1 Su, Mfalumi Selemani kawajojoniliti wantu aku Yerusalemu wazewi na wakulu woseri wa makabira na nkolu za Israeli su waliwusiyi lisanduku lya lipatanu lya Mtuwa Mlungu kulawa Siyoni ndo mji gwa Dawudi. 2 Wantu woseri waliwoniti, shaka sha msambu, mumwezi gwa Etanimu, ndo mwezi gwa saba. 3 Pa wazewi woseri wa Israeli kusoka, watambika walipapiti lisanduku lya lipatanu, 4 nakujega Numba ya Mtuwa Mlungu. Walawi na Watambika wahamiziyiti lisanduku lya lipatanu na liringu linanagala lya kuliwona, na vyombu vinanagala vyoseri vyaviweriti amu Mliringu. 5 Mfalumi Selemani na mkutanu goseri gwa Israeli wajojonikiti palongolu pa lisanduku lya lipatanu, na womberi walaviya litambiku. Ng'ombi na kondolu yawawalangika ndiri. 6 Shakapanu watambika waliyingiziya lisanduku lya lipatanu lya Mtuwa Mlungu pahala pakuyi, mushumba kati mwa numba pahala pananagala nentu, na kulitula pasi pa mbapatiru za makelubi. 7 Mbapatiru za viumbi avi yavishemitwi makelubi watandaziyiti mbapatiru zawu pampindi pa lisanduku lya lipatanu, pampindi pa mitera ya kupapira lisandiku. 8 Toziya mitera ayi iweriti mitali nentu, mpeleru zakuyi ziweziti kuwoneka pahala pakuyi pananagala, palongolu pa shumba sha mngati, kumbiti iwezekana ndiri kuwoneka kulawa uwega wakunja. Mitera ayi isigala mpaka leru. 9 Paweriti ndiri na shintu shoseri mngati mwa lisanduku lya lipatanu ira virii vibawu viwili vya mabuwi vyeni Musa kavituliti amu kulii Herobu, pahala Mtuwa Mlungu katuliti lipatanu na Waisraeli pawalawiti Misri.

10 Iwera, watambika pawalawiti palii pahala pananagala liwundu limemiziya numba nkulu ya Mlungu. 11 Ata watambika wasinditi kugoloka su watendi lihengu lyawu toziya ya liwundi ali, toziya Mlungu kalilanguziya kamnumba yakuyi.

12 "Shakapanu Selemani kalonga,

Mtuwa Mlungu kalonga handa,

hakalikali muluwindu totolu. 13 Nakaka nikunyawira numba nkulu iherepa ya kulikala, pahala pa kulikala mashaka goseri."

14 Shakapanu, Selemani kawagalambukira wantu woseri wa Israeli, pawawera wagoloka kawatekelera. 15 Kalonga, "Kakwiswi Mtuwa Mlungu, Mlungu gwa Israeli, toziya kwa makakala gakuyi katenda shakalongi kamupanani tati gwangu Dawudi pakalonga, 16 Kwanjira paniwawusiyiti wantu wa neni Israeli muisi ya Misri, syagula ndiri mji goseri mumakabira ga Israeli su nyawirwi numba yakumguwira, kumbiti nimsyagula Dawudi, kawakolimlima wantu waneni Israeli."

17 Hangu, "Tati gwangu Dawudi mmoyu mwakuyi kafiliti kunyawa numba yakumguwira Mtuwa Mlungu, Mlungu gwa Israeli. 18 Kumbiti Mtuwa Mlungu kamgambira tati gwangu Dawudi, ndo iherepa handa gufiriti mumoyu mwaku kunyawira numba. 19 Ata hangu, ndo gwenga ndiri hagunyawili numba, ila mwana gwaku mweni hakanyawiri numba ayi."

20 "Na vinu, Mtuwa Mlungu katenditi shilii shakalongiti, toziya nwera mfalumi badala ya tati gwangu Dawudi, na kushivagira shiti sha shifalumi sha Israeli handa Mtuwa Mlungu ntambu yakatakuliti, viraa nyawa numba ya kumguwira Mtuwa Mlungu, Mlungu gwa Israeli. 21 Nentu ya aga, ndula gweka pahala pa kutula lisanduku lya lipatanu lyeni mngati mwakuyi mna lipatanu lyakatenditi Mlungu na tati gwetu, shaka pakawalaviyiti muisi ya Misri."

22 Shakapanu Selemani kagolokiti palongolu pa shitalawanda, na yomberi pakawera palongolu pa wantu woseri wa Israeli, kanyasuliti mawoku gakuyi kumpindi. 23 Pakalonga, "Gwee Mtuwa Mlungu, Mlungu gwa Israeli, kwahera Mlungu yumonga handa gwenga, kumpindi, ama pasipanu! Gwenga gwa mwaminika, toziya guntendera lipatanu lyaku na kuwalanguziya mafiliru gaku kwa wantumintumi waku yawalikala pawakujimira kwa moyu gwawu goseri. 24 Gutenda shagulongiti kwa ntumintumi gwaku Dawudi tati gwangu, galii gagulongiti gugatenda leru kwa uwezu waku gamweni. 25 Hangu vinu, gwee Mtuwa Mlungu, Mlungu gwa Israeli, nikuluwa viraa gutendi shagulongiti kwa ntumintumi gwaku Dawudi tati gwangu, pagulonga. Mashaka goseri haguweri na mwiwuka gwa kulikala mushiti sha mfalumi sha Israeli, payiwera wiwuka waku hawaweri waloleru kuusu mgenderanu gwawu palongolu pa neni handa gwenga ntambu yagutenditi palongolu paneni. 26 Su, gwee Mlungu gwa Israeli, nikuluwa gutendi goseri aga gagumgambiriti ntumintumi gwaku Dawudi tati gwangu."

