1 Mtuwa Mlungu kawakalaliriti kayi Waisraeli, kamsongiziya Dawudi kwa womberi, "Kamgambira Dawudi kawawalangi wantu wa Israeli na wantu wa Yuda." 2 Hangu, mfalumi kamgambira Yoabu na mkulu gwa lishonta yawaweriti pamuhera na yomberi, "Mgendi mumakabila goseri ga Israeli kulawa Beeri Sheba yayiwera uwega wa kusika mpaka Dani yayiwera uwega wa kushana, muwawalangi wantu su mpati kuvimana walanga yawu."

3 Kumbiti Yoabu kamgambira mfalumi, "Mtuwa Mlungu, Mlungu gwaku na kawongeri Waisraeli mala miya kuliku ntambu yawawera vinu na gwenga mtuwa gwangu mfalumi gupati kulola yongeleka ayi kwa masu gaku gamweni. Kumbiti, ntambu gaa gwenga mtuwa gwangu mfalumi gufira kutenda hangu?" 4 Kumbiti litakulu lya mfalumi liweriti na likakala nentu kwa Yoabu na wakulu wa lishonta! Su, Yoabu na wakulu wa lishonta wawuka kulongolu kwa mfalumi wagenda kuwawalanga Waisraeli.

5 Walokiti lushemba lwa Yoridani nakutula ngonjeru kushana mwa Aroeri mumji yaguwera kululalanda lwalugenda Gadi Mpaka Yazeri. 6 Wagenda muisi ya Gileadi shakapanu Kadeshi muisi ya Wahiti, su wasoka Dani na kulawa Dani wazyengeta kugenda Sidoni, 7 shakapanu wagenditi kuliboma lya mji gwa Tiro, wingira kumiji yoseri ya Wahivi na Wakanaani. Pawamaliliti, wagenditi uwega wa kushana mwa Yuda aku Beeri Sheba. 8 Iwatola miezi tisa na shaka ishilini kuuzyengeta isi yoseri, Shakapanu wawuya Yerusalemu. 9 Shakapanu Yoabu kamjegeriti mfalumi walanga ya wantu. Muisi ya Israeli kuweriti wapalu laki nani yawaweza kulikoma nkondu na muisi ya Yuda, kuweriti na wapalu laki tanu yawaweza kulikoma nkondu.

10 Kumbiti moyu gwakuyi Dawudi guweliti gumtama nentu pa kuwawalanga wantu. Hangu, Dawudi kamgambira Mtuwa Mlungu, "Ntenda Vidoda vikulu kwa shitendu shantenditi. Kumbiti vinu, gwee Mtuwa Mlungu, nikuluwa gunekiziyi neni ntumintumi gwaku, toziya ntenda shitwatira sha ungalimahala nakamu."

11 Pamberi Dawudi keniimuki mandawira yakuyi, shaka ashi Mtuwa Mlungu kampananiti ulagilagi mbuyi gwa Mlungu Gadi mlola gwa mfalumi Dawudi, pakalonga, 12 "Gugendi gwakamgambiri Dawudi hangu. Mtuwa Mlungu kalonga hangu. Hanikupanani mirandu mitatu na gwenga gulisyaguliri gumu na neni hanikutenderi." 13 Hangu, mlola Gadi kamgendera Dawudi na kumgambira, "Hashi, gufira njala ya mivinja saba isoki kuisi yaku? Ama hashi, gwenga guwatugi wankondu waku kwa miezi mitatu pawakutugiziya? Ama kuweri na mashaka matatu geni isi yaku hayiweri na malweri madoda? Guliholi gunupi lyankulu lyanfira kumpanana yomberi yakantumiti."

14 Dawudi kamwankula mbuyi gwa Mlungu Gadi, "Nana lyoga likulu! Mbaka nkomangwi na Mtuwa Mlungu, kuliku kutuluwa mumakakala ga wantu, toziya yomberi kana lusungu nentu."

15 Su, Mtuwa Mlungu kawajegera Waisraeli malweri, kwanjira mandawira mpaka shaka shashitulitwi. Wantu elufu sabini wahowiti muisi yoseri kulawa Dani ya uwega wa kushana mpaka Beeri Sheba ya uwega wa kusika. 16 Kumbiti shaka ntumintumi gwa kumpindi yakatalipisiyiti liwoku lyakuyi su kukomanga mji gwa Yerusalemu. Mtuwa Mlungu kagalambula nfiru yakuyi. Mtuwa Mlungu kamgambira ntumintumi gwa kumpindi ayu yakatenditi malaga kwa wantu, "Goyi, guwuziyi ligumba lyaku." Ntumintumi gwa kumpindi gwa Mtuwa Mlungu kaweriti kagoloka pakwegera na luwaga lwa kukomera viboga lwa Arauna, muntu gwa likabila lya Yebusi.

17 Dawudi pakamwoniti ntumintumi gwa kumpindi ulii yakaweriti kankuwalaga wantu, kamgambiriti Mtuwa Mlungu, "Guloli, Neni ndo ntenda vidoda! Wantu awa watenda ndiri ukontola. Nikuluwa Nentu gunkomangi neni na walongu wa tati gwangu."

18 Lishaka liraali Gadi kamgendera Dawudi, kamgambira, "Gukweni pampindi, muluwaga lwa kukomera viboga lwa Arauna muntu gwa likabila lyab Yebusi gwakamnyawiri Mtuwa Mlungu shitalawanda." 19 Su Dawudi kakwena pampindi kulawirana na shisoweru sha Gadi gambira Mtuwa Mlungu ntambu yakamgambiriti. 20 Arauna pakaloliti uwega wa pasi kamwoniti mfalumi na wantu wakuyi pawamwizira, yomberi kalawa kagenda na kumsundamalira mfalumi, kang'ong'onala mpaka pasi palitapaka. 21 Shakapanu Aruana kamkosiya mfalumi, "Ntambu gaa mtuwa gwangu mfalumi gunizira neni ntumintumi gwaku?"

Dawudi kamwankula, "Niza kuhemera luwaga lwaku lwa kukomera viboga su nimnyawiri Mtuwa Mlungu shitalawanda sha kutambikira su ulweli upeli."

22 Arauna kamgambira Dawudi, "Mtuwa gwangu mfalumi, gutoli shoseri shaguwona shifaa na gulaviliri tambiku. Neni ndaviya wang'ombi washipalu wa tambiku ya kulunguziwa na vintu avi vya kukomera na vipingili vya kutawira ng'ombi kuwera mbawu." 23 Vyoseri avi, gwee mfalumi nikupanana, "Nivimana Mtuwa Mlungu, Mlungu gwaku, hakayijimiri tambiku yaku."

24 Kumbiti mfalumi kamgambira Arauna, "Ndala! Gwenga nagumpanani shoseri pota kuhemera. Hanivihemeri kwa gwenga kwa beyi yakuyi. Hapeni nimlaviliri Mtuwa Mlungu, Mlungu gwangu, tambiku za kulunguziwa zeni hanenilaviyi shintu." Hangu, mfalumi Dawudi kahemeliti luwaga lwa kukomera viboga na ng'ombi shipalu na vipandi hamusini vya madini ga feza. 25 Shakapanu Dawudi kamnyawira Mtuwa Mlungu shitalawanda pahala panu na kumlavilira tambiku za kulunguziwa na za ponga. Hangu Mtuwa Mlungu kagajimira maluwa ga Dawudu na ulweli woya muisi ya Israeli.