1 Selemani kanjiti kunyawa numba ya Mtuwa Mlungu mushinja sha mia msheshi na semanini pa Waisraeli kulawa Misri, ashi shiweriti shinja sha msheshi sha ukolamlima wa Selemani muisi ya Israeli, mumwezi gwa Zifu. Ndo mwezi gwa pili 2 Numba ayi mfalumi Selemani kamnyawiliti Mtuwa Mlungu iweriti na utali wa mita ishilini na saba na upana wa mita tisa na utali mita lilongu na tatu na sentimita mhanu. 3 Pakwingilira panumba paweriti na upana wa mita msheshi na nusu kulawa uwega wumu wa numba na uwega umonga. Na utali wakuyi kulongolu kwa numba ayi uweliti mita tisa. 4 Katuliriti numba ayi madilisha makulu kwa mngati na madidini kwa kunja. 5 Viraa kanyawiti mbanda kuzyengeta, su kugangamaziya shibambaza sha kunja, kanyawa vyumba vya mubwega kila uwega. 6 Vyumba vya pasi, muvyumba avi vya kongera, viweriti na upana wa mita mbili na sentimita mbili ya golofa yayifatiti iweriti na upana wa mita mbili sentimita sabini, na golofa ya pambindi nentu iweriti na upana wa mita ndatu. Golofa azi ziweriti zilinganira ndiri kwa upana toziya Selemani kaweriti kapungula shibambaza sha kunja kuzyengeta numba su boliti za kugangamaziya shibambaza nashikolelerana na shibambasa.

7 Shaka Numba payiweriti yankunyawiwa papikilirika ndiri ngati mwa numba mliru gwa nyundu, pota shombu shoseri sha shuma toziya inyawitwi kwa mabuwi yagaweriti gasongolwa na kutandwa nakamu aku kwawagatoliti.

8 Ligomi lya kwingilira seemu ya pasi ya jengu yaliyongilitwi pambwega pa Numba nkulu ya Mlungu, liweriti uwega wa kusika. Mngati muweriti na likweneru lyeni wantu waweziti kukwena su kugenda kugolofa ya pakati na ya upeleru. 9 Su Mfalumi Selemani kamaliriti kunyawa Numba. Litala lya numba kaweriti kanyawa kwa boliti na mbawu za miyerezi. 10 Kuyizyengeta shibambasa sha kunja sha numba ayi, kanyawiti vyumba vya golofa vyaviweriti na utali kugenda pampindi wa mita mbili sentimiti ishilini na mhanu, na vyeni viweriti vikolaniziwitwi na numba kwa boliti za miyerezi. 11 Shaka ashi ulagilagi awu wa Mtuwa Mlungu umwiziliti Selemani, 12 "Kwa shisoweru sha numba ayi, handa pagufata mlonguziya gwangu gujimira malagalira gangu na amuli za neni hanikutenderi mirandu yoseri yanimgambiliti tati gwaku Dawudi. 13 Hanilikali muwamu mwa wiwuka wa Israeli, na hapeni ndeki nakamu."

