1 Shakapanu wantu woseri wa Israeli wamgenderiti Dawudi aku Hebroni na kumgambira, "Guloli, twenga ndo walongu waku nakamu. 2 Mashaka gapititi, Sauli mfalumi gwetu gwenga ndo guwalongoliti Waisraeli munkondu na Mlungu kakugambiriti haguweri mlolera gwa wantu waneni Israeli na haguweri mkolamlima gwa Israeli." 3 Su, wazewi woseri Israeli wamgendera mfalumi Dawudi aku Hebroni na yomberi katenda lipatanu na womberi kulongoru kwa Mtuwa Mlungu na kumswaga lipaki kuwera mfalumi gwa Israeli. 4 Dawudi kaweriti na vinja selasini pakanjiti kukolamlima na kakolitimlima kwa shaka shavinja arobaini. 5 Aku Hebroni, Dawudi kakolitimlima wantu wa Yuda kwa shaka sha vinja saba na myezi sita na aku Yerusalemu kakolitimlima wantu wa Israeli pamuhera na Yuda kwa shaka sha vinja selasini na tatu.

6 Lishaka limu mfalumi na wantu wakuyi wagenditi Yerusalemu kuwakomanga Wayebusi yawaweriti wenikaya wa mji agu. Kumbiti womberi wamgambira Dawudi, "Hapeni gwingiri kumji agu." Toziya wana lwisi na vikwawakwawa hawakuwingiri kutali kumji agu. Wamgambiriti hangu toziya waliholiti handa "Dawudi hapeni kingili kumji agu." 7 Hata hangu, mfalumi Dawudi kalilopoliti liboma lya Siyoni, lweni lushi lwa Dawudi.

8 Lishaka ali, Dawudi kalongiti, "Muntu yoseri yakafira kuwakoma Wayebusi na kapitiri kulushemba lwa mashi su kukomanga vikwawakwawa na wanalwisi weni awa rohu ya neni iwakalalira," Toziya wantu walonga, "Wanalwisi na vikwawakwawa hapeni wingiri mnumba nkulu ya Mtuwa Mlungu."

9 Dawudi kalikaliti kuliboma ali na lushi lweni kalushema, lushi lwa Dawudi. Shakapanu Dawudi kanyawiti lushi kuluzyengeta, kanjiriti Milo mpaka mngati. 10 Na Dawudi kongereka kuwera na makakala nentu toziya Mtuwa Mlungu, Mlungu gwa Mashonta, kaweriti pamuhera na yomberi.

11 Shakapanu, mfalumi Hiramu gwa Tiro kawalagalira walagilagi kwa Dawudi, kamjegiliti viraa mierezi, wasongola mbawu na wasongola mabuwi weni yawamnyawiriti Dawudi liboma. 12 Hangu, Dawudi kavimana handa Mtuwa Mlungu kamtenda kaweri mfalumi gwa Israeli na kawukuliziya ufalumi wakuyi toziya ya wantu wakuyi wa Israeli.

13 Dawudi kalitoliliti wadala wa kunja na wadala wakayugiti nentu aku kumji gwa Yerusalemu pakalawiti kala Hebroni. Awa wamleleriti wana nentu wapalu na wadala. 14 Aga ndo matawu ga wana wapalu, wadala wakuyi yawamwiwuliliti aku Yerusalemu: Shamua na Shobabi na Natani na Selemani, 15 Ibihari na Elishua na Yafia, 16 Elishama na Eliada na Elipeleti.

17 Wafilisti pawapikiniriti handa Dawudi wamwitira lipaki kuwera mfalumi gwa Israeli, wamashonta woseri walawa kugenda kumsakula, kumbiti yomberi kapatiti visoweru, kingira mngati mwa liboma. 18 Vinu Wafilisti wasokiti na kuliyananga kululalanda lwa Refaimu. 19 Su, Dawudi kamkosiyiti Mtuwa Mlungu shakutenda, "Hashi, ng'endi kuwakomanga Wafilisti? Hashi, hagutendi niwakanki?" Na Mlungu kamgambira Dawudi,

"Gugendi, toziya nakaka hanikutendi guwakanki Wafilisti!"

20 Su, Dawudi kasoka Baali Perasimu na kawakanka Wafilisti. Shakapanu kalonga, "Mlungu kapita pakati pa wankondu wangu handa lilawa lya mashi yagatuga." Hangu pahala panu pashemuwa Baaali Perasimu. 21 Wafilisti wavilekiti vinyagu vyawu vya wamlungu pahala panu na Dawudi na wantu wakuyi wavitola vinyagu avi.

22 Kwa mala ya pili, Wafilisti wasokiti kayi na kuliyananga kululalanda la Refaimu. 23 Dawudi kamluwiti Mtuwa Mlungu shakutenda, Mtuwa Mlungu kamgambira "Naguwakomanga kulawa paguwera, ila guzyengeti na kuwakomanga kulawa pakwegera na mitera ya Mizabibu. 24 Katepu pampikinira kulindima handa liziwu lya lishonta lyankupita kuupeleru wa mizabibu ayi, panu guligangamaziyi toziya neni Mtuwa Mlungu haweri ndawira su kukulongoleri kulikoma lishonta lya Wafilisti." 25 Dawudi katenditi ntambu yakagambiritwi na Mtuwa Mlungu na yomberi kawakomanga Wafilisti kulawa Geba mpaka Gezeri.