1 Selemani kalinyawiti liboma lyakuyi mweni, kwa vinja lilongu na tatu kamalira. 2 Shakapanu kanyawa lijengu lyalishemitwi numba ya lidowi lwa Lebanoni. Utali wakuyi uweriti mita alubayini na mhanu, upana wakuyi mita ishilini na mbili na nusu na utali wakuyi kugenda pampandi mita lilongu na msheshi. Liweriti linyawitwi pampindi safu zamsheshi za mpanda za miyerezi, mpanda zyeni zikoliriti boliti za miyerezi kwa uwega wa pampindi. 3 Kila safu iweriti na mpanda lilongu na mhanu, su zoseri pamuhera ziweriti mpanda alubayini na mhanu. Vyumba vyavinyawitwi pampindi pa mpanda azi, kavitulira litala lya miyerezi. 4 Kuweriti na safu ntatu za madilisha yagalolaniti. 5 Migomi yoseri na madilisha gaweriti na mlaba kuweriti na safu ntatu ya madilisha na kila shibambaza shililolana uwega wa msitali.

6 Kanyawiti ligeleri lya mpanda, utali wakuyi uweriti mita ishilini na mbili na nusu na upana wakuyi mita lilongu na msheshi kuseemu ya kulongolu ya jengu ali kuweriti na mdamu. Kulongolu kwa mdamu kuweriti na mpanda, na kulongolu kwa mpanda kulawiriti shitwiku shididini.

7 Selemani kanyawiti ligeleri lya shiti sha ukulu kweni katozera masitaka ga wantu. Ali vilaa walishemiti ligeleri vya kutoza. Liweriti liherepiziwa kwa mbawu za miyerezi kulawa pasi mpaka kulitala.

8 Numba yakuyi ya kulikala mweni, yayiwiritwi kumbeli pa ligeleri lya Kutoza, liweriti linyawiwa handa zilii zimonga, Selemani viraa kanyawiti numba handa ligeleri ali toziya ya mhinga gwa Falawu, yakaweriti kamyuga.

9 Majengu goseri aga ganyawitwi kwa mabuwi ga beyi nkulu kulawa lyanjiru mpaka pampindi, mabuwi geni gaweriti gasongolwa kwa shipimu sha gweka, na kudumulwa kwa msumenu uwega wa mngati na wa kunja. 10 Liyanjiru lyakuyi liweriti lya mabuwi ga beyi nkulu na makulu gana utali wa mita ntatu na nusu, na utali mita msheshi na nusu. 11 Seemu za pambindi zinyawitwi kwa mabuwi gaherepa gamonga yagasongolitwi kwa vipimu vya gweka na mbawu za miyelezi.

12 Ligeleri likulu ntambu yaliweriti na shibambaza shana safu yimu za mbawu za miyerezi na safu ntatu za mabuwi ga kusongolwa kila yimu, ntambu yayiweriti handa ligeleri lya mngati mwa numba ya Mtuwa Mlungu na kwa ligeleri lya numba.

13 Shakapanu Mfalumi Selemani kamshemiti Hiramu kulawa Tiru. 14 Ayu kaweriti mwana gwa mkenja gwa likabira lya Nafutali, na tati gwakuyi kaweriti mwenikaya gwa Tiru, mponda shaba. Hiramu kaweriti na luhala luvuwa na mahala, na fundi mkulu gwa lihengu lyoseri lya shaba. Su, kiziti kwa mfalumi Selemani, kamgendiriti lihengu lyakuyi lyoseri.

15 Hiramu kanyawiti mpanda mbili za shaba, kila yimu iweri na utali wa mita nani, na mzyengetu gwa mita mhanu na nusu. 16 Kanyawiti viraa majenjeri mawili ga shaba, kila limu liweriti na utali wa mita mbili na sentimita ishilini na mhanu, kazitula pampindi pa mpanda azi. 17 Kanyawiti nyavu mbili kila yimu katendiriti mikufu saba katula pampindi pa majenjeri aga. 18 Ntambu iraayi, kanyawiti mabwajubwaju ntambu ya makomamanga, kagapanga safu mbili kuzyengeta majenjeri galii pampindi pa kila mpanda.

