1 Mfalumi Dawudi, shaka pakaweriti mzewi nentu, wantumintumi wakuyi wamgibikiriti mabulangeti, kumbiti ata hangu kapatiti ndiri livuki. 2 Wantumintumi su wamkosiya, "Mtuwa gwetu mfalumi, mbaka tukusakulili yakayalamiti kakutenderi na kakuloli weri. Kakukisikili, su kakupanani livuki." 3 Shakapanu wasakulasakula mhinga kaherepa koseri isi Israeli, wampata mdala yumu kaherepa wamshema Abishagi, kulawa Shunami, wamjega kwa mfalumi. 4 Mdala ayu kaweriti kaherep nentu, na kanja kumtendera mfalumi na kumlolera, kumbiti kagonja nayu ndiri.

5 "Shaka ashi, Adoniya mweni mawu gwakuyi kaweriti Hagiti kalikweniziyi kalonga neni hanilitendi mfalumi mweni, kalitandiliti mbutu za kukwega na wakwena farasi na watuga mbiru hamsini wakumlongolera na kumnemelera."

6 Kumbiti tati gwakuwi Dawudi, kaweriti kamkalipira ndiri mwana gwakuyi ata mala yimu na kumkosiya ntambu gaa kankutenda hangu. Viraa virii Adoniya nakaka kaniti sheni sheherepa nentu, kwa kwiwuka kaweriti kamfata Abasalomu kwa kwiwuka. 7 Adoniya walitakuziya na Yoabu mwana gwa Seruya na mtambika Abiyatali na womberi wamfata na wajimilirana. 8 Kumbiti mtambika Zadoki na Beneya, mwana gwa Yehoyada na Natani na Shimei na Rei, pamuhera na walolira wa Dawudi wamjimira ndiri Adoniya.

9 Lishaka limu Adoniya kalaviyiti shijungu sha ng'ombi na kondolu na ng'ombi mwana yawaweriti tawi kulibuhi lya njoka, pakwegera na mbwiru yawaishema Erogeli. Kawashemera walongu wakuyi woseri, wana wa Mfalumi Dawudi na wantumintumi woseri wa mfalumi yawaweriti wa likabila lya Yuda. 10 Kumbiti mbuyi gwa Mlungu Natani na Beneya na walolira wa mfalumi na Selemani mlongu gwakuyi kawashemera ndiri.

11 Shakapanu Natani kamgendera Batisheba mawu gwa Selemani, na kamkosiya, "Hashi gupikanila ndiri handa Adoniya mwana gwakuyi Hagiti, kalitenda mfalumi? Na Mfalumi gwetu Dawudi kashimana ndiri shintu! 12 Handa gufira kugalopoziya makaliru gaku na ga mwana gwaku Selemani, nikugambiziya hangu," 13 Gumgenderi Mfalumi Dawudi, gumkosiyi, hashi, mtuwa gwangu mfalumi, gunapira ndiri neni ntumintumi gwaku pagulonga, "Mwana gwaku Selemani hakaweri mfalumi pahala pa tati gwakuyi na hakalikali pashiti shaneni sha ukulu?" Iwera hashi, vinu Adoniya kakolamlima? 14 "Na paguwera gwankali gwankuyowera na mfalumi, haningiri na kuvitakula nakaka visoweru vyaku."

