1 Kwa vinja vitatu, kuweriti na ponga pakati pa Israeli na Aramu, 2 kumbiti mushinja sha tatu,Yehoshafati, Mfalumi gwa Yuda, kasokiti kumtyangira Ahabu, Mfalumi gwa Israeli.

3 Ahabu kawagambira wantumintumi wakuyi, "Hashi, mvimana ndiri handa Ramoti Gileyadi ndo ya twenga? Su tutenda shintu ndiri kuguwuziya kulawa kwa Mfalumi gwa Aramu?" 4 Su kamkosiya Yeshofati, "Hashi, hagugendi naneni kulikomanga aku Ramati Gileadi?" Na Yoshofati kamwankula Mfalumi gwa Israeli, "Yina, neni na gwenga ndo shintu shimu, na viraa wantu waneni ndo wantu wa gwenga, farasi waneni ndo farasi waku." 5 Shakapanu Yehoshafati kendereya kumgambira mfalumi gwa Israeli, "Kumbiti, kwanja gumkosiyi Mtuwa Mlungu shakutenda."

6 Su, Ahabu kajojonira wambuyi miya msheshi, kawakosiya, "Hashi, ng'endi ama ng'endi ndiri kugukomanga mji gwa Ramoti Gileadi?" Na womberi wamwankula, "Gugendi! Mtuwa Mlungu hakakupanani ukanka."

7 Kumbiti, Yoshofati kalonga, "Hashi, panu kwahera mbuyi gwa Mlungu yumonga mweni tuweza kumkosiya shakutenda?" 8 Mfalumi gwa Israeli kamwankula Yoshofati, "Kapanu, kankali yumu, Mikaya mwana gwa Imla. Yomberi tuweza kumkosiya Mtuwa Mlungu kalonga haa. Kumbiti numkalalira nentu toziya yomberi katunga ndiri shitwatira shiheri kuusu neni, ila madoda hera." Yehoshofati kamgambira, "Iyerepe ndiri mfalumi kulonga hangu." 9 Su Ahabu, mfalumi gwa Israeli, kamshema ntumintumi yumu, kamgambira, "Kalongola! Gugendi gwakamjegi Mikaya mwana gwa Imla."

10 Shaka ashi, mfalumi gwa Israeli pamuhera na Yehoshifati mfalumi gwa Yuda, waweriti walivaga muviti vyawu vya shifalumi pawalivaga paluwaga lwa kukomera viboga lijengu lyana ligomi lya kwingilira kumjini Samaliya na womberi waweriti wavala nguwu zawu za Shifalumi, shaka ashi wambuyi wa Mlungu woseri wawera wankutunga palongolu pawu. 11 Shakapanu yumu gwa wambuyi yakashemwa Sedekiya mwana gwa Kenaana, kalinyawira magoli ga shuma pakalonga, "Mtuwa Mlungu kalonga hangu, kwa magoli aga, haguwakomi Waaramu na kuwaagamiziya." 12 Ata walii wambuyi wamonga woseri watungiti ntambu iraayi, walonga, "Gugendi gukagukomangi Ramoti Gileyadi, ugukanki! Mtuwa Mlungu hakakupanani ukanka." 13 Shaka shiraaashi ntumintumi yakatumitwi kwa Mikaya, kamgambiriti, "Wambuyi wamonga woseri kwa pamuhera, wamtungira mfalumi ukanka, shondi, na gwenga gutendi handa womberi, gumtungili maheri." 14 Kumbiti Mikaya kamwankula, "Nililapa kwa Mtuwa Mlungu yakawera mkomu, neni hantakuli hera galii gakafira kung'ambira Mtuwa Mlungu." 15 Su Mikaya pakasokiti palongolu pa Mfalumi, mfalumi kamkosiya, "Hashi, tugendi kulikomanga nkondu aku Ramoti Gileyadi ama tugendi ndiri?" Na yomberi kamwankuliti, "Gugendi na guwakomi, na yomberi Mtuwa Mlungu hakagutuli mumawoku mwaku." 16 Kumbiti mfalumi kamgambira, "Nikulapiliri mala ninga handa pagulonga naneni kwa litawu lya Mtuwa Mlungu, ndo mpaka gung'ambili unakaka hera?" 17 Mikaya kalonga, "Moniti wantu woseri wa Israeli wapalanganika kuvigongu handa kondolu wahera mlolera. Na Mtuwa Mlungu kalonga, wantu awa wahera mlonguziya, su wawuyi kila muntu ukaya kwakuyi kwa ponga."