27 "Kumbiti, gwee Mlungu, nakaka hagulikali pasi panu? Payiwera ata mpindi za kumpindi nentu zikutosiya ndiri, ikutosiyi hashi numba ayi yaniinyawiti? 28 Kumbiti gwee Mtuwa Mlungu, Mlungu gwangu, neni ntumintumi gwaku nikuluwa gumpikaniri na kundendera luwa yangu yanduwa leru. 29 Guyilori numba ayi pashiru na paliwala, pahala peni gulonga, Panu wantu ndo hawalipanani ligoya litawu lyaneni, gumpikaniri paniza pahala panu kuluwa. 30 Gupikanili maluwiru gangu neni ntumintumi gwaku na ga wantu waku Waisraeli pawaluwa pawalola pahali panu. Gupikanili maluwiru kulawa aku kumpindi kwagulikala, na pagupikanira kala, gutulekeziyi."

31 "Muntu pakamkoseya myaguyi, na yomberi kajengwa palongolu pa shitalawanda shaku munumba ayi, na yomberi pakalilapa, 32 shondi gwenga gupikinili aku kumpindi, gutoli atuwa na kuwatoza wantumintumi waku. Yakawera na likosa gumtozi ntambu ya makosa gakuyi, yakawera ndiri na likosa gumleki kwa waminika wakuyi."

33 "Payiwera wantu waku Israeli, wasinda na wankondu waku toziya ya vidoda vyawatenditi kwajiri yaku, na womberi pawaluwa kulekiziwa kwawu na kulijimira litawu lyaku pawaluwa guwalekeziyi kwa unanagala munumba ayi, 34 su, guwapikaniri kulawa aku kumpindi, guwalikiziyi wantu waku Israeli vidoda vyawu, shakapanu guwawuziyi muisi yaguwapananiti wazeyi wawu."

35 "Shaka mpindi pazitata na mvula hapeni itowi toziya watenda vidoda wantu awa, na pawaluwa pawalola pahala panu na kulijimira litawu lyaku, na kugalambuka kulawa mvidoda vyawu na guwaazibu, 36 shondi, guwapikaniri kulawa aku kumpindi. Na guwalekeziyi vidoda vya wantumintumi waku, wantu waku Israeli, aku paguwafunda kufata njira iherepa, gutowi mvula muisi yaku ayi yeni guwapananiti wantu waku iweri yawu."

37 "Payiwera kwana njala muisi, ama tauni, na kuyuma, na ulweri wa vimeru, na wanjombi ama vikwitakwita, ama payiwera wantu waku wazyengetwa na wankondu wawu mumji gwawu goseri gulii, payiwera kwana likomangu lyoseri ama ulweri woseri, 38 shondi, gupikanili maluwiru goseri yawagaluwa wantu waku, Israeli, ama yagaluwilwa na muntu yoseri ama wantu waku woseri wa Israeli, kila muntu pakavimana ntabiku ya mmoyu mwakuwi, pakakuluwa aku pakalanguziya mawoku gakuyi kulola numba ayi. 39 Su, gupikinili kumpindi aku, gulekiziyi na guwatangi, viraa gumtenderi kila muntu ntambu yakafiruwa ndo gwenga hera guvimana luhala lya mimoyu ya wantu woseri, 40 su wantu wakupanani ligoya nentu shaka shoseri pawalikala muisi yaguwapananiti wambuyi wetu."

41 "Irahayi, shaka mhenga yakawera ndiri yumu gwa wantu waku Israeli pakiza kulawa isi ya kutali kwajiri ya litawu lyaku, 42 mana wantu wa maisi gamonga hawapikaniri zyuma zaku na kuusu likakala na uwezu waku, muntu ayu pakafira kuluwa kaloli munumba ayi, 43 nikuluwa gumpikaniri kulawa aku kumpindi, na gumpanani mhenga ayu goseri gakakuluwa, su wantu woseri pasipanu wapati kulimana litawu lyaku na wantu waku wakupanani ligoya nentu handa wantu waku Israeli, na wapati kuvimana handa numba ayi yeni niyinyawa, imanikana kwa litawu lyaku."

44 "Wantu waku pawagenda kulikomanga kunkondu na wankondu wawu koseri kulii paguwajega, na womberi pawakuluwa pawalola kumji gwagusyaguliti na numba yaniyinyawiti kwajiri ya litawu lyaku, 45 nikuluwa gupikanili luwa yawu na maluwiru gawu aku kumpindi, guwapanani ukanka kunkondu."

