1 Mfalumi Ahabu kamtambiliti mdala gwakuyi Yezebeli, mirandu yoseri yakatenditi Eliya na ntambu yakawalagiti wambuyi wa mlungu Baali kwa ligumba. 2 Yezebeli katuma ulagilagi kwa Eliya kamgambiri. "Wamlungu wandagiri kutali, nikulapira, payiwera saa ayi shirawu hapeni nikutendi handa yumu gwa awa mbuyi wa mlungu." 3 Eliya katiriti nentu ndo mana katugira mjini Beeri Sheba kumkoa gwa Yuda, kwakamlekiti ntumintuni gwakuyi, 4 yomberi kagenda mwanja gwa lishaka lyoseri kwingira kushiwala. Su kasoka, kalivaga pasi pa mtera gumu, yagushemwa mletemu. Panu, kaluwa kahowi, pakalonga, "Intosiya! Weza ndiri kayi. Gwee Mtuwa Mlungu, vinu gulaviyi ukomu waneni. Neni nfaa ndiri kuliku wambuyi wangu."

5 Su, Eliya kagonja pasi pa mtera agu, kakolwa na mbota. Kamukamu, ntumintumi gwa kupindi, kamshinkula na kamgambira, "Gwimuki guliyi." 6 Eliya pakaloliti, kaliwona libumunda lyalibanikitwi pampindi pa makala, na supa ya mashi pakwegera na mtuwi gwakuyi. Su, kaliya na kulanda na kagonja kayi. 7 Ntumintumi gwa kumpindi kamwizira kayi mala ya pili, kamshinkula na kumgambira, "Gwimuki guliyi, hera hangu mwanja haguweri gukamala nentu kwa gwenga." 8 Eliya kimuka, kaliya na kulanda. Shakapanu kagendagenda kwa likakala lya shiboga ashi mwanja gwa mashaka alubayini, paliwala na pashiru, mpaka Horebu lugongu lwa Mlungu. 9 Aku, kasoka kulipanga, kagonja amu. Vumu shisoweru sha Mtuwa Mlungu shimwizira. "Eliya! Gwankutenda shishi panu?" 10 Na Yomberi kalonga, "Nweriti nankukutendera kwa ugangamala gwee Mtuwa Mlungu, Mlungu gwa Israeli, ila wantu wa Israeli wamega lipatanu lyaku, wavibomola vitalawanda vyaku na kuwalaga wambuyi waku kwa ligumba, ndo neni hera yansigaliti, na neni viraa wanwinda su wandagi!"

11 Mtuwa Mlungu kamgambira, "Gugendi gwakagoloki kulugongu, palongolu pangu neni Mtuwa Mlungu." Su, Mtuwa Mlungu kapita na kulivumisiya liyega likalipa lyeni libolomola migongu na kugapandanga matalawu. Kumbiti Mtuwa Mlungu kaweriti ndiri muliyega ali. Liyega lipita, kuweriti na lilendemeru lya litapaka. Kumbiti Mtuwa Mlungu kaweriti ndiri mulilendemeru lya litapaka. 12 Lilendemeru lipita, kuweriti na motu. Kumbiti Mtuwa Mlungu kaweriti ndiri mumotu agu. Pa kupita motu, lilawira liziwu lididini, lya mpolimpoli. 13 Su, Eliya pakapikaniriti liziwu ali, kaligibikiriti sheni kwa lihabiti lyakuyi, kawuka na kugoloka paligomi lya lipanga. Panu, kapikanira liziwu, "Eliya! Gwankutenda shishi panu?" 14 Yomberi kalonga, "Mona kutama na weya, gwee Mtuwa Mlungu, Mlungu gwa mashonta, kumbiti wantu wa Israeli wamega lipatanu lyaku, wavibomola vitawalanda vyaku na kuwalaga wambuyi waku kwa ligumba, ndo neni hera yansigaliti, naneni viraa wankunwinda wandagi!"

15 Mtuwa Mlungu kamgambira, "Guwuyi kwa kupitira njira ya kushiwala mpaka Damasiko. Pagusoka, gumswagi lipaki Hazaeli kaweri mfalumi gwa Aramu. 16 Na Yehu, mwana gwa Nimshi, gummiminili lipaki kaweri mfalumi gwa Israeli. Elisha, mwana gwa Shafati, gwa Abeli Mehola, hagummimini lipaki kaweri mbuyi gwa Mlungu pahala pagwenga. 17 Su, yoseri yakaponeka ligumba gwa Hazaeli, Yehu hakamlagi, na yoseri yakaponeka ligumba gwa Yehu, Elisha hakamlagi. 18 Kumbiti, wankali wakomu wantu elufu saba muisi ya Israeli, weni hawenimguwiri Baali, pota kushinonera shinyagu shakuyi."

19 Eliya kawuka, kamwona Elisha, mwana gwa Shafati, kankulima. Panu, paweriti na ng'ombi ishilini na msheshi yawalima waliwali na ng'ombi wawili wa Elisha waweriti wa kumbeli nentu. Su, Eliya kalivula lihabiti lyakuyi na kumgibikira. 20 Panu, Elisha kawaleka ng'ombi wakuyi, kamfata Eliya mbiru na kumgambira, "Gunjimili uti ng'endi kumpanana tati gwangu na mawu gwangu nonera ya kwaheree, shakapanu nikufati." Eliya kamwankula, "Gugendi! Nikubera ndiri" 21 Su, Elisha kamleka Eliya, kawawuziya ng'ombi wawili awa, kawalikitula na kuwatereka pakatendera mitera ya shimbingapinga handa mbawu, kawapanana wantu, waliya. Shakapanu kawuka, kamfata Eliya na kuwera ntumintumi gwakuyi.