1 Su Eliya kulawa Tishibi ya aku Gileyadi, kamgambira mfalumi Ahabu, "Nililapa Kwa litawu lya Mtuwa Mlungu, Mlungu gwa Israeli yakawera mkomu mweni neni yanimguwira. Hapeni kuweri na mangami ama mvula mpaka pantakula shisoweru."

2 Shakapanu, shisoweru sha Mtuwa Mlungu shimwiziriti Eliya. 3 "Guwuki panu gugendi kwagulawa mshenji, gwakalififi kulushemba lwa Keriti lwaluwera kwagulawa mshenji mwa lushemba lya Yoridani. 4 Aku, hagupati mashi ga kulanda mulushemba alu kayi niwagambira kungulu wakujegeri shiboga." 5 Su, Eliya kajimira lilagaliru lya Mtuwa Mlungu, kagenda kulikala kulushemba lya Keriti lwaluweriti kwagulawa mshenji mwa lushemba lwa Yoridani. 6 Kunguru wamjegera libumunda na shinofu, kila mandawira wamjegeriti mabumunda na vinofu pamihi, kalanda mashi kulawa mulushemba. 7 Kumbiti, pa shipindi tunga lushemba alu luyuma toziya itowa ndiri mvula muisi.

8 Panu, shisoweru sha Mlungu, shimwizira Eliya. 9 "Guwuki gugendi mjini Serefati, pakwegera na Sidoni, gulikali aku. Nimgambiziya mdala yumu mkenja kakupanani shiboga aku." 10 Su, Eliya kawuka, kagenda Serefati. Pakasokiti paligomi lya mji, kamwoniti mdala yumu mkenja kankusola mbawu. Eliya kamshema mdala ayu na kumgambira, "Gunjegeri shikombi sha mashi madidini nandi." 11 Mdala ulii pakaweriti kankuwuka kugenda kujega mashi, Eliya kamshemiti kayi na kumgambira, "Gunjegeri na shipandi sha libumunda viraa."

12 Mdala kamgambira, "Nikulapira kwa litawu lya Mtuwa Mlungu, Mlungu gwaku yakawera mkomu, nahera libumunda ata lididini. Shanwera nashi ndo liwoku limu lya ubumu mushiwiga na lipaki lididini musupa. Nsoka panu kusola mbawu, shakapanu ng'endi ukaya kutereka shiboga ashi, mwana gwangu na neni tuliyi shipeli, shakapanu tuhowi toziya ya njala."

13 Eliya kamgambira, "Nagutira. Gugendi gwakatendi ntambu yanongiti. Kumbiti gunyawiri neni uti na kunjegera liandazi lididini, shakapanu guliterekeri shiboga gwenga na mwanagwaku. 14 Toziya Mtuwa Mlungu, Mlungu gwa Israeli, kalonga hangu, ubumu yawuwera mshiwiga mwaku hapeni upunguwi pota lipaki lyaliwera musupa hapeni lipunguwi, mpaka panu neni Mtuwa Mlungu pantowa mvula muisi." 15 Su, mdala mkenja ayu kagenda katenda ntambu yakagambiritwi na Eliya, ata mawu ayu mwana gwakuyi na Eliya wapata shiboga kila lishaka. 16 Ubumu mshiwiga upunguka ndiri, pota lipaki musupa lipera ndiri teratera nakamu na shisoweru sha Mtuwa Mlungu ntambu yakamgambiriti Eliya kalongi.

17 Pa aga, mwana gwa mdala ayu mweni kana numba kalwala, na ali yakuyi iyongereka kuwera layilayi, ata upeleru wakuyi kahowa. 18 Mdala ayu kamgambira Eliya, "Gwenga muntu gwa Mlungu, gwana shitwatira gaa na neni? Hashi gwiziti kwaneni kulaviya vidoda vyaneni na gunjegera kuhowa kwa mwana gwangu?"

19 Eliya kamgambira, "Gunupi mwana gwaku." Su, Eliya kamtola mwana pashifuwa pa mawu gwakuyi, kamtola kugenda pampindi pa shumba shakuyi, kamgonjeka pampindi pa shitanda shakuyi. 20 Shakapanu kamluwa Mtuwa Mlungu pakalonga, "Gwee Mtuwa Mlungu, Mlungu gwangu, hashi, mdala ayu mkenja mweni nilikala kwakuyi na yomberi kankunolera, gumjegera madoda kumlaga mwana gwakuyi?" 21 Shakapanu Eliya kaligonjeka pampindi pa mwana ayu mala ntatu na kumluwa Mtuwa Mlungu, "Gwee Mtuwa Mlungu. Mlungu gwangu, gumwuziliri mwana ayu ukomu wakuyi!" 22 Mtuwa Mlungu kapikanira kuluwa kwa Eliya, mwana kanja kupumula kayi. 23 Eliya kamwuziya mwana pasi kwa mawu gwakuyi, kamgambira, "Guloli! Mwana gwaku mkomu." 24 Mdala mkenja ayu kamgambira Eliya, "Vinu nivimana nakaka handa gwenga ndo muntu gwa Mlungu, na visoweru vyakakupananiti Mtuwa Mlungu guvilongi ndo vya nakaka."