1 Shaka shimu kulawiriti njala nkulu Kuisi ya Dawudi pakaweriti mfalumi. Njala ayi ikaliti vinja vitatu vigenderanu. Dawudi kamluwiti Mlungu shakutenda na Mlungu kamwankula, "Sauli na walongu wakuyi watenda vidoda kwa kulaga toziya kawalagiti Wagibioni." 2 Hangu, mfalumi Dawudi kawashema Wagibioni, Wagibioni awa waweriti ndiri Waisraeli ila waweriti wiwuka wa Waamoni. Tembera wantu wa Israeli walilapa kuwalolela, Kumbiti Sauli kajeriti kuwalaga woseri toziya kaweriti na weya kwa wantu wa Israeli na Yuda. 3 Dawudi kawakosiya Wagidioni, "Niwatenderi shishi? Handipi hashi kwa makontola gamtenderitwi su muyitekelera isi ayi na wantu wakuyi Mtuwa Mlungu."

4 Wagibioni wamgambira, "Shitwatira shetu na Sauli pamuhera na kaya yakuyi hapeni shipeli kwa kupananwa madini gwa feza ama zahabu na tufira ndiri kumlaga muntu yoseri muisi ya Israeli." Mfalumi kawakosiya kayi,

"Vinu mlonga niwatenderi shishi?"

5 Womberi wamgambira mfalumi, "Sauli kafiliti kutulaga twenga na kutwagwamiziya na kufila muntu yoseri kasigali poseri museemu yoseri ya Israeli. 6 Su, gutupanani wana saba wapalu muwiwuka wakuyi na twenga tuwatyetiziyi kulongolu kwa Mtuwa Mlungu kulugongu Gibea, kumji gwa mfalumi Sauli yakalumikitwi na Mtuwa Mlungu." Mfalumi kalonga,

"haniwapanani wantu awa."

7 Kumbiti mfalumi kamleka mkomu Mefibosheti mwana gwa Yonatani, mzukulu gwa Sauli, toziya ya kulilapa kulongolu kwa Mtuwa Mlungu pakati pa Dawudi na Yonatani. 8 Kumbiti Mfalumi kawatola Arimoni na Mefiboshiti wana wawili wa Risipa mhinga gwa Ahiya yakaleriti na Sauli, pamuhera na wana woseri mhanu wapalu Wamikali, mhinga gwa Sauli kamleleriti Adirieli mwana gwa Bazilayi kulawa Mmeholati. 9 Dawudi kawapananiti wantu saba awa kwa Wagibioni na womberi watyetiziwa kulugongu pahala pakumguwila Mtuwa Mlungu, woseri saba wafuwa pamuhera. Wantu awa walagitwi mumashaka ga kwanja ga mabenu ga shayili.

10 Risipa mhinga gwa Ahiya katoliti nguwu ya lifafa, kayalika kulitalawu. Kalikaliti panu kwanjira kwanja kwa kubenanga mpaka shaka sha mvula pashisokiti na kugatowera mauti. Shaka shoseri ashi, kawawingiti wampongu wa kuliyera na vigongolu, pashiru na paliwala, su nawagasegelera mauti aga.

11 Dawudi pakapikiniriti galii gakatenditi Risipa mhinga gwa Ahiya, mdala gwa kunja gwa Sauli, 12 Kagenditi na kuitola mihonju ya Sauli na mwana gwakuyi yawamshema Yonatani kulawa wenikaya wa Yabeshi Gileadi, yawaweriti wiwa kulawa luwaga lwa wantu woseri aku Beti Sheani, kweni Wafiristi waweriti wamtyetiziya Sauli na Yonatani lishaka lilii Wafiristi pawamlagiti Sauli kulugongu Giliboa. 13 Su, Dawudi kayiwuziya mifupa ya Sauli na Yonatani mwana gwakuyi kulawa aku, shakapanu wajojonira mifupa ya wantemba saba yawatyetiziwitwi. 14 Su wayisira mifupa ya Sauli na Yonatani mwana gwakuyi muisi ya Benjamini, aku Sela mulisembi lya Kishi tati gwakuyi Sauli. Watenditi kila shintu sheni mfalumi kawalagaliriti. Pa aga, Mlungu kakupikinira kulira kwawu muisi yawu.

15 Shakapanu Wafiristi walikomangiti nkondu kayi na Waisraeli. Dawudi na wamashonta wakuyi wagenda kulikomanga na Wafiristi. Aku Dawudi katokiti nentu. 16 Ishibi Benobu, yumu gwawu gwa walera wa Refayi likambaku kana mgowa gwakuyi gwa shaba guweriti na utopa wa kilu ntatu na nusu na yakaweriti kalitawa ligumba lyasyayi pakalonga hakamlagi Dawudi. 17 Kumbiti Abishai mwana gwakuyi Seruya, kagenditi kumtanga Dawudi. Abishai kamkomiti Mfilisti ulii na kumlaga. Hangu, wamashonta wamlapira Dawudi pawalonga, "Hapeni tugendi kayi na gwenga kunkondu, toziya gwenga gwa litumbiru lya Israeli na tufira ndiri kuliyagamiziya."

18 Pa aga, kulawiriti kayi makomangu na Wafiristi aku Gobu. Aku Sibekayi kulawa Husha, kamlagiti likambaku Safu yakaweriti yumu gwa walera wa Warefayi.

19 Kulawiriti kayi na makomangu na Wafiristi aku Gobu. Elihani mwana gwa Yaare oregimu kulawa Betilehemu, kamlagiti Goliyati kulawa Giti, mhanya gwa mgowa gwakuyi handa mtera mkulu gwa mtuga mbewa.

20 Shakapanu kulawiriti kayi nkondu aku Gati kweni kuweriti na muntu yumu kaweriti mtali nentu na kana vyala sita mukila shiwoku na vyala sita mukila ligulu, jumla yakuyi vyala ishilini na msheshi. Yomberi viraa kaweriti mwiwuka gwa makambaku. 21 Pakawajongeriti Waisraeli, Yonatani mwana gwa Shimeyi, mlongu gwakuyi Dawudi, kamlagiti.

22 Wamsheshi awa yawaweriti wiwuka wa makambaku shiwuku sha Warefayi aku Gati na womberi walaguwitwi na Dawudi pamuhera na wamashonta wakuyi.