1 Pa mfalumi Selemani pakamaliliti kunyawa numba ya Mtuwa Mlungu na liboma na kila shintu shakafiriti kunyawa, 2 Mtuwa Mlungu kamlawiriti kayi Selemani ntambu yakamlawiriti kulii Gibeyoni. 3 Mtuwa Mlungu kamgambira, "Mpikaniri kuluwa kwaku na luwa yaku. Niyitenda kuwera nanagala numba ayi yagunyawiriti su nilituli litawu lyaneni panu mashaka goseri. Haniyiloleri na kuyifira shaka shoseri. 4 Na gwenga handa paguntendera kwa moyu guherepa na uwaminika handa tati gwaku Dawudi ntambu yakatenditi, pagujimira amuli zyaneni na kutenda galii goseri ganakugambiriti, pagufata malagalira ganeni na lagiru ganeni, 5 neni hanishigangamiziyi shiti shaku sha shifalumi pampindi pa Israeli mashaka goseri, ntambu yanamgambiriti Dawudi tati gwaku, panonga. Hapenigukosi muntu gwa kukala pampindi pa shiti sha shifalumi sha Israeli. 6 Kumbiti gwenga ama wana gwaku pamgalambuka na kuleka kumfata, pamzikola ndiri amuli zaneni na malongulera ganiwapananiti, pamgenda kuwatendera wamlungu wamonga na kuwaguwira, 7 su, haniwahamisiyi wantu waneni, Israeli, kulawa isi ayi yeni nuwapananiti, ntambu iraayi na numba ayi yeni niyilumika kwajiri ya litawu lyaneni, haniyasiri patali naneni na kuyitenda shintu sha kujongerwa na kubeziwa muwamu mwa maisi goseri. 8 Na Numba ayi hayibomoki na iweri mahami, kila yakapita pakwegera hakasintuki na kutikisiya mtuwi, na kukosiya, ntambu gaa Mtuwa Mlungu katenda hangu kwa isi ayi na kwa numba ayi? 9 Wantu wavuwa hawankuli, toziya wamlekiti Mtuwa Mlungu, Mlungu gwawu, yakawalaviyiti wambuyi wawu muisi ya Misri, walikolelana na wamlungu wamonga, wawaguwira na kuwatendera, hangu, Mtuwa Mlungu kawajegera madoda goseri aga."

10 Shakapanu vinja ishilini pavipititi kala, Selemani kanyawiti numba mbili zilii. Numba ya Mtuwa Mlungu na liboma, 11 Mfalumi Selemani kamupananiti Hiramu mfalumi gwa Tiru, miji ishilini mumkowa gwa Galilaya toziya Hiramu ayu kaweriti kamjegera Selemani mbawu za miyerezi na mibereshi, na zahabu viraa, ntambu yakafiriti kwa kunyawira. 12 Kumbiti Hiramu pakasokiti kulawa Tiru na kuyiwona miji ayi yakaweriti kapananwa na Selemani kafiliziwa ndiri nayi. 13 Su, kamkosiya Selemani, "Mlongu gwaneni, ndo miji gaa ayi yeni gumpanana?" Ayi ndo toziya miji ishemwa isi ya Kabuli mpaka leru. 14 Hiramu kaweriti kamjegera mfalumi Selemani zahabu kilu elufi masheshi.

15 Mfalumi Selemani ntambu yakawatendiziyiti wantu lihengu lya kukakaniziwa kunyawa numba ya Mlungu na liboma lyakuyi, kubamandira litapaka aku Milu na shibambaza sha Yerusalemu, na viraa kunyawa syayi miji ya Hasori na Megidu na Gezeri. 16 Gezeri ndo mji gweni Farao gwa Misri, kaweriti kagulopola, kagukankala mji gwa Gezeri na kugulunguziya motu, na kawalaga Wakanaani, wenikaya wakuyi. Shakapanu mhinga gwa Falawu pakayugitwi na Selemani, mfalumi gwa Misri kampananiti mhinga gwakuyi mji agu gwa Gezeri guweri lifupu lya ndowa. 17 Na Selemani kagunyawiti syayi mji gwa Gezeri. Ntambu iraayi kanyawiti Beti Horoni ya pasi, 18 ntambu iraayi miji yayifata. Baalati, na Tamari, mji guweriti kushidowi muisi ya Yuda, 19 kanyawa miji yakuwi yoseri ya luhanja, kanyawa miji ya kutula mbutuka zakuyi za kukwegwa, na kanyawa miji ya kutula farasi wakuyi, viraa shoseri shakafiriti kunyawa Muyerusalemu, Lebanoni na muisi yoseri muukolamlima wakuyi. 20 Wantu wamonga woseri yawasigariti muwamu mwa Waamori na Wahiti na Waperezi na Wahivi na Wayebusi, woseri awa wawera ndiri wa Waisraeli. 21 Pamuhera na wiwuka wawu weni Waisraeli waweza ndiri kuwahowiziya nakamu, Selemani kawatendiziya lihengu lya kukakanika mpaka leru. 22 Kumbiti pakati pa Waisraeli, Selemani kamtendera ndiri muntu yoseri kaweri mmanda, womberi ndo waweriti wamashonta, wantumini wakuyi, makamanda wakuyi, wakulu wakuyi, wakamanda wa mbutuka zyakuwi za kukwegwa na wakwena farasi wakuyi. 23 Ayi ndo walanga ya maafisa wakulu yawaweriti walolera wa lihengu lya Selemani. Wantu miya mhanu na amsini, awa ndo yawagolokiriti wantu yawatenditi lihengu.

24 Shakapanu mhinga Falawu kahamiliti mji gwa Dawudi, kagenda kulikala munumba yakuyi Selemani kamnyawiliti, shakapanu Selemani kabamandira shibambaza aku Milu.

25 Mala ndatu kila vinja, Selemani kalaviyiti tambiku za kulunguziwa na tambiku za ponga pampindi pa shitalawanda shakaweriti kamnyawira Mtuwa Mlungu, kamtumiziya ubani Mtuwa Mlungu, viraa kayimaliriti numba.

26 Mfalumi Selemani kanyawiti melikebu zivuwa aku Esioni Geberi, pakwegera na Eloti yaiwera kupwani ya Bahari ya Shamu, muisi ya Edomu. 27 Mfalumi Hiramu kawatuma wantu yawamana lihengu lya mumeli pamuhera na wantumintumi wa Selemani. 28 Wagendi mwanja kuisi ya Ofiri, na kutola zahabu kulawa aku, wamjegera mfalumi Selemani shiyasi sha kilu elufu lilongu na msheshi.