1 Su Rehobowamu kagenda Shekemu, kweni Waisraeli woseri waweriti wajojonika su kumlumika kaweri mfalumi. 2 Na Yerobowamu mwana gwa Nebeti pakapatiti shisoweru kuusu shitendu ashi toziya kaweriti kankali Misri kweni kagenditi pakamtiriti Selemani, kawuyiti kulawa Misri. 3 Kumbiti Waisraeli watumiti ulagilagi na kumshema yerubowamu. Yomberi pamuhera na shipinga shoseri sha Israeli wamgenderiti Rehobowamu na wamgambira, 4 "Tati gwaku katupananiti lihengu likamala. Su gutupunguliri lihengu ali, na twenga hatukutenderi."

5 Na Rehoboamu kawagambira, "Mgendi, mwuyi kwaneni pa mashaka matatu." Su, wawuka. 6 Shakapanu mfalumi Rehobowamu kafiliti kuvimana ntambu yawalonga wazeyi yawaweriti watakuziya wa tati gwakuyi Selemani, pakaweriti kankali mkomu kawakosiya, "Hashi mntakuziya niwapanani lyakulu gaa wantu awa?" 7 Wazeyi awa wamwankula, "Leru paguwera ntumintumi gwa wantu awa, paguwatendera na kuyowera na womberi weri paguwankula, panu hawaweri wantumintumi wa gwenga mashaka goseri."

8 Kumbiti Rehoboamu kazalawiti litakulu lya wazewi, shakapanu katakulirana na wantemba wa ukulu wakuyi weni waweriti watakula wakuyi. 9 Su, kawakosiya, "Mwenga mlaviya utakula gaa su tuwezi kuwankula wantu awa yawang'ambira, niwapunguliri mahengu gakamala geni tati gwangu kawapananiti?" 10 Wantemba awa wamwankula, "Wantu awa yawakugambiriti tati gwaku kawapananiti lihengu likamala, wakuluwa guwapunguliri mahengu aga, gwenga guwagambiri hangu, shala sha neni shididini ndo shinenepa nentu kuliku shunu sha tati gwangu. 11 Kagatenditi makaliru genu gakamala na neni hanuwatendi makaliru genu gakamala, kumbiti lihengu lyangu nentu. Tati gwangu kawakomangiti kwa ndomondu, kumbiti neni haniwakomangi kwa ndomondu yana misontu."

12 Su, lishaka lya tatu Yerobowamu pamuhera na wantu woseri wawuya kwa Rehobowamu ntambu yakaweriti kawalagalira. 13 Mfalumi kawankula wantu awa kwa kukalipa, kalibeziyiti litakulu lyakapananitwi na wazewi. 14 Kafata litakulu lya wantemba wayaguyi, kawagambira, "Tati gwangu kagatenda makaliru genu gaweri makamala, na neni hanigatendi gaweri makamala nentu. Tati gwangu kawakomanga kwa ndomondu, kumbiti neni hanuwakomangi kwa ndomondu zyana misontu." 15 Hangu, mfalumi kawashera ndiri wantu toziya mlandu agu gutenditwi na Mtuwa Mlungu, su kutenda shisoweru shakuwi shakamgambiriti Yerobowamu mwana gwa Nebati, kwa njira ya Ahiya kulawa mji gwa Shilu.

16 Kumbiti wantu woseri wa Israeli pawawoniti handa mfalumi kawashera ndiri, wamgambiriti. "Twahara shoseri shilii na Dawudi! Twahera shoseli shili kulawa mwana gwa Yese. Muwuyi ukaya mwenga wantu wa Israeli! Guyiloleri numba yaku gamweni gwee Dawudi." Hangu wantu wa Israeli wawuya ukaya kwawu. 17 Wantu wa Israeli yawaweriti wankulikala mumiji ya Yuda, ndo awa hera wawasigaliti pasi pa ukolamlima wa Rehobowamu.

