1 Pa aga ayu mfalumi Nashashi gwa Waamoni kahowa na mwana gwakuyi yawamshemiti Hanuni kawera mfalumi pa tati gwakuyi. 2 Mfalumi Dawudi kalonga, "Hanimtenderi uheri Hanuni, mwana gwa Nashashi handa tati gwakuyi ntambu yakantenderiti." Hangu, Dawudi katumiti walagilagi kugenda kumkola mawoku.

Na walagilagi wa Dawudi pawasokiti muisi ya Waamoni, 3 Wakulu wa Waamoni wamgambiriti mtuwa gwawu, Hanuni, "Hashi, gulihola handa Dawudi kwa kukutumira wantu kwiza kukukola mawoku kulanguziya kampanana ligoya tati gwakuyi? Hashi, Dawudi kawatuma ndiri wantu awa kwaku su kululolalola lushi shakapanu walulopoli?"

4 Su, Hanuni kawabatiti walagilagi awa wa Dawudi kamumoga kila yumu uwega wumu wa shirevu shakuyi, kazideganga nguwu zawu pakati mpaka kumataku, shakapanu kawaleka wagendi zawu. 5 Wawoniti soni kuwuya ukaya. Dawudi pakagambiritwi visoweru avi katuma wantu kuwawanka toziya walagilagi awa wawoniti soni nentu. Na mfalumi kawagambira, "Mlikali kumji gwa Yeriku, mpaka pamumera ndevu, shakapanu muwuyi ukaya."

6 Waamoni pawawoniti kuwera wamkalaziya Dawudi, wakoditi mashonta Waalamu elufu ishilini yawagenda kwa magulu kulawa Beti Rehobu na Soba, mashonta elufu kumi na mbili, kulawa Tobu na mfalumi Maaka pakawera na wamashonta elufu yimu

7 Dawudi pakapikiniriti visoweru avi, kamtuma Yoabu kugenda na lishonta loseri la wagangamala. 8 Waamoni walawiti na kulipanga kala kwa nkondu ligomi likulu lwa mji gwa Raba, ali liweriti liboma lyawu. Waalamu kulawa Soba na Rehobu na wantu kulawa Tobu na Maaka walipangiti kushiwala.

9 Yoabu pakawoniti kuwera nkondu ikalipa kwa yomberi, kulongolu na kumbeli, kawasyaguliti wamu wa mashonta wa Waisraeli wagangamala nentu kawapanga su kulikoma na Waalamu. 10 Mashonta wamonga walii wasigaliti kawatuliti pasi pa ulonguziya wa mlongu gwakuyi Abishai, na yomberi kawapanga su walikomangi na Waamoni. 11 Yoabu kamgambira Abishai, "Payiwera Waaramu hawanganki, haguntangi kumbiti handa Waamoni hawakukanki, hanizi kukutanga. 12 Kumbiti guliyupi moyu! Tulikomi pota kutira toziya ya wantu wetu na toziya ya mji gwa Mtuwa Mlungu gwetu na yomberi Mlungu hakatutenderi lilii lyakawona ndo liheri kwakuyi!"

13 Su, Yoabu na wantu wakuyi wagenditi kulongolu kugenda kulikoma na Waalamu na womberi Waaramu watira. 14 Waamoni pawawoniti kuwera Waaramu watira, na womberi viraa wamtira Abishai na wingira mjini. Yoabu kaleka kulikoma na Waamoni, kawuya Yerusalemu.

15 Kumbiti Waalamu pawawoniti handa Waisraeli wasinda, walijojonira pamuhera. 16 Hadadezeri kalagalira Waalamu yawaweriti kumwambu kulushemba Eufrati wajegwi, wagegerwi aku Helamu pawalonguziwa na Shobaki mkulu gwa lishonta lya hadadizeri. 17 Dawudi pakapatiti visoweru avi, kawajojonira pamuhera Waisraeli woseri, kaloka lushemba Yoridani na kugenda mpaka Helamu. Waaramu womberi walipangiti kala su walikomangi nkondu na Dawudi, wanja kulikoma na yomberi. 18 Kumbiti Waalamu watiliti kulongolu kwa Waisraeli. Dawudi kawalagiti Waalamu mia saba yawaweriti waendesha mbutuka za nkondu na wakwena farasi elufu alubaini. Viraa wamtenditi Shobaki mkulu gwa lishonta lyawu na yomberi kahowa palapalii. 19 Shakapanu wafalumi yawaweriti wantumintumi wa Hadadezeri pawawoniti kuwera wasinda na Waisraeli, watenditi lipatanu lya ponga na Israeli na womberi wajimirwa kukolwamlima na Israeli. Hangu Waalamu wajeriti ndiri kayi kuwatanga Waamoni.