1 Mfalumi Hiramu gwa Tiru, yakaweriti ganja gwa Dawudi, pakapatiti shisoweru handa Selemani kaswagwa lipaki kawera mfalumi pahala pa tati gwakuyi, katumiti wantumintumi wakuyi. 2 Selemani kamwuziliriti Hiramu ulagilagi hawu, 3 "Guvimana handa tati gwangu Dawudi kaweza ndiri kumnyawira Mtuwa Mlungu, Mlungu gwakuyi, numba ya Mlungu ya kumguwira, toziya ya nkondu yayiweriti imuzyengeta wega zoseri na isi ya pakwegera mpaka panu Mtuwa Mlungu pakamupananiti ukanka kwa wankondu wakuyi. 4 Kumbiti vinu, Mtuwa Mlungu, Mlungu gwangu, kampanana ponga wega zoseri. Nahera mnkondu ama ntabiku. 5 Hangu amuwa kumnyawira Mtuwa Mlungu, Mlungu gwangu, numba ya kumguwira. Ayi ndo teratera nakamu handa Mtuwa Mlungu ntambu yakamgambiziyiti tati gwangu pakalonga. Mwana gwaku, mweni hanimtendi kalivagi pashiti shaku sha ukulu, hakanyawili numba! 6 Vinu su, guwagambiziyi wantu waku wandumuliri mtera ya miyerezi ya Lebanoni. Wantu wa neni hawaweri pamuhera na wantu waku mlihengu ali, naneni haniwalipi wantu waku ntambu yagulonga, hangu ntambu yaguvimana, kwahera kwatwenga muntu yoseri yakanaumana wa kudumula mitera handa mwenga Wasidoni." 7 Hiramu kanemeliriti nentu pakapatiti ulagilagi awu wa Selemani, kalonga, "Mtuwa Mlungu kazyumi shaka ashi, kwa kumpanana Dawudi mwana yakana luhala hakakolimlima wantu awa wavuwa." 8 Shakapanu Hiramu kamjegera Selemani ulagilagi, pakalonga, "Nanka ulagilagi waku, naneni nakala kutenda mafiliru gaku kuusu mbawu za miyerezi na mitera ya miberushi. 9 Wantu waneni hawapapi magogu na kugaseliziya kulawa Lebanoni mpaka kubahali na kugatawa mafungumafungu gayeruki pampindi pamashi mpaka pahala pagung'ambiziya. Aku hagayopoluwi, na gwenga hagugangi. Kwa uwega waku, gwenga hagumpanani shiboga toziya ya wantu wa ukaya kwaneni."

10 Su, Hiramu kampanana Selemani mbawu zoseri za miyerezi na mibereshi zyakafiriti, 11 na Selemani kampanana Hiramu nganu madebi laki mbili na alubayini elufu, na lipaki liherepa madebi miya mbili kila shinja, toziya ya wantu wa ukaya kwakuyi.

12 Su, Mtuwa Mlungu kampanana Selemani luhala ntambu yakamgambiriti kala. Kuweriti na ponga pakati pa Selemani na Hiramu, watenda mapatanu pakati pawu.

13 Mfalumi Selemani kajojoniriti wantu selasini elufu kulawa kila pahala muisi ya Israeli, watendi lihengu lya kukakanika. 14 Kamtula Adoniramu kaweri mgolokera gwawu. Kawabagula wantu awa muvipinga vitatu vya wantu elufu lilongu kila yumu kajega vipinga avi kwa zamu mwezi gumu Lebanoni na miyezi miwili ukaya. 15 Selemani kaweriti viraa na wapapa visanka elufu sabini, na wasongola mabuhi kuvigongu elufu semanini,

16 viraa na walongoziya elufu tatu na miya tatu yawagolokiriti lihengu ali na yawatenda mahengu woseri. 17 Kwa lagalira ya mfalumi, wabawiti mabuhi makulu na ga ulunda, su gasongolwi toziya ya kunyawira lyanjiru lya numba. 18 Su hangu ndo wanyawa wa Selemani na Hiramu na wantu wa mji gwa Gebali ntambu yawatanditi mabuhi na mbawu za kunyawira numba ayi.