18 Panu mfalumi gwa Israeli kamgambira Yoshofati, "Nukugambiriti ndiri handa hapeni katungi liheri kwa neni ila madoda hera?" 19 Shakapanu Mikaya kalonga, "Aya gupikanili shisoweru sha Mtuwa Mlungu. Nimwoniti Mtuwa Mlungu kalivaga mushiti shakuwi sha Shifalumi, na shonta lyoseri lya kumpindi ligoloka pambwega pakuyi, uwega wakuyi wa kumliyu na wa kumshigi, 20 Mtuwa Mlungu kakosiya, ndo gaa yakafira kumtendi Ahabu kagendi kulikomanga su kalaguwi aku Ramoti Gileyadi? Kila yumu kankula ntambu yakaliholiti, 21 Shakapanu rohu yumu kalilaviya palongolu pa Mtuwa Mlungu, pakalonga, neni hanimtendi katendi shintu ashi. 22 Mtuwa Mlungu kamkosiya, kwa njira gaa? Na yomberi kankula, hang'endi na kulitenda rohu gwa mpayu na kuwatenda wambuyi wa mpayu. Mtuwa Mlungu kamgambira, gwenga hagumgambiziyi na haguwezi, su, gugendi gukatendi hangu."

23 "Su, ntambu yayiwera. Mtuwa Mlungu kawatenda wambuyi wakuyi woseri awa walongi mpayu. Mtuwa Mlungu kalonga madoda kwa gwenga!"

24 Shakapanu, Sedekiya, mwana gwa Kenaana, kamsegelera Mikaya, kamwakula likofi mlisaya na kumkosiya, "Kwanjira ndii Rohu ya Mtuwa Mlungu indeka neni, yiza kuyowera na gwenga?" 25 Mikaya kankula, "Lishaka pakingira mushumba sha mngati kulififa, ndo haguvimani." 26 Na yomberi Mfalumi gwa Israeli kalagalira, "Mmubati Mikaya, mmuwuziyi kwa Amoni, mkulu gwa mji na kwa Yowashi mwana gwa mfalumi. 27 Guwagambiri wamtatili mshifungu na kumliyiziya libumunda lididini na mashi, mpaka pambuya mkomu." 28 Ndo Mikaya pakalongiti, "Paguwuya mkomu su, guvimani handa Mtuwa Mlungu kalonga ndiri na neni." Shakapanu kendereya kulonga, "Mgaholi aga wantu woseri!"

29 Su, mfalumi gwa Israeli kagenda pamuhera na mfalumi Yehoshafati gwa Yuda, wajega mashonta gawu aku Ramoti Gileyadi. 30 Mfalumi wa Israeli kamgambira Yehoshafati, "Neni hanvali nguwu zyaziwera ndiri za shifalumi na kwingira mnkondu kumbiti gwenga guvali nguwu zaku za shifalumi." Hangu mfalumi gwa Israeli kagenda kunkondu pota kuvala nguwu za shifalumi.

31 Mfalumi gwa Aramu kaweriti kawagambira wakulu wa mashonta wakuyi selasini na wawili yawagolokeriti mbutuka zakuyi za kukwegwa na farasi, pakalonga. "Namlikomanga na muntu yoseri yulii, mkulu ama mdidini, ila hera na mfalumi gwa Israeli." 32 Shakapanu, wakulu wa mashonta awa pawamwoniti Yehoshafati, walongiti, "Nakaka, ayu ndo mfalumi gwa Israeli." Hangu, wamgendiriti, wamkomi, kumbiti Yehoshafati kabotanga. 33 Wakulu wa mashonta pawavimaniti handa kaweriti ndiri mfalumi gwa Israeli walekiti kumkoma, wawuya. 34 Kumbiti, lishonta yumu gwa Aramu, kanika upindi wakuyi kaguma hera, msali gumsoma mfalumi gwa Israeli pahala pa mawungiru ga nguwu zakuyi za shuma. Ahabu kamgambira muendesha mbutuka gwakuyi ya kukwegwa na farasi, "Gugalambuli mbutuka gumbusiyi kunkondu. Ndenduwa!" 35 Na makomangu lishaka ali gaweriti makulu, aku mfalumi kaseniziwa mumbutuka, kankuwalola wantu wa Aramu. Mwazi guweriti gwankumlawa mshilonda na kunyililika mumbutuka. Payisokiti pamihi kahowa. 36 Shaka sha mshenji kuzyeta kupinilika kulira, "mashonta waligambirana kila muntu kawuyi ukaya kwakuyi!"