15 Su, Batisheba kamgendera mfalumi mushumba mwakuyi. Shaka ashi mfalumi kaweriti mzeyi nentu, na yomberi Abishagi kulawa Shunami kaweriti kankumtendera. 16 Batisheba kang'ong'onala kamsundamalira mfalumi, na mfalumi kamkosiya, "Gufira shishi?" 17 Batisheba Kamwankula, "Mtuwa gwangu, gunapiriti neni ntumintumi gwaku palongolu pa litawu lya Mtuwa Mlungu gwaku, pagulonga, Mwana gwaku Selemani kawera ufalumi pahala pa tati gwakuyi. 18 Vinu guloli Adoniya kankukolamlima, na gwenga mtuwa mfalumi guvimana ndiri shintu kuusu aga. 19 Kalaviya tambiku ya ng'ombi, na kondolu wavuwa na vyatawi, na kuwashema wana wa mfalumi Dawudi, na mtambika Abiyatali, na Yoabu mkulu gwa shonta, kumbiti wantumintumi wakuyi Selemani kamshemera ndiri. 20 Na vinu gwee mfalumi mtuwa gwangu, wantu woseri wa Israeli wankukuhepera, su guwagambiri gaa hakaweri mfalumi pahala pa tati gwakuyi. 21 Hera hangu ndiri, ayilawiri handa gwenga paguhowa neni pamuhera na mwana gwangu Selemani hatutozwi handa twana makosa." 22 Pakaweriti kankuyowera na Mfalumi, mbuyi Natani kingiriti kuliboma. 23 "Wamgambira mfalumi mbuyi Natani kapanu, kasoka na kamsuntamalira na kamng'ong'onalira mfalumi mpaka sheni shakuyi shisoka pasi." 24 Shakapanu Natani kamgambira, "Mtuwa gwangu, hashi, gulongiti, Adoniya hakaweri mfalumi pahala pa tati gwakuyi na hakalikali pampindi pa shiti shaneni sha shifalumi? 25 Toziya leru kasuluka kalaviyi shijungu sha ng'ombi na vya vyatawi na kondolu wavuwa na kawashemera wana wa mfalumi, wakulu wa mashonta na mtambika Abiyatali, na guloli, wankuliya na kulanda palongolu pakuyi na kulonga, 'Gulikali mashaka gavuwa mfalumi Adoniya! 26 Kumbiti kanshemera ndiri neni ntumintumi gwaku pota mtambika Sadoki ama Benaya mwana gwa Yehoyada ama ntumintumi gwaku Selemani. 27 Hashi goseri aga gugatenda gwenga mtuwa gwangu mfalumi pota kuwagambira wantumintumi waku muntu hakaweri mfalumi pahala pa tati gwakuyi?"

28 Mfalumi Dawudi kankula, "Gunshemeri Betisheba." Na kamgendera mfalumi na kugoloka palongolu pakuyi. 29 Shakapanu mfalumi kalilapa pakalonga, "Nakaka Mtuwa Mlungu ntambu yakalikala, yakayilopoziyiti neni muntabiku yoseri, 30 Ntambu yanililapiliti kulongolu kwa Mtuwa Mlungu gwa Israeli panongiti, kuwera mwana gwaku Selemani ndo hakakolimlima pa neni na hakaweri mfalumi pahala pa tati gwakuyi, na ashi ndo shanfira kutenda leru."

