1 Shisoweru sha Mtuwa Mlungu shimwizira Yehu mwana gwa Hanani, kuusu Baasha, 2 "Gwenga Baasha, neni nikunyasuliti kulawa kumadikudiku, nikutenda mlonguziya gwa wantu waneni wa Israeli. Gwenga gufata matendu ga Yerubowamu, guwatenda wantu waneni Israeli watendi vidoda na kungalaziya kwa vidoda vyawu. 3 Aya! Vinu, hanikuwusiliri kutali gwenga na kaya yaku, haniwatenderi kaya yaku ntambu yanuwatendiriti kaya ya Yerubowamu mwana gwa Nebati. 4 Yoseri gwa kaya yaku yakahowera kumjini, wang'ang'a hawamliyi, na yoseri yakahowera mlilambu wambongu wa kundundu hawamliyi."

5 Matendu gamonga ga Baasha na ugangamala wakuyi, goseri galembitwi Mushitabu sha Mirandu ya shaka ya Wafalumi wa Israeli. 6 Upeleru, Baasha kahowiti, kafindilwa aku Tiriza, mwana gwakuyi Ela kakolamlima pahala pakuyi.

7 Kayi shisoweru sha Mtuwa Mlungu kwa Baasha na kaya yakuyi, shimwiziriti Yehu mwana gwakuyi Hanani toziya ya makontola kagatenditi palongolu pa Mtuwa Mlungu. Baasha kamkalaziya Mtuwa Mlungu kwa matendu gakuyi, kafata matendu ga Yerobowamu na kayi wakuyi na kuijegera kaya wakuyi maagamiziya.

8 Mushinja sha ishilini na sita sha ukolamlima wa Asa mfalumi gwa Yuda, Ela mwana gwa Baasha, kanjiti kukolamlima aku Israeli kulawa Tiriza. Kakolitimlima kwa shaka sha vinja viwili. 9 Ntumintumi gwakuyi Zimri kagolokeriti nusu ya shipinga sha mbutuka zyakuwi za kukwegwa, katenditi upyota kuusu yomberi. Lishaka limu, mfalumi Ela pakaweriti aku Tiriza ukaya kwa Arisa yakaweriti mgolokera gwa liboma, kalanditi na kalowera. 10 Zimri kingira mngati, kamlaga shakapanu kakolamlima pahala pakuyi. Ashi shiweriti shinja sha ishilini na saba sha ukolamlima wa Asa mfalumi gwa Yuda.

11 Katepu hera pakanjiti kukolamlima, Zimri kawalagiti wantu woseri wa kaya ya Baasha, kamlekera ndiri ata mpalu yumu wa kaya wakuyi pota waganja wakuyi. 12 Iweriti ntambu yakalongiti Mtuwa Mlungu kuusu Baasha, kwa njira ya mbuyi gwa Mlungu Yehu. 13 Vitwatira avi vitendikiti toziya ya vidoda vyakatenditi Baasha na mwana gwakuwi Ela. Wamkalaziyiti Mtuwa Mlungu, Mlungu gwa Israeli, kwa kutenda vidoda na kuwatenda wantu wa Israeli watendi vidoda kwa kuguwira vinyagu vya wamlungu yawu. 14 Matendu gamonga ga Ela, goseri galembitwi Mushitabu sha Mirandu ya shaka ya Wafalumi wa Israeli.

15 Zimri kakolitimlima aku Israeli kulawa Tiriza kwa shaka sha mashaka saba. Ashi shiweriti shinja sha ishlini na saba sha ukolamlima wa Asa mfalumi gwa Yuda. Su, wantu wa Israeli waweriti watula ng'onjeru kuzyengeta mji gwa Gibetoni gwa Wafilisiti, 16 na mashonta ga wantu wa Israeli pawapikaniriti handa Zimri kaweriti katenda upyota, kamlaga mfalumi, woseri wamtenda Omri mkulu gwa shonta lawu, kuweri mfalumi gwa Israeli lishaka liraalilii. 17 Omri na mashonta gakuyi wawuka Gibetoni, wagenda na kuguzyengeta mji gwa Tiriza. 18 Shaka Zimri pakawoniti handa mji guzyengetwa, kingiriti kuliboma, mngati mwa liboma, kayilunguziya motu, na yomberi kahowera amu. 19 Shitwatira ashi shitendikiti toziya ya vidoda vyakatenditi, katenditi makontola palongolu pa Mtuwa Mlungu, kamfata matendu ga Yerubowamu na kuwatenda wantu wa Israeli watendi vidoda. 20 Matendu gamonga ga Zimri na upyota wakatenditi, goseri galembwa Mushitabu sha Mirandu ya shaka sha Wafalumi wa Israeli