14 Su, Selemani kayinyawa Numba nkulu ya Mlungu na kuyimalira.

15 Uwega wa mngati wa numba kawugibikira kwa mbawu za miyelezi kulawa kusakafu mpaka kuboliti za litala, na sakafu kayiyalikira mbawu za miberoshi. 16 Shumba sha mngati, shishemitwi pahala Pananagala nentu shibagulitwi munumba nkulu ya Mlungu. Shiweriti shinyawa kwa mbawu za miyerezi kulawa kusakafu mpaka kulitala na utali wakuyi uweliti mita tisa. 17 Shumba shilii shiweliti palongolu pa pahala Pananangala nentu, shiweliti na utali wa mita lilongu na nane. 18 Mbawu za miyerezi zyaziyalikitwi mushibambaza sha numba mungati ziweliti zipambwa kwa mishoru ya mibuyu na mauwa gabuma. Kila pahala paweriti igubikwa kwa mbawu za miyerezi, ata kwahera libuwi lyaliwonikaniti. 19 Museemu ya mngati nentu ya numba nkulu ya Mlungu ayi, Selemani katuliti shumba sha gweka Lisanduku lya Lipatanu lya Mlungu litulitwi. 20 Shumba ashi shiweriti na utali wa mita tisa, na upana mita tisa, na utali kugenda pampindi mita tisa, sheni shigibikwa kwa zahabu iyerepa. Kanyawiti shitalawanda sha mbawu za miyerezi. 21 Selemani kagibikira kwa zahabu ihelepa seemu ya ngati ya numba, na kulongolu mwa shumba ashi sha mngati katuliti minyololu ya zahabu kulawa uwega wumu mpaka uwega wa pili, kayigibikira kwa zahabu 22 Numba nkulu ya Mlungu yoseri kayigibikiliti kwa zahabu, viraa shitalawanda sha pahala Pananagala nentu shigibikitwi viraa kwa zahabu.

23 Kanyawiti kwa mbawu za mizyeyituni viwumbi wawili vyana mbapatiru, kila shiwumbi shiweriti na utali kugenda pampindi mita mbili na lobu, kavitula pananagala nentu. 24 Kila lupapatiru luweriti na utali wa mita mbili na lobu, hangu utali kulawa upeleru wa lupapatiru lumonga uweriti mita msheshi na nusu. 25 Shiwumbi yumonga kaweliti na utali wa mita msheshi na nusu, viwumbi vyoseli viwili viweliti na vipimu viraavirii na walifana. 26 Utali wa Shiwumbi yumu kaweliti na mita msheshi na nusu, viraa utali wa shiwumbi shimonga uweriti ulaaulii. 27 Viwumbi avi viweriti teratera, viwera na mbapatiru za kukusumulwa. Lupapatiru lumu lushinkula shibambaza shimu na lupapatiru lumonga lushinkula shibambaza sha pili, zimonga zilii zishinkuliti pakati pahala pa shumba Shinanagala Nentu. 28 Na viwumbi avi kavigibikiliti kwa zahabu. 29 Shibambaza sha kila shumba kashiherepeziya kwa mishoru ya viwumbi vyana mbapatiru, mitera ya mitendi na mishoru ya uluwa yawubumiti. 30 Kavigibikira zahabu musakafu ya vyumba vya mngati na vya kunja. 31 Kwa kwingira shumba sha mngati nakamu Pananagala nentu kanyawiti migomi kwa mbawu za mizeyituni. Vizingiti na miimu ya migomi kavitenditi viweri vya pembi mhanu. 32 Mumigomi ayi miwiri ya mizyetuni, kasongola viwumbi vyana mbapatiru, mitera ya mitendi na uluwa yawubumiti, kayigubikiliti mishoru ayi kwa zahabu. 33 Ntambu iraayi, kanyawiti ligomi ya mlaba gwa kwingilira pamdamu. Miimu ya ligomi ali iweriti ya mizyetuni, 34 na mbapatiru zakuyi mbili ziweriti za miberoshi, kila libakubaku liweziti kukusumulwa na kukusa pakati. 35 Pampindi pa ligomi kagibikira viwumbi wana mbapatiru, mitera ya mitendi na uluwa yawubumiti, kayiheripiziya weri mishoru ayi kwa zahabu. 36 Seemu ya mngati ya ligeleri inyawitwi kulongolu kwa numba nkulu ya Mlungu, izyengitiziwa shibambaza sheni sha kwanja sha kozi za mbawu za kila leya ya mabuwi. 37 Lyanjiru lya numba ya Mtuwa Mlungu linyawitwi mumwezi gwa Zifa. Mushinja sha msheshi wakukolamlima wa Selemani. 38 Mumwezi gwa Buli, ndo mwezi gwa nane, mushinja sha lilongu na yimu unyawa wa numba umalilikiti na lihengu liweriti limalilika ntambu yayitulitwi. Unyawa awu Selemani kawutenditi kwa mivinja saba.