31 Ndo Batisheba pakang'ong'onaliti mpaka pasi na kalonga, "Mtuwa gwangu mfalumi Dawudi kalikali mashaka gavuwa!"

32 "Shakapanu mfalumi Dawudi kalonga, gunshemeri mtambika Sadoki, na mbuyi Natani na Beneya mwana gwa Yehoyada. Na womberi wamwiziliti mfalumi." 33 Mfalumi kawagambira, "Gugendi na wantumintumi wangu. Gumkweniziyi mwana gwangu Selemani pampindi pa punda farasi gwa neni, na gumseriziyi mpaka bwiru ya Gihoni, 34 shakapanu gumjimiri mtambika Sadoki na mbuyi Natani wamswagi lipaki kuwera mfalumi gwa Israeli. Mgombi lipenga na kulonga, mfalumi Selemani kalikali makaliru gavuwa! 35 Mwenga hamumgenderi na yomberi hakizi na kuwera mfalumi pahala pa tati gwakuyi na neni nimsyagula kaweri mkolamlima gwa Israeli na Yuda." 36 Beneya mwana gwa Yehoyada pakamwankuliti mfalumi, "Yina haa! Mtuwa Mlungu gwa mtuwa gwangu mfalumi na kalongi ntambu irahayi. 37 Handa Mtuwa Mlungu ntambu yakaweriti na mtuwa gwangu mfalumi, kaweri viraa na Selemani na kautendi ufalumi wakuyi uweri mkulu kuliku ufalumi wa mtuwa gwangu mfalumi Dawudi." 38 Su, mtambika Sadoki, na mbuyi Natani, na Benaya mwana gwa Yehoyada na Wakereti na Wapereti woseri waseleriti na kumkweniziya Selemani mupunda farasi gwa mfalumi Dawudi na kumjega mpaka Gihoni 39 Shakapanu mtambika Sadoki katoliti magoli ga lipaki lyakajegiti kulawa kuliringu linanaga na kumswaga lipaki Selemani kuwera mfalumi. Shakapanu wagombiti lipenga na wantu woseri pawalonga, "Kalikali mashaka mavuwa Mfalumi Selemani!" 40 Shakapanu wantu woseri wamfatiti, pawagomba filimbi na pawanemelera kwa sheleku nkulu, ata isi ibegiziwa kwa liziwu lyawu. 41 Su, Adoniya pamuhera na wahenga yawaweriti na yomberi wapikaniliti wantu awa pawamaliriti msambu. Na Yoabu pakapikaniriti liziwu lya lipenga kalongiti, "Umatu awu kumjini ndo wa shishi?" 42 Pakaweriti kankulonga, kumbiti, Yonatani mwana gwa mtambika Abiyatali, kingiriti. Shakapanu, Adoniya kalonga, "Gwingiri Toziya gwenga gwa muntu gwa mana handa gwenga, haguweri gutujegera shisoweru shiwagira." 43 Yonatani ndo pakamwankuliti Adoniya, "Ndala, toziya mfalumi Dawudi kamtenda Selemani kaweri mfalumi. 44 Na Mfalumi Kamjega pamuhera na mbuyi Sadoki, mbuyi Natani na Benaya mwana gwa Yehoyada na Wapiriti na Wakereti na womberi wamkweziya pampindi pa punda farasi gwa mfalumi, 45 Shakapanu mtambika Sadoki na mbuyi Natani wamswaga lipaki kaweri mfalumi kulii Gihoni. Hangu walawa panu pawanemelera, ndo toziya ya umatu awu yaguupikiniriti. 46 Vinu Selemani kawera mfalumi pahala pa tati gwakuyi. 47 Nentu ya aga, wantumintumi wa mfalumi wiziti kumzyuma mtuwa gwetu Mfalumi Dawudi pawalonga, Mlungu gwaku kalitendi litawu lya Selemani kuwera limanika kuliku lyaku, viraa hakaweri mfalumi pahala pa tati gwakuyi. Shakapanu mfalumi Dawudi kang'ong'onala na kuguwira mushitanda shakuyi, 48 na kuluwa pakalonga, kazyumwi Mtuwa Mlungu gwa Israeli, mweni katenda mwiwuku gwangu kuwera mfalumi pahala pa tati gwakuyi na yomberi kampanana makaliru ata nigawona aga."

49 Su, wahenga wa Adoniya watira nentu, na wawuka na kupalanganika. 50 Na Adoniya, toziya kamtiriti Selemani, katugiriti Muliringu lya Mtuwa Mlungu kagakola magoli ga shitalawanda su kapati kuponeka 51 Mfalumi Selemani kapata shisoweru handa Adoniya kaweriti katugiriti kuliringu na handa kagakolera magoli ga shitalawanda pakalonga, "Hapeni mbuki mpaka mfalumi Selemani kanapili leru handa hapeni kantagi neni ntumintumi gwakuyi kwa ligumba." 52 Mfalumi Selemani kalonga, "Panimwona kuwera mwaminika su hapeni kapati madoda goseri. Kumbiti panimwona kana madoda mpaka kahowi."

53 Su, Mfalumi Selemani kalagalira Adoniya kashemwi kulawa kuliringu linanagala, kizi kwakuyi. Adoniya kasokiti kulongolu kwa mfalumi, kang'ong'onala kwa ligoya. Mfalumi kamgambira, "Gugendi ukaya kwaku."