1 Su Mlungu kamlagalila Natani yakaweriti mbuyi gwa Mlungu kwa Dawudi. Natani kamgendera Dawudi, kamgambira, "Kuweriti na wapalu wawili kumji gumu, yumu kaweriti mlunda na yumonga kaweriti mhushu. 2 Mlunda ulii kaweriti na kondolu wavuwa na ng'ombi wavuwa. 3 Kumbiti mhushu ulii kaweriti na mwanakondolu mdidini jinta, mweni kaweriti kamhemera. Kamtuliti weri na mweni kakula ukaya kwakuyi pamuhera na wana wakuyi. Kamliiziyiti mwanakondolu ayu shiboga shirashilii handa shakuyi na kulandiziya shikombi shakuyi na yomberi viraa kaweriti pakamkisikira pashifuwa. Mwanakondolu ayu kaweriti gambira mhinga kwa muntu ulii mhushu. 4 Lishaka limu, mlunda ulii kamwiziliti mhenga. Su, mlunda ayu kafiliti ndiri kutola yumu gwa kondolu wakuyi mweni ama ngo'mbi gwakuyi, kamlikitulili mhenga gwakuyi,ila kagenditi na kumpoka mhushu ulii mwanakondolu gwakuyi, kamlikitilira mhenga gwakuyi."

5 Dawudi pakapikiniriti aga, kamkalalira mlunda ulii. Kamgambira mbuyi Natani, "Nulilapa kwa Mlungu yakawela mkomu kwa muntu ayu yakatenditi shitwatira ashi kafiruwa kuhowa! 6 Su mpaka kamlipi mhushu ayu mwanakondolu, kayi mala mheshi, toziya katenda shitwatira shidoda na kawera ndiri na lusungu!"

7 Natani kamgambira Dawudi, "Gwenga ndo muntu ayu, vinu, Mtuwa Mlungu, Mlungu gwa Israeli, kalonga hangu. Nikuswagiti lipaki guweri mfalumi gwa Israeli na nikulopola mumawoku mwa Sauli. 8 Nikupananiti numba ya mtuwa gwaku na wadala wakuyi, kayi hanikupanani wantu wa Israeli na wa Yuda guwakolimlima. Na handa aga megaweri madidini kwa gwenga menikongeleri mala mbili nentu ga aga. 9 Ntambu gaa, gujimila ndiri visoweru vya neni Mtuwa Mlungu na gutenda ukontola awu kulongolu kwa neni? Gumlaga Uria muntu gwa likabila lya Hiti, kwa ligumba, gumtola mdala gwakuyi kaweri mdala gwaku. Guwaleka Waamoni kumlaga Uria kunkondu! 10 Hangu su, toziya gumpanana ndiri ligoya na gumtola mdala gwa Uria yakaweriti muntu gwa likabila lya Hiti, kuwera mdala gwaku, wamu wa wantu wa kaya hawalaguwi kwa ligumba. 11 Gupikinili, Mtuwa Mlungu kalonga, guloli, hanjegi makomangu mukaya mwaku gamweni. Haniwatoli wadala waku pagulola kwa masu gaku gamweni na kumpanana gwapakwegera gwaku na yomberi hakagonji nawa paweru 12 Gwenga gutenditi shitwatira ashi kwa bada, kumbiti neni hantendi aga kulongolu kwa Waisraeli woseri paweru."

13 Su Dawudi kamgambira Natani, "Ntenda shidoda kwa Mtuwa Mlungu,"

Natani kamwankula, "Mtuwa Mlungu kakulekiziya shidoda shaku na gwenga hapeni guhowi. 14 Toziya ya kumjimira ndiri Mtuwa Mlungu, mwana gwaku hakahowi." 15 Shakapanu Natani kawuya ukaya kwakuyi.

