1 Mfalumi Selemani kafiliti wadala wavuwa washiyenga. Mhinga gwa Falawu, wadala wa Mowabu na Amoni na Edomu na Sidoni na Wahiti, 2 Wadala wa maisi geni Mtuwa Mlungu kaweriti kawabera Waisraeli pakalonga, "Namyuga kwawomberi pota womberi nawayuga kwamwenga toziya wadala awa hawapotoziyi miyoyu yamwenga su muwatenderi wamlungu wawu." Selemani kawera nawa kwa kawafiriti wadala awa. 3 Selemani kaweriti na wadala miya saba, woseri wahinga wa shifalumi na wabimdogu miya tatu. Wadala awa wamgalambula moyu, 4 Toziya pakaweriti mzewi, wadala wakuyi wamgalambula moyu ata kawatendera wamlungu wamonga, kuwera ndiri mwaminika nakamu kwa Mtuwa Mlungu, Mlungu gwakuyi handa Dawudi ntambu yakaweriti mwaminika. 5 Selemani kamgendiriti Ashataroti yakaweriti mlungu mdala yakaweriti gwa Wasidoni na kamfatiti Moleki mlungu likaliziwu lwa Waamoni. 6 Hangu Selemani katenditi makontola kulongolu kwa Mtuwa Mlungu, kamfata ndiri Mtuwa Mlungu kwa waminika handa tati gwakuyi Dawudi ntambu yakatenditi. 7 Kulugongu yaluwera kwagulawa mshenji mwa Yerusalemu, Selemani kamnyawiliti pahala pa kumtambikira Kemoshi, mlungu yakakalaziya gwa Wamowabu, na pahala pa kumtambikira moreki mkalaziya gwa Mlungu, mlungu gwa Waamoni. 8 Ntambu iraayi kawanyawiriti wadala wakuyi woseri wa shihenga pahali pa kutumiziya ubani na kuwatambikira wamlungu wawu.

9 Su, Mtuwa Mlungu, Mlungu gwa Israeli, kamkalaliriti Selemani, toziya kaweriti kamleka Mtuwa Mlungu, Mlungu gwa Israeli, tembera yomberi kaweriti kamlawira mala mbili, 10 kumgambira nakawaguwira wamlungu wa shihenga, Selemani kajimiriti ndiri shakalagaliritwi na Mtuwa Mlungu. 11 Hangu Mtuwa Mlungu kamgambira Selemani, "Toziya gwamuwa kutenda hangu, gulimega lipatanu lyangu na gwenga na kulema amuli zyangu zyanakupananiti, nakaka hanikupoki ukolamlima awu na kumpanana ntumintumi gwaku. 12 Ata hangu toziya ya tati gwaku Dawudi, hapeni ndendi hangu mumakaliru gaku, su haniupapuli ukolamlima awu mmawoku mwa mwana gwaku. 13 Ata yomberi hapeni nimpoki ukolamlima woseri, su hanimlekeri mwana gwaku likabira limu, toziya ya ntumintumi gwaku Dawudi, na toziya ya mji gwa Yerusalemu gweni nigusyagula guweri gwaneni."

14 Su, Mtuwa Mlungu kamtenda Hadadi yakaweriti gwa lukolu lwa mfalumi gwa Edomu, kaweri mnkondu gwa Selemani.

15 Shaka Dawudi pakawagamiziyiti Waedomu, Yoabu mkulu gwa shonta lya Dawudi, kagenditi aku kuwafintira yawalangitwi. Yoabu kawalagiti wapalu woseri wa Edomu. 16 Yoabu kalikariti aku na wamashonta wakuyi kwa shaka sha miyezi sita, kaweriti kawagamiziya nakamu wapalu woseri wa Edomu. 17 Kumbiti Hadadi shaka ashi kaweriti mntemba katolikiriti Misri pamuhera na Waedomu wamu, wantumintumi wa tati wakuyi. 18 Hadadi na wayaguwi wagenditi mwanja kulawa Midiyani, wawatoriti wantu wamonga aku Parani, wagenda nawu mpaka Misri, kwa Falawu mfalumi gwa isi ayi. Falawu kampanana Hadadi litapaka na numba, kawalagalira wantumintumi wakuyi waweri wampanani shiboga. 19 Falawu kafiriziyitwi nentu na Hadadi. Hangu Falawu kamjimira shemeji gwakuyi, mpusu gwa malikiya Tepenesi, kayugwi na Hadadi. 20 Dada ayu gwa Tapenesi kamlelera Hadadi mwana yakashemitwi Genubati. Genubati kaleliritwi na Tapenese munumba ya Falawu, pamuhera na wana wa mfalumi.

21 Kumbiti Hadadi pakapikaniriti aku Misri handa Dawudi na Yoabu mkulu gwa mashonta, waweriti wahowa, kamgambiriti Falawu, "Gunjimiri mbuyi muisini yangu."

22 Kumbiti Falawu kamkosiya, "Nikunyima shishi ata gwamuyi vinu kuwuya muisini yaku?" Na Hadadi kalonga, "Gundeki mbuyi ukaya."

