1 Lishaka limu Yerubowamu kaweriti kagoloka pambwega pa shitalawanda kutumiziyi ubani. Su, muntu gwa Mlungu kulawa Yuda kasoka Beteli katumitwi na Mtuwa Mlungu. 2 Muntu ayu kashipangira kwa lagiru lya Mlungu pakalonga, "Gwee shitalawanda! Mtuwa Mlungu kalonga hangu. Hakiwuki mwana mulukolu lwa Dawudi, litawu lyakuyi Yosiya. Ayu hakawatoli watambika yawatendera pahala pa pampindi na kutambika pampindi paku, yina, mifupa ya wantu hayilunguziwi pampindi paku!" 3 Na mbuyi gwa Mlungu kalaviya lirangaliru lishaka liraalirii, pakalonga, "Hali ndo liragaliru lyakalongiti Mtuwa Mlungu. Shitalawanda ashi hashibomoki, na malivu yagawera pampindi pakuyi hagitiki."

4 Mfalumi Yerobowamu pakapikaniriti visoweru avi vya muntu gwa Mlungu kuusu shitalawanda aku Beteli, katalipisiyiti liwoku pakalonga, "Mmubati muntu ayu!" Katepu liwoku ali lyakalitalapisiyiti kwa muntu ayu, liyuma, kaweziti ndiri kayi kulipinda. 5 Shitalawanda ashi shibomoka na malivu gakuyi gitika pasi, handa lirangaliru lilii lyakalaviyiti muntu gwa Mlungu na shisoweru sha Mlungu. 6 Su, mfalumi Yerobowamu kamgambira mbuyi gwa Mlungu, "Shondi, gumgambiri Mtuwa Mlungu, Mlungu gwaku, gunduwiri liwoku lyangu liponi." Na mbuyi gwa Mlungu kamluwa Mtuwa Mlungu, na liwoku lya Mfalumi lipona, liwuyira ntambu yakuyi handa kwanja. 7 Mfalumi kamgambira muntu gwa Mlungu, "Gwizi ukaya kwaneni gwakaliyi shiboga, naneni hanikupanani lifupu."

8 Kumbiti muntu gwa Mlungu kamgambira, "Ata handa pagumpanana nusu ya ulunda waku, hapening'endi pamuhera na gwenga. Hapeni ndiyi pota kulanda mashi ga pahala panu, 9 toziya Mtuwa Mlungu kang'ambiriti hapeni ndiyi shiboga ama kulanda mashi, pota nawuya njira iraairii yanfatiti kwiza panu." 10 Su, muntu ayu kagenda zakuwi, pota kawuyira kayi ndiri njira ilii yakaziriti Beteri.

11 Shaka ashi, paweriti na mbuyi gwa Mlungu yumu mzewi aku Beteli. Wana wakuwi wamgendera, wamgambira mirandu yoseri yakatenditi yulii muntu gwa Mlungu lishaka ali, aku Beteli wamgambira viraa visoweru vya muntu ulii yakamgambiriti mfalumi Yerubowamu. 12 Tati gwawu kawakosiya, "Kapita njira yoshi?" Na womberi wamlanguziya njira yakapititi ulii muntu gwa Mlungu kulawa Yuda. 13 Na yomberi kawagambira wana wakuyi, "Mnyalikiri punda ayu." Na womberi wamyalikira punda, na mzewi kakwena pampindi pakuyi. 14 Kamfata muntu gwa Mlungu uliii, kamwona kalivaga pasi pa mtera gwa mwaloni. Su, kamkosiya, "Hashi gwenga ndo yulii muntu gwa Mlungu kulawa Yuda?" Na yomberi kamwankula, "Yina! Ndo neni." 15 Mzewi ulii kamgambira, "Gwizi ukaya kwaneni, gukaliyi shiboga."

16 Kumbiti yomberi kamgambira, "Meza ndiri kuwuya pamuhera na gwenga, pota kwingira ukaya kwaku. Meza ndiri kuliya shiboga ama kulanda mashi pahala panu, 17 toziya Mtuwa Mlungu kang'ambiriti nandiya shiboga ama kulanda mashi pahala panu, nambuya kwa njira yaniziriti."