19 Na majenjeri aga yagaweriti pampindi pa mpanda kulongolu kwa mdamu, gaherepiziwitwi kwa mifanu ga uluwa wa miyungiyungi, utali wakuyi mita yimu na sentimita sabani mhanu. 20 Majenjeri aga gaweriti pampindi pa mpanda mbili na viraa ziweriti pampindi pa seemu ya mvilingu yagulawiriti pakwegera na nyavu zilii. Paweriti na mifanu miya mbili ya mabwajubwaju ga mikomamanga gapangitwi misitali miwili kuzyengeta kila lijenjeri.

21 Hiramu kazituliti mpanda azi pamdamu gwa numba nkulu ya Mlungu, kazigolosiyiti uwega wa kumliwu kazishemiti Yakini na kazigolosiyiti uwega wa kumshigi kazishemiti Bowazi. 22 Mituwi ya mpanda azi vilembitwi kwa mfanu gwa uluwa wa miyungiyungi. Na hangu lihengu lya kunyawa mpanda ipera.

23 Hiramu kanyawiti sufuliya yayishemwa bahari, iweriti ya mzyengetu gwa upana mita msheshi na nusu kulawa upeleru mpaka upeleru, na utali wakuyi mita mbili na nusu na mzyengetu gwakuyi goseri mita lilongu na ntatu na nusu. 24 Pasi pa ukingu wakuwi, kulizyengeta litangi ali, kuweriti na msitali miwili ya vibuyu, kila nusu mita kutulitwi vibuyu lilongu. Vibuyu avi viweriti vinyawitwi shaka shiraashi litangi ali palinyawitwi. 25 Litangi liweriti litulwa pampindi pa ng'ombi gwa shaba lilongu na mawili, watatu walola uwega wa kushana, watatu uwega wa kwaguzyeta mshenji, watatu kusika, na watatu uwega wa kwagulawa mshenji. Litangi litulitwi pampindi pa wang'ombi shipalu awa, seemu zawu za kumbeli ziweriti mngati. 26 Ukulu wa ukingu wakuyi uweriti mita saba na nusu na weni uweriti ulifana na upeleru wa shikombi na handa ligeleli lya yungiyungi. Litangi liweziti kumema mashi lita elufu alubaini.

27 Hiramu viraa kanyawiti tololi malongu ga shaba, kila tololi iweri na utali wa mita yimu na lobu tatu upana wakuyi viraa mita yimu na lobu tatu, na utali wakuyi kugenda pampindi mita yimu na lobu. 28 Tololi azi ziweliti zinyawitwi hangu. Kuweliti na mabamba ga chuma gaweriti gakolerelwa na mitalimbu. 29 Mumabamba kuweriti na shinyagu sha simba na makelubi pampindi pa mabamba aga kuweriti na maheripiziya ga lufunga yagapotitwi weri. 30 Kila tololi liweriti na maguludumu msheshi ga shaba, na vyuma vya pakati vya kuzyengeta maguludumu aga, gaweriti ga shaba. Kupembi msheshi za tololi kuweriti na vikolera vya shaba toziya ya bilika nkulu. Pakwegera pa kila shikoleru patulitwi mahelepeziya ga uluwa wa kupotwa. 31 Kuweriti na felemu ya mzyengetu pampindi pa tololi lya bakuli. Yayiweriti na sentimita alubayini na kugenda pasi kuweriti na sentimita lilongu na saba ibikibikwa kwa kuzyengetwa. 32 Na maguludumu aga msheshi gaweriti pasi pa mabamba galii, vyuma vya pakati kuzyengetiziya maguludumu aga viweriti vikolaniziwa na ntambu ya tololi yeni, na utali wa maguludumu aga gaweriti na sentimita sabini. 33 Maguludumu aga gaweriti handa mbutuka za kukwega na farasi kunkondu na vyuma vyakuwi vya pakati, mizyengetu yakuyi, mataluma gakuyi na vikombi vyakuyi. Avi vyoseri viweriti vya zahabu. 34 Pasi pa kila tololi kuweriti na migolukeru misheshi kupembi zyakuwi, zyeni zilikolaniziwa na tololi. 35 Na pampindi pa tololi paweriti na utepi yautendiziya mzyengetu sentimita ishilini na mbili, na vikololeru vya mabamba vyaviweriti uwega wa pampindi vilikolerana na tololi yeni. 36 Kila mulupenu lupalahera lupatikaniti mvikoleru vya mabamba ga kila tololi, Hiramu kasongoliti mishoru ya makelubi, simba na mitera ya mitendi, kazyengetera na mashada ga mahelepeziya. 37 Tololi zoseri ziponditwi kwa kulifana, payiwera na utali wumu na ntambu yimu iraayi.