23 Viraa virii, Mlungu kamtenda Rezoni mwana gwa Eliyada, kaweri mnkondu gwa Selemani. Rezoni kaweriti kamtoloka mtuwa gwakuyi, mfalumi Hadadezeri gwa Soba. 24 Pa Dawudi kutenda malaga aku Soba, Rezoni kajojoniriti wantu na kushinyawa shipinga sha kumgalambuka mfalumi, na yomberi kaweri mlonguziya gwawu. Su, wagenda Damasiko, walikala aku na kumtenda Rezoni mfalumi gwa Damasiko. 25 Rezoni kaweriti mnkondu gwa Waisraeli shaka shoseri sha ukolamlima wa Selemani, kamgaziya nentu Selemani handa na yomberi Hadadi ntambu yakamgaziyiti. Su, Rezoni kayibeziti Israeli, na yomberi kakolitimlima isi ya Aramu.

26 Yoribowamu mwana gwa Nebati, Mwefraimu gwa Sereda, ntumintumii gwa Selemani, mawu gwakuwi kaweliti mkenja, yawamshemiti Zeruya, viraa kamgalambukiti mfalumi Dawudi. 27 Toziya ya ugalambuka ndo awu. Selemani pakaweriti kankutendelera na kunyawa seemu ya Milu na kubambandira shibambaza sha mji gwa tati gwakuyi Dawudi, 28 Yorobowamu kawonikaniti mndemba mgangamala na shikambaku. Ndo Selemani pakawoniti handa mndemba ayu kaweriti muntu gwa mahengu, kamtula kaweri mgolokera gwa lihengu lya wantu wa makabila ga manasi na Efurayimu. 29 Lishaka limu, Yerobowamu pakaweriti pakagenda mwanja kulawa Yerusalemu, mbuyi gwa Mlungu Ahiya gwa Shiru kaliwoniti na yomberi mnjira. Ahiya kaweriti kavala lihabiti ya syayi. Woseri wawili waweriti gweka yawu mmalambu. 30 Katepu Ahiya, kalivula lihabiti lyakuyi ya syayi, kalidenganga vipandi lilongu na mbili. 31 Shakapanu kamgambira Yerobowamu, "Guvitoli vipandi lilongu toziya Mtuwa Mlungu, Mlungu gwa Israeli, kalonga hangu, 'Guloli, pakwegera haniupapulangi ufalumi na kuwusiya mumawoku mwa Selemani, naneni hanikupanani gwenga makabila lilongu. 32 Kumbiti yomberi hanimlekeri likabira limu toziya ya ntumintumii gwangu Dawudi, toziya ya mji gwa Yerusalemu gweni nigusyagula kulawa mumakabira goseri ga Israeli. 33 Handendi hangu toziya Selemani kandeka, kaguwira wamlungu wamonga wa shihenga, Ashataroti mlungu mdala gwa Wasidoni, Kemosi mlungu gwa Wamowabu na Milikomu mlungu gwa Waamoni. Selemani kang'alambuka, katenda makontola palongolu paneni, na pota kujimira malagalira gangu handa Dawudi tati gwakuyi ntambu yakatenditi. 34 Ata hangu, hapeni nimupoki ukolamlima woseri, ila hanimtendi kuwera mkolamlima toziya tati gwakuyi Dawudi kafatiti lagalira lyaneni na mlonguziwu gwaneni. 35 Kumbiti hanimpoki mwana gwakuyi ufalumi awu, naneni hanikupanani gwenga Yerobowamu makabira lilongu. 36 Ayu mwana gwakuyi Selemani hanimlekeri likabira limu, su shaka shoseri mwiwuka gwa ntumintumii gwangu Dawudi kaweri kankukolamlima Yerusalemu, kaweri lumulika lyalumulika palongolu paneni mumji gweni nigusyagula guweri pahali pa kung'uwira. 37 Su, gwenga Yoroboamu, hanikutendi guweri mfalumi gwa Israeli, na gwenga hagukolimlima ntambu yagufira. 38 Na handa pagutenda goseri hanikugambiri, handa hagulikali kulinganira na mafiliru ganeni, handa pagutenda maheri palongolu paneni kwa kukola malonguziya ganeni na malagalira gangu, handa ntumintumi gwaneni Dawudi ntambu yakatenditi, neni haweri pamuhera na gwenga mashaka goseri. Na hanikupanani isi ya Israeli na kuutenda ukolamlima waku uweri ugangamala ntambu yanimtendiriti Dawudi. 39 Toziya ya aga, haniwakomangi wiwuka wa Dawudi, kumbiti shaka shoseri ndiri."

40 Hangu Selemani kajeriti kumlaga Yorobowamu, kumbiti Yerobowamu katugira Misri kwa Shishaki mfalumi gwa Misri, kalikala aku mpaka Selemani pakahowiti.

41 Mirandu imonga ya Selemani, goseri kagatenditi na luhala lyakuyi, galembwa Mushitabu sha matendu ga Selemani. 42 Kwa shaka sha vinja alubayini, Selemani kakolitimlima isi yoseri ya Israeli, aku liboma lyakuyi liweriti Yerusalemu. 43 Upeleru Selemani kahowiti, kafindirwa kumji gwa Dawudi. Rehobowamu mwana gwakuyi Selemani, kakolamlima pahala pakuyi.