46 "Payiwera hawatendi vidoda kwa gwenga toziya kwahera muntu yakatenda ndiri vidoda, na gwenga paguwakalalira na kuwaleka wasindi na wankondu, ata wajengwi lopola mpaka isi ya wankondu yayiwera patali ama pakwegera, 47 handa pawawera aku kwawawajegiti hawagalambuki mimoyu na kuleka vidoda na kukuluwa walekiziwi, pawalonga, Tutenda vidoda, tupotoka na kutenda makontola, 48 viraa shaka ashi payiwera muisi ya wankondu wawu, pawalonga woya vidoda kwa moyu gwawu goseri na kwa rohu yawu yoseri na handa pawakuluwa agawu pawalola mji agu gweni gugusyaguliti na numba ayi yeni niyinyawiti kwajili ya litawu lyaku, 49 su, nikuluwa kulawa aku kumpindi gupikanili luwa yawu na guwatangi. 50 Guwalekeziyi wantu waku vidoda vyawatenditi kwaku na ugalambuka wawu, guwawoneri lusungu palongolu pa wankondu wawu, su wankondu wawu wawawoneri lusungu. 51 Toziya ndo wantu waku, na ndo ulunda waku, wantu weni guwalaviyiti Misri kulawa mukutabika nentu."

52 "Guloli kuluwa kwa ntumintumi gwaku na kuluwa kwa wantu waku Israeli, guwapikaniri kila pawakuluwa, 53 Toziya, gwee Mtuwa Mlungu guwatula gweka wantu wa maisi gamonga pasipanu, su waweri wantu waku gamweni ntambu yagubweriti kwa njira ya Musa, ntumintumi gwaku, shaka shilii paguwalaviyiti wambuyi wetu muisi ya Misri."

54 Shakapanu Selemani pakamaliliti kuluwa kwa Mtuwa Mlungu, kagolokiti palii palongolu pa shitalawanda sha Mtuwa Mlungu, pahali pakaweriti kasundamala pakanyasuliti mawoku gakuyi kumpindi. 55 Kagolokiti, kawatekelera wantu woseri Israeli yawaweriti wajojonikiti panu, pakalonga kwa kubota, 56 "Kakwiswi Mtuwa Mlungu mweni kawatenda wantu wakuyi Israeli woyeri, kulinganira na shilii shakatakuliti. Kwahera ata shishoweru shimu shakasinditi. Shakalongiti shoseri kupitira wantumintumi gwakuyi Musa. 57 Mtuwa Mlungu, Mlungu gwetu, kaweri na twenga, ntambu yakaweriti kwa wambuyi gwetu, tuluwa nakatuleka, nakatwasa. 58 Yomberi kalonguziyi miyoyu yatwenga kwakuyi, su tufati njira zakuyi, patukola amuli zakuyi malonguziya gakuyi na malagaliru gakuyi gakawapananiti wambuyi wetu. 59 Su, visoweru vyangu avi ndo luwa yaneni kulongolu kwa Mtuwa Mlungu, gaweri pakwegera na Mlungu, Mlungu gwetu, paliwala na pashiru, na yomberi kampanani ntumintumi gwakuyi na wantu wakuyi Israeli, su wapati vintu vyawafira kila lishaka. 60 Na wantu wa maisi goseri pasipanu hagamani handa nakaka Mtuwa Mlungu ndo Mlungu, kwahera yumonga. 61 Na mwenga muweri waminika kwa Mtuwa Mlungu, Mlungu gwetu, pamfata malagira gakuyi na kujimira amuli zyakuwi zoseri ntambu yamtenda leru."

62 Shakapanu mfalumi Selemani na Waisraeli woseri yawaweriti pamuhera na yomberi wamlaviliriti Mtuwa Mlungu tambiku. 63 Na Selemani kamlaviliyiti Mtuwa Mlungu tambiku za ponga. Ng'ombi ishilini na mbili elufu na kondolu miya yimu na ishilini elufu. Hangu ndo mfalumi na wantu woseri ntambu yawayilumikiti numba ya Mlungu. 64 Lishaka liraarii, mfalumi kapalumikiti pahala pakati pa ligeleri papaweriti kulongolu kwa numba ya Mtuwa Mlungu toziya panu ndo pakalaviyiti tambiku ya kulunguziya, tambiku ya viboga na lipaki lya tambiku ya ponga, toziya ya shitalawanda shilii sha shaba shitosheya ndiri tambiku zoseri azi.

65 Na Selemani kwa shaka sha mashaka saba na mashaka saba gamonga, kwa mashaka malongu na msheshi katenditi msambu pamuhera na Waisraeli woseri, na womberi walawiti kwanjira shiyingiliru sha Hamati, mpaka lushemba lwa Misri. 66 Mulishaka lya nane, Selemani kawagambiti wantu kwahere, na womberi wamtekelera mfalumi, wagenda ukaya kwawu pawanemelera toziya ya lusungu lweni Mtuwa Mlungu kalunguziyiti kwa Dawudi, ntumintumi gwakuyi, na kwa wantu wakuyi Israeli.