1 Selemani katenditi uganja na Falawu mfalumi wa Misri, kamyuga mhinga gwakuyi. Kamjega mhinga gwa Falawu na kumtula mumji gwa Dawudi mpaka pakamaliliti kunyawa numba yakuwi mweni. Numba ya Mtuwa Mlungu na shibambaza sha kuzyengeta mji gwa Yerusalemu. 2 Shaka ashi, wantu waweriti wankulaviya tambiku pahala pampindi papanyawitwi, toziya numba Mtuwa Mlungu iweriti haweni nyawi. 3 Selemani kamfiriti Mtuwa Mlungu, kagafata malongoleru ga Dawudi, tati gwakuwi, ila hera yomberi kafiruwitwi kulaviya tambiku ya kulunguziya ubani pahala pampindi papanyawitwi.

4 Shaka shimu, Selemani kagenditi kulaviya tambiku aku Gibeoni, toziya ndo paweriti pahapa pampindi panyawitwi pamanika na panu kaweriti kalaviya elufu za tambiku za kulunguziwa panu kwanja. 5 Aku Gibiyoni Mtuwa Mlungu kamlawiriti Selemani mkulota pashiru, kamgambira, "Guluwi shoseri shagufira hanikupanani."

6 Selemani kamgambira, "Gumlanguziyiti lusungu luvuwa ntumintumi gwaku Dawudi tati gwangu, toziya kakutenderiti kwa waminika, moyu guherepa na ntambu yayimfiliziya Mlungu, na kumlanguziya lusungu lwaku kwa kumpanana mwana yakalikala vinu kushiti sha ukulu. 7 Gwee Mlungu, Mlungu gwangu, guntula neni ntumintumi gwaku kuwera mfalumi pahala pa tati gwangu Dawudi, tembera nankali mwana mdidini na nivimana ndiri ntambu ya yanfiruwa kutenda. 8 Na panu guntula pakati pa wantu waku weni guwasyagula, na womberi ndo wavuwa ata waweza ndiri kuwalangika kwa uvuwa wawu. 9 Hangu, nikuluwa gumpanani neni ntumintumi gwaku moyu gwa kupikanira su niwamuyi wantu waku, su mwezi kuvimana maheri na madoda, toziya ndo gaa yakaweza kuwatoza wantu waku yawawera wavuwa hangu?" 10 Luwa ayi ya Selemani imhelepeziyiti Mtuwa Mlungu, 11 Mtuwa mlungu kamgambira, "Toziya gulaviya luwira ayi, na guliluwira ndiri makaliru matali awu ulunda, na pota kuluwa wankondu waku wahowiziwi, su guliluwira umani wa kulaviya utoza pota likosa. 12 Su, vinu nikutendera ntambu yaguluwiti. Guloli, nikupanana ligoya na mahala geni kwahera muntu yumonga yakapatiti kuwera naga pamberi paku, pota kulawira yumonga handa gwenga na pa gwenga. 13 Viraa, hanikupanani galii geni gugaluwiti ndiri, hanikupanani ulunda na ligoya nentu ya mfalumi yumonga yoseri gwa shaka shaku. 14 Kayi handa pagufata njira na malagalira gangu na kukola lagiru zyangu ntambu yakatenditi tati gwaku Dawudi, su hanikupanani makaliru matali."

15 Selemani pakimukiti, kavimaniti handa iweriti kalota. Ndo kawuya Yerusalemu, na kagoloka palongolu pa Lisanduku la lipatanu lya Mtuwa Mlungu na kamlavilira tambiku ya kulunguziya na za ponga. Shakapanu kawatendera msambu wantumintumi wakuyi woseri.

16 Lishaka limu wadala wawili wahumba, wagenditi kwa Mfalumi Selemani. 17 Yumu gwawu pakalonga, "Gwee Mtuwa gwangu, neni na myangu ayu tulikala numba yimu, neni neriti mwana shaka myangu kaweriti kamlaamu. 18 Mashaka matatu shakapanu, na ayu viraa kaleriti mwana. Paweriti ndiri na muntu yumonga ukaya su twenga wawili hera. 19 Shakapanu, pashiru pamu, mwana gwakuyi kahowiti toziya kamgojera. 20 Shakapanu kimuka pashiru ligonugonu, kamtola mwana gwangu kulawa pabwega paneni shaka neni nampota, kamgojeka pashitanda pakuyi. Shakapanu kamtola mwana gwakuyi yakahowiti, kagagonjeka pashitanda pangu. 21 Panimukiti mandawira na kufira kumnoniziya mwana gwangu, mona mwana kahowa. Panimlolitiloliti weri, nyambula handa kaweriti ndiri mwana gwangu yanimwiwuliti."

22 Kumbiti mdala yumonga kalonga, "Ndala! Mwana gwangu ndo yakawera mkomu, na gwaku ndo yakahowiti!"

Na yomberi mdala gwa kwanja kalonga, "Ndala! Mwana gwaku ndo yakahowiti, na gwaneni ndo ayu yakaweriti mkomu!"

Su wendereya kukakatalana hangu palongolu pa Mfalumi.

23 Shakapanu Mfalumi Selemani kalonga, "Kila yumu gwenu kashonga handa, mwana wakuyi ndo yakaweriti mkomu na yakahowiti gwakuwi ndiri." 24 "Su mfalumi kalagalira mnjegeli ligumba, mfalumi wamjegera ligumba." 25 Mfalumi kalonga, "Mmudumuli mwana ayu yakawera mkomu vipandi viwili na guvibaguli teratera kwa kila mdala."

26 Mdala ulii yakaweriti mawu gwakuyi mwana yakaweriti mkomu kaniti lusungu kamgambira mfalumi, "Shonde shondi, mtuwa gwangu, nagumlaga mwana. Gumpanani myangu ayu mwana ayu yakawera mkomu kamtoli yomberi!"

Kumbiti mdala yumonga kalonga, "Ndala mwana nakawera gwangu ama gwakuyi. Gumdumuli vipandi viwili."

27 Mfalumi Selemani kalonga, "Nagumlaga mwana! Gumpanani mdala gwa kwanja kamtoli, toziya yomberi ndo mawu gwakuyi."

28 Wantu woseri wa Israeli pawapikaniriti mfalumi ntambu yakalaviyiti toza ilii wampananiti ligoya nentu, toziya wavimana kapata luhala lwa kuamuwa kulawa kwa Mlungu yakamtenditi kulaviyi utoza.