1 Pa shaka shivuwa, mushinja sha tatu sha kuyuma, shisoweru sha Mtuwa Mlungu shimwizira Eliya, "Gugendi gwakalilanguziyi kwa mfalumi Ahabu, shakapanu hantowi mvula muisi." 2 Su, Eliya kagenda kulilanguziya kwa Ahabu. Shaka ashi, njala iweriti ikalipa nentu aku Samariya. 3 Ahabu kamshema Obadiya mgolokera gwa liboma. Obadiya kaweriti muntu yakamguwira Mtuwa Mlungu, 4 shaka Yezebeli pakawalagiti wambuyi wa Mtuwa Mlungu, Obadiya kawatoliti wambuyi wa Mlungu miya yimu, kawafifa amsiniamsini mumampanga mawili, kawera kankuwajegera shiboga na mashi. 5 Shakapanu, Ahabu kamgambira Obadiya, "Gupiti muisi, kubwiru zoseri za mashi, na nshemba zoseri, pamonga hatupati ndundu na panu hatuwalopoziyi wafalasi wamu na punda farasi wa twenga, vigong'olu na wiza kufuwa hape tufiru kuwalaga." 6 Wabagulana isi su wapati kuyipitira yoseri, Ahabu kagenda uwega wumu na Obadiya uwega umonga.

7 Obadiya pakaweriti munjira, kaliwoniti na Eliya, na Obadiya pakammaniti Eliya, kang'ong'onala pasi na kulonga, "Hangu! Ndo gwenga mtuwa gwaneni Eliya?"

8 Eliya kamgambira, "Yina! Ndo neni Eliya. Gugendi gwakamgambiri mtuwa gwaku handa napanu."

9 Obadiya kalonga, "Nkosa shishi ata gufira kundula muatali su naguwi na mfalumi Ahabu? 10 Nikulapira kwa litawu lya Mtuwa Mlungu, Mlungu gwaku yakaweri mkomu, handa mfalumi kawera kankukusakula pasipanu poseri. Na mfalumi yoseri pakalonga handa hakeniwoniki aku, Ahabu kamfiriti mfalumi ayu kalilapi na wantu wakuyi handa nakaka gwa panu. 11 Na vinu, gufira ng'endi kumgambira handa gwenga gwa panu! 12 Nana lyoga katepu pambuka, Rohu gwa Mtuwa Mlungu hayikunyasuli na kukujega pahala panipamana ndiri! Ng'enda kumgambira Ahabu handa gwa panu, na yomberi pakakusakula na kakuwona ndiri, hakandagi neni, tembera neni ntumintumi gwaku nimguwira Mtuwa Mlungu kwanjira undemba wangu. 13 Hashi, gwahera shisoweru handa Yezebeli pakaweriti kankuwalaga wambuyi wa Mlungu, neni niwafifiti wambuyi wa Mlungu miya yimu, wantu amusiniamusini mlipanga, nwera nankuwapanana shiboga na mashi? 14 Vinu gung'ambira ng'endi kumgambira mtuwa gwangu handa gwenga Eliya gwa palapanu! Ahabu hakantagi." 15 Eliya kamgambira, "Nikulapira kwa litawu lya Mtuwa Mlungu gwa mashonta, yakalikala mweni nimtendera, Lelu ayi hanililaviyi palongolu pa mfalumi." 16 Su, Obadiya kagenda kwa mfalumi Ahabu, kamupanana visoweru avi. Ahabu kagenda kuliwona na Eliya. 17 Ahabu pakamwoniti Eliya, kalongiti, "Kumbi nakaka ndo gwenga, mtabisiya gwa Waisraeli?"

18 Eliya kamwankula, "Mtabisiya gwa Israeli neni ndiri, ndo gwenga na kaya ya tati gwaku. Mwenga mzilema lagiru za Mtuwa Mlungu na kuwaguwira wamlungu wa Baali. 19 Vinu guwajojoniri wantu woseri wa Israeli palongolu paneni kulugongu aku lwa Karimeli. Ntambu iraayi, guwajojoniri walii wambuyi miya msheshi na amusini wa Baali, na wambuyi wa miya msheshi wa Ashera mlungu gwa shidala, weni watenderuwa na Yezebeli."

20 Su, Ahabu kawashema wantu woseri wa Israeli, kawajojonira na wambuyi woseri kulii kuligongu lwa Karimeli. 21 Shakapanu, Eliya kawasegelera wantu awa, kawagambira, "Kwa shaka gaa hamuweli na maholu mawili? Payiwera Mtuwa Mlungu, ndo Mlungu mmufati, kumbiti payiwera Baali ndo Mlungu, su, mmufati Yomberi." Kumbiti wantu wamwankula ndiri shisoweru shoseri. 22 Panu, Eliya kawagambira, "Neni hera ndo gweka yangu mbuyi gwa Mtuwa Mlungu yansigaliti, kumbiti wambuyi wa Baali kwana miya msheshi na amsini. 23 Aya! Mjegi wang'ombi shipalu wawili, wambuyi wa Baali walisyaguliri ng'ombi shipalu yumu, wamlikituli, wamhanjangi vipandi na kumtula pampindi pa mbawu, pota kukoziya motu. Naneni viraa hanimtoli ng'ombi shipalu yumonga, hanumlikituli na kumtula pampindi pa mbuwu pota kukoziya motu. 24 Shakapanu, womberi hawamluwi mlungu gwawu, Na neni hanimluwi Mtuwa Mlungu. Mlungu hakanankuli kwa kujega motu, ayu ndo Mlungu." Na panu lipinga lyoseri halilongi, "Yina! Visowelu avi gwankula weli." 25 Shakapanu, Eliya kawagambira wambuyi wa Baali, "Mwenga ndo mvuwa, su mwanji kulisyaguliliri ng'ombi shipalu, mmutandi na kumluwa mlungu gwenu, kumbiti namkoziya motu." 26 Wambuyi awa wamtola ng'ombi shipalu gwawu yawapananitwi, wamtanda, shakapanu wanja kumlilira Baali kulawa mandawira mpaka paliwala, pawakopokakopoka na kuwegukaweguka kushizyengeta shitalawanda shawanyawiti pawalonga, "Gwee Baali, gutupikaniri!" Kumbiti palawira ndiri liziwu lyoseri, pota kwahera yakawawankuliti. 27 Payisokiti saa sita paliwala, Eliya kanja kuwajongera pakalonga, "Mluwi kwa kubotanga! Yomberi ndo mlungu! Pamonga kawera mumaholu nentu, kagenda kumihamba, ama kamwanja! Ama kagonja, mfiruwa kumwimusiya!" 28 Wambuyi awa wabotanga nentu, walihanjahanja kwa vimagi vididi na vimagi vikulu, kugenderana na shitiba shawu, ata walawa mwazi.