18 Mfalumi Rehobowamu pakamtumiti Adoramu, yakaweriti mgolokera mkulu gwa lihengu lya kukakaniziwa, wantu woseri wa Israeli wamguma mabuwi wamlaga. Na Rehobowamu kakweniti kalongola mumbutuka yakuwi ya kukwegwa na farasi, katugira Yerusalemu. 19 Hangu wantu wa Israeli waweriti walekana na numba ya lukolu lwa Dawudi mpaka leru.

20 Wantu woseri wa Israeli pawapatiti shisoweru handa Yerobowamu kaweriti kawuya kulawa Misri, wamshemiti mukuliwona paweru, wamtenda kaweri mfalumi gwa Israeli yoseri. Kwahera likabira limonga lyaliweriti pamuhera na lukolu lwa Dawudi ira hera likabira lya Yuda.

21 Rehobowamu pakasokiti Yerusalemu, kawajojonira wamashota wagangamala laki yimu na elufu semanini wa makabira ga Yuda na ga Benjamini, kapati kulikomanga na ukolamlima wa Israeli, su kawuziyi ukolamlima kwakuyi Rehobowamu, mwana gwa Selemani. 22 Kumbiti ulagilagi wa Mlungu umwiziriti Shemaya, muntu gwa Mlungu. 23 "Gumgambiri Rehobowamu mwana gwa Selemani, mfalumi gwa Yuda, na wantu woseri wa likabira lya Yuda na Benjamini na wantu wamonga. 24 Neni Mtuwa Mlungu nonga hangu, namgenda, kulikomanga na walongu wenu wantu wa Israeli. Mwuyi kila muntu ukaya kwakuyi, toziya aga yagalawiliti ndo mpangu gwaneni." Su wafati ulagilagi awu wa Mtuwa Mlungu wawuya ukaya handa Mlungu ntambu yakawalagaliriti.

25 Shakapanu mfalumi Yerobowamu kagunyawa syayi mji gwa Shekemu kulugongu lwa Efraimu, kalikala aku. Shakapanu kagenda kunyawa mji gwa Penueli. 26 Yerobowamu ndo kanja kuliholahola, "Vinu ufalumi hauwuyi kwa kaya ya mfalumi Dawudi. 27 Handa wantu awa pawendereya kugenda kutambika munumba ya Mtuwa Mlungu aku Yerusalemu. Miyoyu yawu hayimgalambukiri mtuwa gwawu Rehobowamu mfalumi gwa Yuda, na womberi hawantagi neni na kumwuyira mfalumi Rehobowamu."

28 Su, pa kuligambiziyana na wamonga, kanyawa vinyagu vya wana wa ng'ombi viwili vya zahabu. Shakapanu kawagambira wantu, "Mweliti mwankugenda Yerusalemu kumguwila kwa shaka shitali. Awa ndo wamlungu wenu yawawalaviyiti muisi ya misri." 29 Kashituliti shinyagu shimu sha mwana gwa ng'ombi gwa zahabu mjini Beteli, na sha pili mjini Dani. 30 Mlandu agu guwera vidoda, toziya wantu wagenditi kuvitambikira vinyagu avi na wagenditi kutali nentu aku Dani. 31 Viraa virii Yerobowamu kanyawiti pahala pampindi pa kutambikira, kawasyagula watambika, wantu yawawera ndiri wa lukolu lwa Lawi. 32 Yerubowamu, viraa kalagalira lishaka lya lilongu na mhanu lya mwezi gwa nani, guweri msambu teratera na msambu gulii yaguweriti aku Yuda. Kushitalawanda shashinyawitwi aku Beteli kulongolu kwa vinyagu vya mwana gwa ng'ombi vyakanyawiti, katula watambika walii yawasyagulitwi watenderi kila pahala pa kulavilira tambiku pawanyawiti pahala pampindi. 33 Lishaka ali lya lilongu na mhanu lya mwezi gwa nani, kalituliti mweni, na yomberi kagenda Beteli kutambikira. Ntambu yakalagaliriti msambu agu yakagutuliti toziya ya wantu wa Israeli, na mweni kakwena kushigendera shitalawanda, kutumiziya ubani.