasakula makaliru ga muntu yumu hera na wantu wamonga hawaweri na ponga." 4 Mpangu agu gwa Ahitofeli gumfiliziyiti Abisalomu na wazewi woseri wa Israeli.

5 Shakapanu, Abisalomu kalonga, "Mmushemi viraa Hushayi, muntu ulii gwa Ariki, tupikiniri lyakafira kulonga." 6 Hushayi pakasokiti kwa Abisalomu, Abisalomu kamkosiyiti, "Hangu ndo ntambu yakatakuliti Ahitoferi. Hashi, tutendi ntambu yakatugambiriti? Handa ndala, gutugambiri lya kutenda."

7 Hushayi kamgambira Abisalomu, "Litakulu lyakalilaviyiti Ahitofeli shaka ashi shiherepa ndiri. 8 Nentu ya aga, Hushayi kamgambira, gwenga guvimana handa tati gwaku na wantu wakuyi ndo wagangamala wa nkondu na handa wakalaziwa handa simba shidala yakapokitwi wana wakuyi kushiwala. Vilavilii, guvimana tati gwaku ndo muntu gwa nkondu. Yomberi hapakagonji pashiru poseri pamuhera na wantu wakuyi. 9 Ata vinu kalififa kala mugamu ga mpanga yagawera aku ama pahala pamonga, handa pakanja kuvikomanga vipinga vyaku, muntu yoseri yakapikanila visoweru avi hakalongi, wantu wa Abisalomu hawaweri wasinda. 10 Wantu waku yawawera na miyoyu handa simba, hawatwezuki na kuwuya kumbeli kwa lyoga. Toziya, Waisraeli woseri wavimana kuwera tati gwaku ndo mgangamala na woseri yawawera pamuhera na yomberi ndo wantu wagangamala. 11 Shantakula neni ndo ashi, guwajojoniri kwaku gwenga wantu woseri wa Israeli kwanjira Dani yayiwera uwega wa kusika mpaka Beeri Sheba uwega wa kushana, waweri wavuwa handa mhanga gwa bahari na gwenga gugendi kunkondu. 12 Na twenga hatumsakuli Dawudi pahala poseri pakaweza kuwoneka na hatumkankali handa mangami yagatulukira pasi. Su, kwahera yanakasigala, mekaweri mweni ama wantu wakuyi woseri yawawera pamuhera na yomberi. 13 Payiwera hakatugiri kumji tunga, su, wantu woseri wa Israeli hawajegi lugoyi na kugukwega mji agu, mpaka kululalanda, nashisigala shoseri ata libuwi lididini lya mji agu."

14 Abisalomu pamuhera na wantu woseri wa Israeli walonga, "Litakulu lya Hushayi ndo liherepa nentu kuliku litakulu lya Ahitofeli." Walemiti litakulu liherepa lya Ahitofeli, toziya Mtuwa Mlungu kapangiti kulitenda litakulu liheri lya Ahitoferi nalitendwa su kawezi kumjegera Abisalomu vidoda.

15 "Shakapanu Hushayi kawagambira watambika Sadoki na Abiatali, Ahitofeli na neni ntambu yatuwagambiriti Abisalomu na wazewi wa Israeli." 16 Kawagambira wamjegeri Dawudi visoweru kalong'ola nagugonja ndang'anu kushiwala, "Su, katendi kalongola, kuloka lushemba na kuwuka su nakiza kubatwa na kulaguwa, yomberi pamuhera na wantu wakuyi woseri."

17 Yonatani na Ahimaasi, waweriti warififa aku pakwegera na Eni Rogeli, su nawawoneka na muntu yoseri pawingira mjini. Kila mala mdala tunga kaweriti kankuwajegera visoweru vyavilawiriti na womberi wavijega kwa mfalumi Dawudi. 18 Kumbiti shaka ashi, wawonekaniti na mntemba yumu mweni kagenditi na kumgambira Abisalomu. Hangu, Yonatani na Ahimaasi wawukiti kalongola, wagenda Bahurimu ukaya kwa muntu tunga yakaweriti na linegu lyaliweriti kuzyetu kwakuyi. Wingira amu kulinegu na kulififa. 19 Mdala kana numba ayi katola shigibikiru na kugibikira linegu ali, shakapanu kandikira viboga pampindi pa shigibikiru. Kwahera muntu yakavimaniti mlandu agu. 20 Wamashonta wa Abisalomu pawasokiti kwa madala ayu, wamgambira,

"Wakoshi Ahimaasi na Yonatani?"

Mdala ulii kawagambira, "Wagenda kumwambu kushishemba." Pawawasakuliti woneka ndiri, wawuya ukaya kumji gwa Yerusalemu. 21 Pawawukiti kala wamashonta wa Abisalomu, Yonatani na Ahimaasi wawukiti kulinegu, wagenda kwa mfalumi Dawudi na kumgambira visoweru avi. Wamgambira, "Guwuki, gugendi kumwambu kushishemba, toziya Ahitofeli kamgambira Abisalomu mpangu gwa kukwizira gwenga." 22 Hangu, Dawudi kawuka na wantu woseri yawaweriti pamuhera na yomberi, waloka lushemba lwa Yoridani. Payisokiti mandawira kwahera muntu yakasigaliti kumbeli pota kuloka lushemba lwa Yoridani.

23 Ahitofeli pakawoniti handa lyakatakuliti walifata ndiri, kamtanda punda gwakuyi, kagenda ukaya, Pakasokiti aku katuliti weri vitwatira vya numba yakuyi, kalikongera mweni na kahowa, kafintirwa kulisembi lya tati gwakuyi.

24 Su, Dawudi kagenda Mahanaimu. Abisalomu kaloka lushemba lwa Yoridani na wamashonta woseri wa Israeli. 25 Shaka ashi, Abisalomu kamtula Amasa kuwera mkulu gwa lishonta pahala pa Yoabu. Amasa kaweriti mwana gwa Yitira muntu gwa likabila lya Ishimaeli. Mawu gwakuyi wamshemiti Abigaili mhinga gwa Nahashi, yakaweriti dada gwakuyi Seruya, mawu gwakuyi kaweriti Yoabu. 26 Abisalomu pamuhera na wamashonta wa Israeli watuliti ng'onjeru yawu muisi ya Gileadi.

27 Dawudi pakasokiti Mahanaimu, Shobi mwana gwa Nahashi kulawa Amoni, Shobi mwana gwa Nahashi kulawa mji gwa Laba kulawa isi ya Amoni na Makili mwana gwa Amieli kulawa mji gwa Lodebari, pamuhera na Barizilai muntu gwa likabila lya Gileadi kulawa mji gwa Rogelimu, 28 Wajegiti ulili na mabakuli na vyombu vya utapaka na viravilii nganu na shayiri na ubumu na ntutu na mpangi na dengu. 29 Lwashi na kondolu na lipaki lyalilawa mumaweri ga ng'ombe wawu, wamjegera Dawudi pamuhera na wantu yakaweriti nawa. Toziya walongiti, "Wantu awa wana njala, watoka na wayumluwa mumwanja kushiwala."