38 Hiramu, viraa kanyawiti mabilika lilongu ga shaba, limu kwa kila tololi. Kila bakuli iweriti na upana wa mita yimu na lobo tatu, na liweziti kutola mashi lita miya nane semanini. 39 Katula tololi mhanu uwega wa kumliwu wa numba, na mhanu uwega wa kumshigi, na litangi lilii kalitula kupembi ya kusika kwagulawa mshenji mwa numba.

40 Hiramu kanyawiti viraa viwungu, masepetu na mabakuli. Su, Hiramu kamaliriti lihengu lyoseri lyakagambiritwi na Mfalumi Selemani kuusu Numba ya Mtuwa Mlungu. 41 Mpanda mbili, mabakuli mawili ga lijenjeri lyalitulitwi pampindi pa mpanda, na nyavu mbili kwajili ya kugibikira viwiga viwili aga, 42 Vintu vilifana na makomamanga miya msheshi kwajili ya nyavu mbili azi, safu mbili ya makomamanga kwa kila wavu su kuherepiziya vibuyu virii vyaviweriti pampindi pa mpanda. 43 Ntambu iraa, kanyawiti matololi lilongu, na mabeseni lilongu mumbutuka azi. 44 Na litangi lilii limu na shinyangu sha wang'ombi shipalu lilongu na wawili, pasi pa litangi ali. 45 Shakapanu viwiga virii, kolewu na mabilika, vyombu vyoseri avi viweriti munumba ya Mtuwa Mlungu vyeni Hiramu kamnyawiliti mfalumi Selemani, viweriti vya shaba yavikukumulitwi. 46 Vintu vyoseri avi mfalumi kavinyawiti mumpeku mwa Yoridani, pahala pa litapaka lwa ukaka lwaliweriti pakati pa Sukoti na Seretani. 47 Selemani kapima ndiri utopa wa vintu avi vyoseri toziya viweriti vivuwa nentu, na toziya utopa wa shaba umanikana ndiri.

48 Viraa Selemani kanyawiti vintu vyoseri vyaviweriti munumba ya Mtuwa Mlungu. Shitalawanda sha zahabu, meza ya zahabu toziya ya mabumunda ga kutulwa palongolu pa Mtuwa Mlungu, 49 vintambi vya limiliku lya zahabu iyerepa vyavitulitwi palongolu pa pahala pananagala nentu, mhanu uwega gwa kusika na mhanu uwega gwa kushana, uluwa, limiliku, na mikasi, yoseri iweriti ya zahabu. 50 Vikombi, makasi mididini ga kukatira tambi za limiliku na mabakuli makulu na madidika na vyetezu vyakutulira ubani, mwiku gwa kupalira motu, vyoseri vya zahabu iyerepa, bawabu za migomi ya seemu ya mngati nakamu ya numba palii pahala pananagala nentu na bawabu za migomi ya ligeleri lya kuguwira na numba nkulu ya Mlungu, bawabu zoseri za zahabu.

51 Su, Mfalumi Selemani kamalira mahengu goseri ga numba ya Mlungu. Shakapanu Selemani kajega lunda zoseri zyeni Dawudi kazilumika, feza na zahabu na vintu kavitula muluwanja lwa numba ya Mtuwa Mlungu.