1 Malikiya gwa Sheba pakapikaniriti zyuma za Selemani toziya ya litawu lya Mtuwa Mlungu, kamgenderiti selemani su kumjera kwa makosiwu makamala. 2 Kasokiti Yerusalemu pakawera kalilonguziya na mwanja gwa wantu wavuwa nentu pamuhera na ngamiya yawapapiti utuli, na zahabu ivuwa nentu, mabuwi ga beyi nkulu, pakasokiti kwa Selemani, kayowenaliti nayu makosiwu goseri gakaweriti naga. 3 Selemeni kagankula makosiyu goseri, paweriti ndiri likosiwu lyoseri lyakalisinditi. 4 Malikiya gwa Sheba kalikangashiti nentu pakavimaniti luhala loseri lya Selemani, na liboma lyakaweriti kayinyawa, 5 kayi pakawoniti shiboga shashijengitwi pameza pakuwi, wakulu wakuyi ntambu yawalikaliti pameza na ntambu wantumintumi yawatenderiti na yawavaliti, viraa watendera wakuyi na tambiku za kulunguziwa zeni kazilaviyiti munumba ya Mtuwa Mlungu, kakapa na kulikangasha nentu. 6 Kamgambira Mfalumi, "Mirandu yoseri yampikiniriti kuisi yangu na lihengu lyaku na luhala lyaku ndo nakaka! 7 Kumbiti weza ndiri kwamini visoweru avi mpaka pansokiti na kulilorera namweni. Kumbiti ng'ambirwa ndiri ata nusu yakuyi, luhala lyakuyi na mpatiru zaku vipita visoweru vyampatiti. 8 Wantu waku wawera na nemeleru! Wantumintumi waku wawera na nemeleru yawakutedera mashaka goseri na kupikanira luhala lwaku! 9 Kazyumwi Mtuwa Mlungu, Mlungu gwaku, mweni kafiliziwa na gwenga, kakutula pampindi pa shiti sha ukulu sha Israeli! Toziya Mtuwa Mlungu kayifiriti Israeli mashaka goseri, kakutula gwenga guweri mfalumi, su gwendelezi toza na njira ya kumfiliziya Mlungu."

10 Shakapanu malikiya kampanana Mfalumi mafupu ga kilu elufi msheshi nentu ga zahabu, shiyasi shikulu sha utuli na mabuwi ga beyi nkulu. Utuli shiyasi shikulu handa ashi shakampananiti mfalumi Selemani ashenipati nakamu kujegwa kayi.

11 Kayi mwanja gwa meli za Hiramu gujengiti zahabu kulawa Ofiri, gujega kwa kuvuwa mitera ya msandali na mabuwi ga beyi nkulu. 12 Mfalumi kayitenderiti mitera ayi ya msandali kwajili ya vikololeru vya numba ya Mtuwa Mlungu, na za liboma na viraa kwa kunyawira talumbeta na lugombugombu lya wayimba. Mitera ya msandali handa ayi ayeniwoneki kayi mpaka leru.

13 Mfalumi Selemani kamupananiti malikiya gwa Sheba kila shintu shakaluwiti na shakafira, pamuhera na vintu vimonga vyeni Selemani kamupananiti kulawirana na ukalamuka wakuyi wa shifalumi. Su, malikiya kawuya kuisi kwakuyi pamuhera na wantumintumi wakuyi.

14 Kila shinja Mfalumi Selemani kankiti zahabu kilu elufu ishilini na tatu. 15 Shiyasi ashi sha zahabu pamuhera ndiri na zahabu yakapatiti kwa wawuza vintu na washuuzi, kwa wafalumi woseri wa Arabia na wakulu wa mikoa ya Israeli.

16 Mfalumi Selemani kanyawiti ngawu nkulu miya mbili kwa zahabu yaiponditwi, kila ngawu yimu yingiliti kilu saba za zahabu. 17 Kanyawiti ngawu ndidikandidika miya tatu kwa zahabu yaiponditwi, kila ngawu kilu yimu na nusu, shakapanu mfalumi kazitula mulijengu lyalishemitwi Numba ya Lidowi lya Lebanoni.

18 Viraa kanyawiti shiti sha shifalumi shikulu kwa magoli ga ndembu, kashigibikira kwa zahabu iyerepa nentu. 19 Shiti ashi shiweriti na ngweneru sita. Seemu ya pampindi iweriti pabiringitwi na kutuluwa pahali pa kwegemera liwoku wega zyakuwi mbili na vinyagu vya simba viwili vigoloka shimu pambwega pa pahali panu pa kwegemera liwoku. 20 Kuweriti viraa na vinyagu lilongu na mbili vya simba vigoloka, shimu upeleru wa kila lukweneru. Shiti handa ashi hasheni nyawilwi muufalumi woseri ulii.

21 Vyombu vyoseri vya kulandira vya mfalumi Selemani viweriti vya zahabu na vyombu vyoseri vyaviweriti Munumba ya lidowi lya Lebanoni viweriti vya zahabu iyerepa, kwahera shashinyawitwi kwa madini ga feza geni madini ga feza gaweriti ndiri shintu shaka ashi. 22 Toziya mfalumi Selemani kaweriti na mwanja gwa meli za Talishishi zyaziweriti zamwanja pamuhera na meli za Hiramu, kila shinja sha tatu meli azi za Talishishi zimujegiliti mfalumi zahabu, feza na magoli ga ndembu, mayani na tawusi. 23 Hangu, mfalumi Selemani kawapititi wafalumi woseri pasipanu kwa ulunda na luhala. 24 Wantu wa isi zoseri waweriti na matamata ya kumgendera Selemani su kupikanira luhala lwakuwi lweni Mlungu kampanana. 25 Kila yumu gwawu kamjegiriti lifupu, vyombu vya feza, na vya zahabu na nguwu na manimani na viwungu na farasi punda na. Mafupu aga gangitwi kila shinja.

26 Selemani kajojoniriti mbutuka za farasi na wakwena farasi na kaweriti na mbutuka za farasi elufu yimu na miya msheshi na wakwena farasi elufu lilongu na mbili weni kawatuliti mumiji imonga yana vituwu vya mbutuka za farasi, aku Yerusalemu. 27 Su, mfalumi Selemani kagatenditi madini ga feza aku Yerusalemu kuwera shintu ntambu iraa handa mabuwi na mbawu za miyerezi ziweriti zivuwa handa mbawu za mikuyu ya aku Shefera. 28 Selemani kalagaliriti farasi kulawa Misri na viraa kulawa Kilikiya kweni washuuzi waweriti wawuzirwa na wantu wa Kilikiya. 29 Mbutuka yimu ya kukwegwa iweziti kuhemelwa aku Misri kwa feza yaiwera kilu saba na farasi yumu kaweza kuhemerwa feza kilu mbili. Viraa washuuzi wa mfalumi waweriti mumwanja gwa mbutuka na farasi awa na kuwawuzira wafalumi woseri wa Wahiti na Wasiriya.