1 Selemani kaweriti mfalumi gwa isi yoseri ya Israeli, 2 na awa waweriti wakulu pasi wakuyi, Azaliya mwana gwa Sadoki, kaweriti mtambika. 3 Elihorefu na Ahiya wana wa Shausha, waweriti walemba, Yehoshafati mwana gwa Alihudi, kaweriti mlemba gwa maholu. 4 Benaya mwana gwa Yohada, kaweriti mkulu gwa shonta, na womberi Sadoki na Abiyatali, waweriti watambika. 5 Azariya mwana gwa Natani, kaweriti mkulu gwa mkolamlima, mtambika Zabudi mwana gwa Natani, kaweriti ganja gwa mfalumi. 6 Ahishari kaweriti mkulu gwa liboma na Adoniramu mwana gwa Abuda, kaweriti mgolokera wa lihengu lya kukakanika. 7 Selemani kawasyaguliti wakulu wa wakolamlima lilongu na mbili kwa isi yoseri ya Israeli. Hawa wapananitwi lihengu lya kusakula shiboga kulawa kumkowa gwakuyi kwajili ya mfalumi mwezi gumu kila shinja. 8 Aga ndo matawu ga wakulu wakolamlima, Beni Huri kagolokiriti pahala pa vigongu vya Efraimu 9 Beni Dekeri kagolokiriti mji gwa Makai, na Shaalibimu na Beti Shemeshi na Elonibeti Hanani 10 Beni Hesedi kagolokeriti mji gwa Aruboti, viraa kagolokeriti Soku na isi yoseri ya Heferi. 11 Beni Abinadabu, mpalu gwa Tafati, mhinga gwa Selemani, kagolekeriti uwega woseri wa Nafati Dori. 12 Baana mwana gwa Ahiludi, kagolekeriti mji gwa Taanaki na Megidu na pahala poseri pa Beti Sheani yaiweri pakwegera na mji gwa Zareti, kusika kwa mji gwa Yezireeli, na kulawa Beti Sheani mpaka mji gwa Abeli Mehola na ata kupita miji ya Yokimeamu 13 Beni Gebari, kagolekeriti mji gwa Ramoti Gileadi pamuhera na vijiji vya Gileadi viwera vya Yairi, mwana gwa Manase, viraa kagolekeriti mkoa wa Aligobu haguweri Beshani, yoseri iweriti miji mikulu sitini yaizyengetiritwi vibambaza na kutula gwiligiziwu za shaba mumigomi mikulu. 14 Ahinadabu mwana gwa Idu, kapananwa lihengu lya kujojonira shiboga muisi ya Mahanaimu na vijiji vyakuyi. 15 Ahimaasi mpalu gwakuyi Besemati yakaweriti mhinga gwa Selemani, kapananwa lihengu lya kujojonira shiboga muisi ya Nafutali. 16 Baana mwana gwa Hushai, kapananwa lihengu lya kujojonira shiboga muisi ya Asheri na Bealoti. 17 Yoshefati mwana gwa Parua, kapananwa lihengu lya kujojonira shiboga muisi ya Isakari. 18 Shimei mwana gwa Ela, kapananwa lihengu lya kujojonira shiboga muisi ya Benjamini. 19 Geberi mwana gwa Uri, kapananwa lihengu lya kujojonira shiboga muisi ya Gileyadi, yeni panu kwanja itolitwi na Sihoni mfalumi gwa Waamori na Ogu mfalumi gwa Bashani. Na yomberi kaweriti mkulu gweka yakuyi muisi ayi.

20 Wantu wa Yuda na wa Israeli waweriti wavuwa handa mhanga gwa kumpwani, nawomberi waweriti waliya na kulanda na kunemelera. 21 Selemani kakolitimlima falumi zoseri kwanjira lushemba lya Eufrate mpaka isi ya Wafilisiti, mpaka kumbaka na Misri. Isi zoseri waweriti wamtendera lihengu na kulipa kodi kwakuyi shaka shoseri sha ukomu wakuyi 22 Shiboga shakafiriti Selemani kwa lishaka limu, shiweriti ubumu unama madebi miya tatu na sitini, na ubumu yawasagiti weri uweriti madebi miya saba na ishilini, 23 ng'ombi yawajegerwa shiboga lilongu, na ng'ombi wa kumaliwuziwu ishilini, na kondolu miya yimu pamuhera na kulungu na paa na shinjapuli na nkuku watawi. 24 Yina isi yoseri gwaguzyeta mshenji ya lushemba Eufrate, kulawa Tifisa mpaka mji gwa Gaza, iweriti isi ya ukolamlima wakuyi. Wafalumi woseri wa kwaguzyeta mshenji mwa lushemba Eufrate waweriti pasi pakuyi, na kaweriti na ponga na isi zoseri za pakwegera. 25 Mashaka goseri ga ukolamlima wakuyi Selemani, wantu wa Yuda na wantu wa Israeli, kulawa Dani mpaka Beri Sheba walikali poneka, kila muntu yakaweriti na mitera yakuyi ya mizyabibu na mitini. 26 Selemani kaweriti na visasa elufu alubayini toziya ya farasi wa mbutuka zakuyi za kukwega, na wamashonta wakuyi wa wakwena farasi elufu lilongu na mbili. 27 Walii wakulu wakuyi lilongu na mbili, kila yumu kwa mwezi yakapangiwitwi, wajegiti shiboga shivuwa sha kumpanana mfalumi na woseri walii yawaweriti ukaya kwakuyi. Mafiliru gawu goseri gawatosiyiti. 28 Kila muntu mushaka shakuyi pashisokiti, kajegiti viraa shayiri na ndundu za kumliziya punda farasi na wavigong'olu yawagenda kalongola. 29 Mlungu kamupananiti Selemani luhala nentu na mahala na umana uvuwa handa mhanga gwa kumbwani, gawera ndiri na shipimu. 30 Luhala lya Selemani lulipititi luhala lya wantu wa kwagulawa mshenji na lulisinditi luhala lya wantu wa Misri. 31 Kawakankiti wantu woseri kwa luhala, kawakankiti Etani, kulawa mlukolu lwa Mwezirahi na Hemani na Kalikoli na Darida, wana wa Maholi, na kuzyumwa kwakuyi kweneya muisi zoseri zyapakwegera 32 Mitakulu yakuyi iweriti elufu tatu na nyimbu nentu ya elufu yimu na miya mhanu. 33 Kayoweriti visoweru vya mitera, kwanjira mtera gwa mwelezi yaguwera Lebanoni, ata hisopu, mtera yagutambala mshibambasa. Katakuliriti viraa wankanyama na wampongu wana mwazi guzizima yawatagira maligi na somba. 34 Wantu kulawa maisi goseri na wafalumi woseri yawapatiti kupikanira shisoweru sha luhala lyakuyi, wiziti kumpikanira.