21 Wantu wa Israeli, vinu, wabagulangiti vipinga viwili. Shimu shimmaniti Tibini mwana gwa Ginati kaweri mfalumi, na shipinga sha pili shimmaniti Omri. 22 Muupeleru, wantu wa shipinga shashimmaniti Omri, wawaziditi makakala walii yawammaniti Tibini mwana gwakuyi Ginati, Tibini kahowa na Omri kawera mfalumi. 23 Omri kanjiti kukolamlima mshinja sha selasini na yimu sha ukolamlima wa Asa mfalumi gwa Yuda. Kakolitimlima kwa shaka sha vinja lilongu na mbili, vinja sita kaweriti kankukolamlima kulawa mji gwa Tiriza, 24 Kahemiriti lugongu lwa Samariya kwa vipandi elufi sita vya feza kulawa kwa muntu yumu yawamshema Shemeri, kanyawa liboma pampindi pakuyi, na mji. Mji gweni kagushema Samariya, kwa ligoya lya Shemeri yakalukoliti lugongu alu panu kwanja.

25 Omri katenditi madoda kulongolu kwa Mtuwa Mlungu, katenditi makontola nentu ya walii woseri yawamlongoliriti. 26 Toziya kafatiti matendu ga Yorebowamu mwana gwa Nebati, kamkalaziya Mtuwa Mlungu, Mlungu gwa Israeli, kwa kuwatenda wantu wa Israeli watendi vidoda kwa kuguwira shinyagu sha wamlungu. 27 Matendu gamonga ga Omri na ugangamala wakuyi, goseri galembitwi Mushitabu sha Mirandu ya Shaka ya Wafalumi wa Israeli. 28 Upeleru, Omri kahowiti, kafindirwa aku Samaria, mwana gwakuyi Ahabu kakolamlima pahala pakuyi.

29 Mushinja sha selasini na nani sha ukolamlima wa Asa mfalumi gwa Yuda, Ahabu mwana gwa Omri, kanjiti kukolamlima Israeli. Kakolitimlima aku Samariya kwa shaka sha vinja ishilini na mbili. 30 Ahabu katenditi makontola palongolu pa Mtuwa Mlungu kuliku wafalumi woseri yawamlongoliriti. 31 Viraa kafata magenderanu mdoda gwa Yerubowamu mwana gwa Nebati, Ahabu kamyugiti Yezeberi mhinga gwa Etibaali, mfalumi gwa Wasidoni, kamtendera na kumguwira Baali.

32 Kamnyawiliti Baali numba ya kuguwira aku Samaria, na mngati mwakuyi kanyawa shitalawanda sha kumguwira. 33 Ntambu iraayi, kanyawiti shinyagu sha Ashera mlungu gwa shidala. Ahabu katenditi makontola gavuwa, kamkalaziya Mtuwa Mlungu, Mlungu gwa Israeli nentu ya wafalumi woseri wa Israeli yawamlongoliriti. 34 Shaka sha ukolamlima wakuyi, Hieli kulawa Beteli, kagunyawiti syayi mji gwa Yeriku. Na teratera na shisoweru sha Mtuwa Mlungu shakalongiti kwa njira ya Yoshuwa mwana gwa Nuni, Hieli kasowilitwi na wiwuka wakuyi wa kwanja Abiramu, shaka sha kuyitula miyanjiru ya Yeriku, kasowiritwi viraa na mwana gwakuyi mdidika Segubu, shaka sha kuyitula migomi yakuyi.