1 Dawudi pakaweriti kapita patali shididini upeleru wa lugongu, Siba ntumintumi gwa Mefibosheti kamwankiti Dawudi pakawera na punda wawili weni waweriti wapapa mabumunda miya mbili na visana miya yimu vya zabibu iyuma na mabwajubwaju gawula na shihaku sha likuli shashimemiti divayi. 2 Mfalumi Dawudi kamkosiya Siba, "Ntambu gaa gujega vintu avi?"

Siba kamwankula, "Punda toziya ya kukwena wantu wa kaya yaku, mabumunda na mabwajubwaju toziya ya wantemba woseri na divai toziya yawafila kutoka kushiwala."

3 Mfalumi kamkosiya, "Mwana gwa mtuwa gwaku kakoshi?" Siba kamgambira mfalumi,

"Yomberi kasigala kumji gwa Yerusalemu," Siba kankula, "Toziya kalihora handa wantu wa Israeli hawamwuziliri ufalumi wa Sauli mbuyi gwakuyi."

4 Mfalumi kamgambira Siba, "Su, kila shintu shakaweriti nashi Mefibosheti vinu ndo shaku." Siba kamwankula,

"Mayagashii, mtuwa gwangu mfalumi na neni nduwa mpati kujimilika kulongolu kwaku mashaka goseri!"

5 Mfalumi Dawudi pakasokiti kulii Bahurimu, kalawiliti muntu yumu gwa lukolu lwa Sauli, litawu lyakuyi Shimeyi mwana gwa Gera, kanja kumpangira Dawudi. 6 Kawera kankumgumira mabuwi mfalumi Dawudi pamuhera na wantumintumi wakuyi. Wantu wamonga woseri na wamashonta pawawera wankumzyengeta Dawudi uwega wa kumliwu na kumshigi. 7 Shimeyi kampangiriti Dawudi pakalonga, "Guwuki! Guwuki! Gwenga muntu yagulaga! Gwenga muntu ndiri! 8 Mtuwa Mlungu kakuwuzililira kwa kwita mwazi gwa wantu woseri wa kaya ya Sauli, vinu Mtuwa Mlungu kampanana ufalumi Abisalomu mwana gwaku.Guloli, makomangu hagakupati toziya gwenga ndo mlaga."

9 Hangu Abishai mwana gwa Seruya, kamgambira mfalumi, "Ntambu gaa ng'ang'a ayu kafuwa kakupangiri gwenga mtuwa gwangu mfalumi? Gunjimiri nimgenderi na kumlikitula mtuwi gwakuyi!"

10 Kumbiti mfalumi kamgambira, "Hashi, kwana shishi pakati pangu na mwenga wana wa Seruya,? Payiwera Mtuwa Mlungu kamgambira kampangiri Dawudi, gaa vinu kaweza kukosiya, iwera hashi gutenda hangu?" 11 Kayi mfalumi Dawudi kamgambira Abishai na wantumintumi wakuyi woseri, "Payiwera mwana gwangu namweni kafira kundaga, hashi nentu ndiri kwa muntu gwa likabila lya benjamini? Mwenga mumleki kampangiri toziya Mtuwa Mlungu kamlagalira kampangiri neni. 12 Pamonga Mtuwa Mlungu kalola ntabiku yangu na yomberi kandipa uheri kwa pangira ayi yampata leru." 13 Hangu mfalumi Dawudi na wantu wakuyi wendereya na mwanja aku Shimeyi kawera kankumfata pakamwasira mabuwi na kumutimulila madikudiku mfalumi Dawudi. Shimeyi kaweriti kakutyanga kulugongu, pakalolana na mfalumi Dawudi. 14 Shakapanu mfalumi pamuhera na wantu woseri yawaweriti na yomberi, wasokiti kulushemba Yoridani pawawera watoka, su woyera.

15 Shaka ashi, Abisalomu na wantu woseri wa Israeli, wagenda kumji gwa Yerusalemu na Ahitoferi kaweriti pamuhera na womberi. 16 Hushayi kulawa Ariki, ganja gwa Dawudi, kamgendera Abisalomu, kamgambira, "Gulikali mashaka gavuwa mfalumi! Gulikali mashaka gavuwa mfalumi!"

17 Abisalomu kamkosiya Hushayi, "Hashi, awu ndo ufiru waku kwa ganja gwaku Dawudi? Ntambu gaa gugenda ndiri pamuhera na ganja gwaku?"

18 Hushayi kamwankula, "Ndala! Toziya ulii yakasyagulwa na Mtuwa Mlungu na wantu awa na wantu woseri wa Israeli, ayu ndo yansigali nayu. 19 Nentu ya aga, hashi, hanimtenderi gaa? Hashi, mwana ndiri gwa ganja gwangu? Su, ntambu yanimtenderiti tati gwaku, viraa hanikutendera gwenga."

20 Abisalomu ndo pakamgambiriti Ahitofeli, "Gung'ambiziyi shakutenda, tutendi hashi?"

21 Ahitofeli kamgambira Abisalomu, "Guwagonji wadala wa kunja wa tati gwaku weni kawalekiti kulolera numba yakuyi. Shakapanu wantu woseri wa Israeli pawapikinira handa gulitenda gukalalirwi na tati gwaku, panu wantu woseri yawaweriti pamuhera na gwenga hawapananwi likakala." 22 Hangu, wantu wamnyawira Abisalomu liringu kushitwiku na yomberi kagonja na wadala wa kunja wa tati gwakuyi na wantu woseri wa Israeli pawawera wankumlola.

23 Mashaka aga, litakulu lyoseri lyakalaviyiti Ahitofeli liweriti handa lilaviwa na Mlungu. Na litakulu lyakalaviyiti Ahitofeli lipananitwi ligoya na Dawudi na Abisalomu.