29 Waendiriyiti kubotanga na kulitenda handa wanalukwali mpaka paliwala shaka sha kulaviya tambiku, kumbiti kwahera yakawankuliti pota kuwashera.

30 Shakapanu, Eliya kawagambira wantu, "Msegeleri pakwegera naneni." Womberi wamsegelera. Shakapanu Eliya kanyawa syayi shitalawanda sha Mtuwa Mlungu shashiweriti shibomuluwa. 31 Kagatoliti mabuwi lilongu na mawili, walanga ya makabira lilongu na mawili yagapananitwi matawu ga wana wa Yakobu geni Mtuwa Mlungu kamgambiriti, "Litawu lyaku haliweri Israeli." 32 Kwa mabuwi aga, Eliya kamnyawiliti Mtuwa Mlungu, kabawa mfeleji kuzyengeta shitalawanda ashi, mfeleji yaguweza kutola lita lilongu na mhanu lya mashi. 33 Shakapanu kapanga mbawu weri, kamhanja vipandi ng'ombi shipalu ayu, kavitula pampindi pa mbawu. Shakapanu kawagambira wantu, "Mmemiziyi viwiga msheshi vikulu vya mashi mwakayitiri tambiku ayi ya kulunguziya na mbawu." Watenda hangu. 34 Shakapanu kawagambira, "Mwuyiri kayi." Nawomberi watenda hangu mala ya pili. Na yomberi kawagambira, "Mtendi hagu kayi mala ya tatu." Womberi watenda hangu.

35 Mashi ganyililika pasi poseri wega zoseri za shitalawanda, mpaka gamemaziya mfeleji.

36 Pamihi shaka sha kulaviya tambiku, mbuyi gwa Mlungu Eliya kasegelera pashitalawanda, kaluwa, "Gwee Mtuwa Mlungu, Mlungu gwa Abrahamu na Isaka na Israeli, guwalanguziyi wantu leru ayi handa gwenga ndo Mlungu gwa Israeli na handa neni ndo ntumintumi gwa gwenga na ntenda mirandu ayi kwa amuli ya gwenga. 37 Gunankuli Gwee Mtuwa Mlungu, gunankuli su wantu awa wavimani kuwera gwenga Mtuwa Mlungu ndo Mlungu, na handa guyigalambula miyoyu yawu wakuwuyiri." 38 Kamukamu Mtuwa Mlungu kasulusiya motu, kayilunguziya tambiku ayi ya kulunguziwa, mbuwu, mabuwi na lidikudiku, na kugayumuziya mashi goseri mumfereji.

39 Wantu pawawoniti hangu, waguwiti makukama pawalonga, "Mtuwa Mlungu ndo Mlungu, Mtuwa Mlungu ndo Mlungu!"

40 Eliya ndo kawagambira, "Muwabati wambuyi woseri wa mlungu gwa Baali. Namleka ata yumu gwawu katoloki!" Su, wantu wawabata woseri, na yomberi Eliya kawajega mlushemba Kishoni, kawalagira aku.

41 Pa haga, Eliya kamgambira mfalumi Ahabu, "Gugendi gwakaliyi na kulanda. Mpikanira mlindimiru gwa mvula." 42 Su, Ahabu kagenda zyakuwi kuliya na kulanda, na yomberi Eliya kakwena pampindi paupeleru wa lugongu Karimeli, na aku kang'ong'ola mpaka pasi na kushitula sheni shakuyi pakati pa manung'unu gakuyi. 43 Shakapanu kamgambira ntumintumi gwakuyi, "Vinu, gugendi gwakalori uwega wa Bahari." Ntumintumi kagenda, kalola, shakapanu kawuya kalonga, "Kwahera shintu." Eliya kamgambira, "Gugendi mala saba kukola." 44 Mala ya saba, ntumintumi ayu kawuya, kalonga, "mona liwundi lididika handa ukulu wa shiganja sha muntu shilawa mubahari." Eliya kamgambira, "Gugendi gwakamgambiri mfalumi Ahabu katandi mbutuka yakuwi ya kukwega kwa farasi, kasuluki, nakiza kutenduwa na mvula."

45 Shaka shivuwa ndiri mpindi ziyalika mawundi gazotopa, lyega livuma, itowa mvula nkulu. Ahabu na yomberi kakwena mbutuka yakuwi ya kukwega na farasi, kawuya Yerizeeli. 46 Makakala ga Mtuwa Mlungu gamwizira Eliya, na yomberi kalitawa ng'ering'eri lihabiti lyakuyi, katuga na kumlongolera Ahabu kwingira kumjini Yezireeli.