1 Lishaka limu, Dawudi kakosiyiti, "Hashi, kwana muntu yoseri yakasigaliti mukaya ya Sauli? Handa kwanayu, menfiri kumtendera maheri toziya ya Yonatani."

2 Kuweriti na ntumintumi gwa walongu wa Sauli yawamshemiti Siba. Siba wamshemiti kugenda kwa Dawudi. Mfalumi Dawudi kamkosiyiti,

"Hashi gwenga ndo Siba?" Yomberi kankula, "Yina, neni ndo ntumintumi gwakuyi Siba."

3 Mfalumi kamkosiya, "Hashi, kwahera muntu yakasigala mukaya ya Sauli? Handa kwanayu, menfiri kumtendera maheri ga Mlungu."

Siba kamwankula, "Kwana mwana gwa Yonatani, kumbiti yomberi ndo shikwawakwawa."

4 Mfalumi kamkosiya, "Ka koshi?" Siba kankula,

"Ka ukayu kwa Makiri mwana gwa Amieli aku Lo Debali." 5 Su, Mfalumi Dawudi kawalagalira wantu na yomberi kajegwa kulawa mnumba ya Makiri mwana gwa Amieli aku Lo Debari.

6 Mefibosheti mwana gwa Yonatani viraa mzukulu gwa Sauli wagenda kwa mfalumi Dawudi, waguwa makukama kulongolu kwa mfalumi Dawudi. Dawudi kamshema, "Mefibosheti." Yomberi kamwankula, "Yina! Neni panu ntumintumi gwaku"

7 Dawudi kamgambira, "Nagutiara. Neni hanikutenderi maheri toziya ya tati gwaku Yonatani. Litapaka lilii lyoseri lyaliweriti lya mbuyi gwaku Sauli hanikuwuziliri. Gwenga mashaka goseri hagulii pameza pa neni."

8 Mefibosheti kasuntamala na kulonga, "Neni na handa ng'ang'a kafuwa, ntambu gaa guntenderi ntambu ayi?"

9 Shakapanu mfalumi Dawudi kamshema Siba ntumintumi gwa Sauli, kamgambira, "Lunda yoseri ilii yayiweriti ya Sauli na ya kaya yakuyi nimpanana mzukulu gwa mtuwa gwaku. 10 Gwenga na wana waku na wantumintumi waku hamuweri mwankumlimira Mefibosheti na hammujegeri mabenangu su mzukulu gwa mtuwa gwaku kaweri na shiboga mashaka goseri. Kumbiti yomberi hakaliyi pameza pangu." Shaka ashi, Siba kaweriti na wana wapalu lilongu na mhanu na wantumintumi ishilini.

11 Shakapanu, Siba kamgambira mfalumi, "Neni ntumintumi gwaku, hantendi goseri gagulongiti."

Su, Mefibosheti kawera kankupata shiboga shakuyi pameza pa Dawudi, handa yumu gwawu gwa wana wa mfalumi. 12 Mefibosheti kaweriti na mwana mdidini mpalu yawamshemiti Mika. Wantu woseri wa walongu wa Siba waweriti wantumintimi wa Mefibosheti. 13 Hangu, Mefibosheti yakaweriti shikwakwawa kankulikala kumji gwa Yerusalemu na kupata shiboga shakuyi pameza pa mfalumi mashaka goseri.