1 Dawudi kawajojoniriti wantu elufu selasini wa Israeli yawasyagulitwi. 2 Yomberi na wantu wakuyi woseri walawa Bala ya Yuda wajega lisandiku lya Mlungu kulawa aku, lyalimaniziya litawu lya Mtuwa Mlungu yakana makakala, mweni kalikala muukulu wakuyi yawuwera pampindi pa lisandiku ali. 3 Shakapanu, walitola lisandiku lya Mlungu kulawa mnumba ya Abinadabu yakaweriti kulugongu, walikweneziya mumbutuka ya syayi ya kukwegwa na ng'ombi. Uza na Ahio wana wa Abinadabu waweriti wankwendesha mbutuka yasyayi ayi, 4 Ahio kaweriti kalongolera kulongolu kulisandiku ali lya Mlungu. 5 Dawudi na wantu woseri wa Israeli, pawawera wankwimba lwimbu na kuvina kwa likakala lyawu lyoseri, kulongolu kwa Mtuwa Mlungu. Pawagomba zezi na vinubi na vinanda na matali na kayamba na matowazi.

6 Pawasokiti kuluwaga lwa kukomera viboga vya Kidoni, Uza kalitalipisiyiti liwoku lyakuyi na kulikola lisandiku lya Mtuwa Mlungu toziya wang'ombi walii walikwaliti. 7 Panu, maya ga Mtuwa Mlungu gakalipa kwa Uza. Mtuwa Mlungu kamlaga palapalii. Uza kahowa palapalii kumbwega kulisandiku lya Mtuwa Mlungu. 8 Na Dawudi kakalaliti kwa kuwera Mtuwa Mlungu ntambu yakamtendiriti Uza kwa maya. Hangu, pahala palii pashemwa Peresi Uza mpaka leru.

9 Lishaka ali Dawudi kamtiriti Mtuwa Mlungu pakalonga, "Vinu halinizili hashi kwaneni lisandiku lya Mtuwa Mlungu?" 10 Hangu, Dawudi kaweriti ndiri kala kulijega lisandiku lya Mtuwa Mlungu mngati mwa lushi lwa Dawudi, ila Dawudi kalijegiti ukaya kwa Obedi Edomu, muntu gwa kulawa mji gwa Gati. 11 Lisandiku ali lya Mtuwa Mlungu lilikaliti ukaya kwa Obedi Edomu miyezi mitatu na Mtuwa Mlungu kamtekelera Obedi Edomu pamuhera na kaya yakuyi.

12 "Mfalumi Dawudi pakapikiniriti kuwera Mtuwa Mlungu kawatekelera walongu wa Obedi Edomu na vintu vyoseri vyakaweriti navi toziya ya lisandiku la Mtuwa Mlungu, hangu Dawudi kagenda kulitola lisandiku lya patanu kulawa ukaya kwa Obedi Edomu na kujega kulushi lwa Dawudi kwa sheleku nkulu." 13 Wantu walii yawalijegiti lisandiku lwa Mtuwa Mlungu kila pawagenditi atuwa sita, Dawudi kalaviyi tambiku ya ng'ombi shipalu na ng'ombi shididini yumu kanenepa. 14 Dawudi pakaweriti kalitawa nguwu yakuvala pashifuwa kalitawa mshunu mwakuyi kavina kwa likakala lyakuyi lyoseri kulongolu kwa Mtuwa Mlungu. 15 Hangu, yomberi na Waisraeli woseri walijegiti lisandiku lya Mtuwa Mlungu mpaka kumji gwa Dawudi kwa nemeleru na liziwu likulu lya talumbeta.

16 Lisandiku lya Mtuwa Mlungu paliweriti lyankwingira kumji gwa Dawudi, Mikali mhinga gwa Sauli kasunguliliti kulidilisha kamwona mfalumi Dawudi kankugulukaguluka na kuvina kulongolu kwa Mtuwa Mlungu, Su, kamwona shintu ndiri kumoyu kwakuyi. 17 Shakapanu waliyingiziya lisandiku lya Mtuwa Mlungu mngati mulilingu lyakalinyawiti Dawudi na kalitula lisandiku ali pahala pakuyi. Na Dawudi kalaviya tambiku za kulunguziya na tambiku za ponga kulongolu kwa Mtuwa Mlungu. 18 Dawudi pakamaliliti kulaviya tambiku za kulunguziya na za ponga, kawatekeleriti wantu kwa litawu lya Mtuwa Mlungu yakana uwezu, 19 na kawabagulira wantu woseri wa Waisraeli shiboga, wapalu na wadala, kila yumu kampanana libumunda na shipandi sha shinofu na libumunda lya zabibu. Shakapanu, wantu woseri wawukiti, kila muntu kawuya ukaya kwakuyi.

20 Dawudi pakawuyiti ukaya kwakuyi su kuwatekelera wantu wa kaya yakuyi, Mikali mhinga gwa Sauli, kagenditi kumwanka pakalonga, "Iwera hashi leru mfalumi gwa Israeli kalipanana ndiri ligoya na kugendagenda shivula kulongolu kwa wantumintumi wakuyi wapalu na wadala handa mngali mahala ntambu yakavula nguwu zakuyi kulongolu kwa wantu pota soni!"

21 Dawudi kamgambira Mikali, "Weriti nankuvina kulongolu kwa Mtuwa Mlungu mweni kasyaguliti neni pa tati gwaku na walongu waku, su kasyagula neni weri mkulu kwa Israeli, wantu wakuyi Mtuwa Mlungu, hangu neni havini hera kulongolu kwa Mlungu. 22 Neni hanilisulusiyi namweni nentu kuliku vinu. Gwenga gumona neni shintu ndiri, kumbiti awa wantumintumi wadala yaguwatakula hawampanani neni ligoya!"

23 Su Mikali mhinga gwa Sauli kaweriti ndiri na mwana mpaka kuhowa kwakuyi.