37 Mfalumi Ahabu pakahowiti kajegitwi Samaliya, kafindirwa aku. 38 Mbutuka yakuyi ya kukwegwa na farasi wayigululiti mulitanda lya Samaliya, wang'ang'a wagulambita mwazi gwakuyi na wahumba wayoga amu, teratera na shisoweru shakalongiti Mtuwa Mlungu.

39 Matendu gamonga ga mfalumi Ahabu, ntambu yakanyawiti na kuherepiziya numba yakuyi kwa magoli ga ndembu na miji yoseri yana liboma yakanyawiti ilembitwi mushitabu sha Mirandu ya Shaka sha Wafalumi wa Israeli. 40 Ahabu pakahowiti, mwana gwakuyi Ahaziya kakolitimlima pahala pakuyi.

41 Mushinja sha msheshi sha ukolamlima wa mfalumi Ahabu gwa Israeli, Yehoshafati mwana gwa Asa, kanjiti kukolamlima Yuda. 42 Yehoshafati kaweriti na vinja selasini na mhanu pakanjiti kukolamlima. Kakolitimlima kulawa Yerusalemu kwa shaka sha vinja ishilini na mhanu. Mawu gwakuyi kaweriti Azuba mhinga gwa Shilihi. 43 Handa tati gwakuyi Asa pamberi pakuyi, katenditi maheri palongolu pa masu ga Mtuwa Mlungu kumbiti pahala pa kuguwira kapahalibisiya ndiri na wantu wendereyiti kulaviya tambiku na kulunguziya ubani aku. 44 Yehoshafati katenda ponga pamuhera na mfalumi gwa Israeli. 45 Mirandu yoseri yakatenditi Yehoshafati, goseri ga ugangamala na ga shinkondu, galembitwi Mushitabu sha maholu ga wafalumi wa Yuda. 46 Wapalu na wadala yawatenda uhumba muvilingu vya wantu yawammana Mlungu yawaweriti kwanjira shaka sha tati gwakuyi Asa, Yehoshafati kawawusiyiti muisi.

47 Muisi ya Edomu kuweriti ndiri na mfalumi, isi ayi ikolitwimlima na mtanga yakasyagulitwi na mfalumi gwa Yuda.

48 Mfalumi Yehoshafati kanyawiti meli nkulu yazishemwa Talishishi za kugenda Ofiri kujega zahabu, Kumbiti zisoka ndiri toziya zimegekamegeka aku Esioni Geberi. 49 Na shaka ashi Ahazia mwana gwa Ahabu, kamgambira Yehoshafati, "Guwaleki wantumintumi waneni wagendi mwanja pamuhera na wantumintumi wa gwenga mumeli." Kumbiti Yehoshafati kajimira ndiri mlandu agu.

50 Upeleru Yehoshafati kahowiti na kufindirwa mumasembi ga shifalumi mumji gwa Dawudi tati gwakuyi, na Yehoramu mwana gwakuyi, kakolamlima pahala pakuyi.

51 Mushinja sha kumi na saba sha ukolamlima wa Yehoshafati mfalumi gwa Yuda, Ahazia mwana gwa Ahabu, kanjiti kukolamlima Israeli. Kakolitimlima kwa vinja viwili, kulawa Samariya.

52 Ahazia katenditi madoda palongolu pa Mtuwa Mlungu, kafatiti matendu ga tati gwakuyi na matendu ga mawu gwakuyi Yezebeli na ga mfalumi Yerobaamu mwana gwa Nebati, kawatenditi wantu wa Israeli watendi vidoda. 53 Kamgendiriti na kumguwira Baali, kamkalaziya Mtuwa Mlungu, Mlungu gwa Israeli, kwa kila mlandu ntambu yakatenditi tati gwakuyi.