Mtuwa Mlungu kamkomiti mwana gwa Batisheba mdala gwa Uria yakamleleriti Dawudi na yomberi kawera mlweri nentu. 16 Dawudi kamluwa Mlungu mwana kaweriti mbaka. Kwoya kuliya na kagenda kushumba kwakuyi na pashiru poseri kagonja pasi. 17 Wazewi wakulu yawaweriti wankumlolera Dawudi munumba ayi wamfatiti na kumluwa kimuki, kumbiti yomberi kalemiti na koya kuliya shiboga pamuhera na womberi. 18 Pamashaka saba, mwana ayu kahowa. Wantumintumi wa Dawudi watiriti kumgambira kuwera mwana kahowa, toziya waliholiti, "Mwana ayu pakaweriti mkomu, tuyowiriti nayu, kumbiti katupikinira ndiri. Vinu, tumgambiri hashi kuwera mwana gwakuyi kahowa? Kaweza kutenda shintu shidoda."

19 Dawudi pakawawoniti wantumintumi wakuyi wankuninitirana, kayambula kuwera mwana gwakuyi kahowa. Hangu, kawakosiya, "Hashi, mwana kahowa?"

Nawomberi wamwakula, "Yina, kahowa."

20 Dawudi kagoloka, koga mashi, kaliswaga lipaki na kuvala nguwu zimonga. Shakapanu kagenda kunumba nkulu ya Mtuwa Mlungu na kumguwira. Shakapanu kawuya ukaya na kaluwa shiboga, wampanana na yomberi kaliya. 21 Wantumini wakuyi wamkosiya, "Ndo shitwatira gaa ashi shagutenditi? Mwana pakaweriti mkomu, gwenga goyiti kuliya na kumlilira. Kumbiti pakahowiti, gugoloka, guliya shiboga!"

22 Dawudi kawawankula, "Nakaka mwana pakaweriti mkomu, noyiti kuliya na kulila. Ndenditi hangu toziya niliholiti, gaa kavimana? Pamonga Mtuwa Mlungu kamoneri lusungu su mwana kalikali. 23 Kumbiti vinu kahowa, toziya gaa noyi kuliya? Hashi neni mbeza kumuwuziya pasipanu? Lishaka limu hang'endi aku kwakagenditi, kumbiti yomberi kaweza ndiri kuwuya kwa neni."

24 Shakapanu Dawudi kamzyangazyanga Betisheba mdala gwakuyi. Kagonja nayu na yomberi kapata yida na kulera mwana mpalu, mweni Dawudi kamshemiti Selemani. Mtuwa Mlungu kamfiliti mwana ayu, 25 Na yomberi kamlagalila Natani mbuyi gwa Mlungu kwa Dawudi kuwera kamshemi mwana ayu Yedidia mana yakuyi yakafilitwi na Mtuwa Mlungu.

26 Shaka ashi, Yoabu kagukomangiti mji gwa Raba muisi ya Waamoni na kagulopola mji agu gwa shifalumi. 27 Yoabu kalagalila ulagilagi kwa Dawudi, "Nigukomanga mji gwa Raba na neni niyitola mbwiru yawu ya mashi. 28 Vinu guwajojonili wamashonta woseri yawasigaliti, gutuli lugonjeru kuzyengeta mji agu na kugulopola. Hera hangu, panugulopola, wantu hawankwisi neni." 29 Hangu, Dawudi kajojonira wamashonta woseri kagenda Raba, kalukomanga na kugulopola mji agu. 30 Shakapanu katola lijenjeri kulawa kushinyagu sha mfalumi kumtuwi gwakuyi. Utopa wa lijenjeri ali lya zahabu uweriti kilu selasini na mhanu na mngati mwakuyi muweriti na libuwi lya madini ga feza na katola libuwi ali nakulitula mulijenjeri lyaluyi. Na yomberi kalopoliti lopola zivuwa kumji agu. 31 Shakapanu kawatola wantu wa mji agu, kawatula watendi lihengu pawatendera msumenu, sululu za shuma, mawagu ga shuma na kuwatendera kutenda lihengu mutanulu lya matofali, hangu ndo yakazitenditi miji yoseri ya Waamoni. Upeleru wakuyi Dawudi na wantu woseri wawuyiti Yerusalemu.