18 Mzeyi ayu gwa Beteli kamgambira, "Neni viraa ndo mbuyi gwa Mlungu gambira gwenga, na Mtuwa Mlungu kayowera naneni kwa njira ya ntumintumi gwa kumpindi pakalonga, gumwuziyi ukaya kwaku, kaliyi shiboga na kulanda mashi." Kumbiti mbuyi ayu gwa Mlungu mzewi kaweriti kankumpayira hera. 19 Su, muntu gwa Mlungu kawuya pamuhera na yomberi, kaliya shiboga na kulanda mashi kwa mzewi ayu. 20 Pawaweriti wankuliya, shisoweru sha Mtuwa Mlungu shimwizira ayu mbuyi gwa Mlungu mzewi, 21 na yomberi kamgambira kwa liziwu ayu muntu gwa Mlungu kulawa Yuda, "Mtuwa Mlungu kalonga hangu. Gwenga guleka kujimira ulagilagi wa Mtuwa Mlungu, gwenga gufata ndiri lagalira yakakupananiti Mtuwa Mlungu. Mlungu gwaku. 22 Badala yakuyi, guwuya panu, guliya shiboga na kulanda mashi pahala panu peni gugambiritwi naguliya shiboga pota kulanda mashi. Su, nshimba yaku hapeni gufindilwi kulisembi lya wambuyi waku."

23 Pawamaliriti kuliya, mbuyi ayu gwa Mlungu mzewi kamyakila punda ayu muntu gwa Mlungu, na yomberi kawuka. 24 Pakaweriti kankugenda zakuyi, simba kaliwona nayi mnjira, kamlaga, nshimba yakuwi iweri iyaswa panu panjira, punda gwakuyi na simba ayu waweriti wagoloka pambwega pakuyi. 25 Wantu pawapititi panu na kugawona mawuti mnjira, na simba kagoloka pakwegera nayi, wagenda mpaka mjini mwakaweriti kankulikala yulii mbuyi gwa Mlungu, wawagambira wantu,

26 Mbuyi yulii mweni kaweriti kamshemera ukaya kwakuwi pakapikaniriti shisoweru ashi, kalonga, "Ayu ndo ulaaurii muntu gwa Mlungu yakalemiti kujimira shisoweru sha Mtuwa Mlungu kamtuma simba, kamkangala na kumlaga ntambu yakaweriti kamgambira." 27 Panu kawagambira wana wakuyi, "Mnyalikiri punda." Na womberi wamyalikira. 28 Mzewi uli kagenda, kagawona mauti ga muntu gwa Mlungu mnjira, simba na punda gwakuwi wapambwega pakuyi, simba ayu kagaliyiti ndiri mauti pota kamkangala punda. 29 Su, mbuyi gwa Mlungu mzewi ayu kagatola mauti ga muntu gwa Mlungu, kagatula pampindi pa punda gwakuyi, kagawuziya kumjini Beteli, kudayilira shiwembu shakuyi na kumfindira. 30 Su, kamfindira mulisembi lyakuyi, na yomberi pamuhera na wana wakuyi wadaya shiwembu shakuwi pawalonga, "Mbuyi! Mlongu gwangu!" 31 Pa kufindira, mbuyi kawagambira wana wakuwi, "Pahowa, mnfindiri mulisembi liraaali lyakafindilitwi muntu gwa Mlungu, myituli mifupa yaneni pambwega pa mifupa yakuwi. 32 Mirandu yoseri yakalagaliritwi na Mtuwa Mlungu toya ya shitalawanda sha Beteli, na pahala poseri pa kutambikira pahala pampindi pa miji gwa Samariya, nakaka hayilawiri." 33 Mfalumi Yerubowamu kaleka ndiri madoda gakuyi, kendileyiti kusyagula wantu wa ntambu iraaayi waweri watambika, watenderi pahala pampindi pa kutambikira. Muntu yoseri yakatenditi lihengu mweni, kamsyaguliti kuwera mtambika gwa pahala pampindi pa kutambikira. 34 Shitendu ashi shiweriti shidoda toziya shilujegiliti lukolu lwa Yerubowamu luturwi kutali na kwagamiziwa.