1 Abiya kanjiti kukolamlima aku Yuda shinja sha lilongu na nane wa ukolamlima wa mfalumi Yerobowamu, mwana gwakuyi Nebari, 2 kakolitimlima kwa vinja vitatu pakawera Yerusalemu. Mawu gwakuyi kaweriti Maaka mhinga gwa Abisalomu, 3 Abiya katenditi vidoda viraa virii vyakatenditi tati gwakuwi, pota kuwera na moyu mwaminika kwa Mtuwa Mlungu, Mlungu gwakuyi, ntambu yakaweriti tati gwakuyi Dawudi. 4 Kumbiti ata hangu, toziya ya Dawudi, Mlungu kamupananiti mwana hakakolamlima pa yomberi, kaweri limuliku lya kulangalira Yerusalemu na kuugangamaziya mji gwa Yerusalemu. 5 Mlungu katenda hangu toziya Dawudi katenditi maheri palongolu pakuyi na kamfata ntambu yakamlagaliriti Mtuwa Mlungu mashaka gakuyi goseri, ilahera lilii likosa lya Uria muntu kulawa Hiti. 6 Kuweriti nkondu pakati pa Rehobowamu na Yerobowamu yendereyiti shaka shoseri sha ukomu wa Abiya. 7 Na matendu gamonga ga Abiya na goseri kagatenditi galembitwi mushitabu sha Mirandu ya shaka sha wafalumi wa Yuda. Abiya na Yerobowamu walikaliti kwa ntambu ya nkondu. 8 Abiya kahowiti na kufindilwa mumji gwa Dawudi na mwana gwakuyi Asa kakolamlima pahala pakuyi.

9 Mushinja sha ishilini sha ukolamlima wa Yerobowamu, mfalumi gwa Israeli, Asa kanjiti kukolamlima aku Yuda, 10 na kakolitimlima kwa shaka sha vinja alubayini na yimu. Mawu gwakuyi kaweriti Maaka, mhinga gwa Abisalomu. 11 Mfalumi Asa katenditi yagaweriti maheri palongolu pa Mlungu ntambu yakatenditi Dawudi mbuyi gwakuyi. 12 Kawawingiti walii yawatenditi uhumba pahala pa kuguwira, kaviwusiyiti vinyagu vyoseri vyeni wambuyi wakuyi waweriti wavinyawa. 13 Kamwusiyiti bibi gwakuwi Maaka, ukulu wakuyi wa mawu malikiya, toziya kanyawiti shinyagu sha Ashera, mlungu gwa shidala, na shinyagu ashi kashimegangameganga na kushilunguziya kululalanda lwa Kidironi. 14 Kumbiti pahala pampindi pa kutambikira pahalibisiwa ndiri, ata hangu, yomberi kaweriti na moyu mwaminika kwa Mtuwa Mlungu makaliru gakuyi goseri. 15 Kawuziyiti Munumba nkulu ya Mtuwa Mlungu, vintu vyoseri vyaviweriti vilumikwa na tati gwakuyi, pamuhera na virii vyakuyi mweni. Vintu vya madini ga feza, na vya zahabu na vintu vimonga

16 Mfalumi Asa gwa Yuda na mfalumi Baasha gwa Israeli, waweriti na nkondu pakati pawu shaka shoseri pawaweriti wankukolamlima. 17 Baasha mfalumi gwa Israeli, kayikomangiti isi ya Yuda na kwanja kunyawa Rama su kubera muntu yoseri nakalawa pota kwingira kwa Asa, mfalmi gwa Yuda. 18 Mfalumi Asa ndo katola madini ga feza na zahabu yoseri yayisigaliti muluhanja lwa Mtuwa Mlungu na muluhanja lya liboma kawapanana wantumintumi wakuyi, kawatuma Damasko kwa Beni Hadadi mwana gwa Tabirimoni, mzukulu gwa Hezioni, mfalumi gwa Aramu, pakalonga, 19 "Tutendi mapatanu ga kuwera pamuhera pakati paneni na gwenga ntambu yawatenditi tati gwangu na tati gwaku, guloli, nikujegera lifupu lya mpiya na zahabu, gugendi gwakawusiyi magambiziyanu ga kuwera pamuhera pakati paku na mfalumi Baasha gwa Israeli, su kaleki mankomangu neni." 20 Panu mfalumi Beni Hadadi kamjimira shakamgambiriti mfalumi Asa, kawatuma wakulu wa shonta lyakuyi kugenda kuyikomanga miji ya Israeli. Na womberi wayitola Iyoni, na Dani na Abelibetimaaka na Kineroti yoseri, na isi yoseri ya Nafutali. 21 Mfalumi Baasha pakapatiti shisoweru sha makomangu aga kaleka kugunyawa mji gwa Rama kakuwuya kumji gwa Tiriza. 22 Mfalumi Asa ndo pakabweriti kwa wantu woseri wa Yuda, bila kumleka ata muntu yumu, wahamiziyi mabuwi ga Rama na mbawu, vintu vyeni Baasha kavitenderiti kunyawira. Shakapanu mfalumi Asa katenderiti vintu havi kunyawira mji gwa Geba mu Benjamini na Mizipa.

23 Matendu gamonga goseri ga Asa, ugangamala wakuyi na miji yoseri yakanyawiti, goseri yagalembitwi Mushitabu sha Mirandu ya shaka sha wafalumi wa Yuda. Kumbiti shaka sha uzewi wakuyi, Asa kakolitwi na ulweri wa magulu. 24 Shakapanu, Asa kahowiti, kafindirwa mumasembi ga shifalumi, Mumji gwa Dawudi na yomberi mwana gwakuyi Yehoshafati, kakolamlima pahala pakuyi.

25 Mushinja sha pili sha ukolamlima wa Asa aku Yuda, Nadabu mwana gwa Yorobowamu, kanjiti kukolamlima aku Israeli. Kakolitimlima kwa shaka sha vinja viwili. 26 Nadabu katenditi makontola kulongolu kwa Mtuwa Mlungu, kafata njira za tati gwakuyi mweni kawatenditi wantu wa Israeli watendi vidoda

27 Baasha mwana gwa Ahiya, gwa likabira lya Isakari, katendera upyota Nadabu. Su, shaka Nadabu na shonta lyakuyi pawaweriti waguzyengeta mji gwa Gibetoni gwa Wafilisiti, Baasha kamkangala na kumlaga. 28 Kakolamlima pahala pakuyi, ashi shiweriti shinja sha tatu sha ukolamlima wa mfalumi Asa gwa Yuda. 29 Katepu hera pakanjiti kukolamlima, Baasha kawalaga wantu woseri wa kaya ya Yerubowamu, kawalekiti ndiri wakomu muntu yoseri gwa Yerubowamu, hangu iweriti ilinganira na galii kagalongiti Mtuwa Mlungu kwanjira ya ntumintumi gwakuyi, Ahiya gwa Shilu. 30 Mirandu ayi itendikiti toziya Yerobowamu kamkalaziyiti Mtuwa Mlungu, Mlungu gwa Israeli, kwa vidoda vyakuwi na kuwatenda wantu wa Israeli watendi vidoda.

31 Matendu gamonga ga Nadabu, goseri galembitwi Mushitabu sha mirandu ya shaka sha Wafalumi wa Israeli. 32 Mfalumi Asa gwa Yuda na mfalumi Baasha gwa Israeli waweriti na nkondu pakati pawu shaka shoseri pawaweriti wankukolamlima.

33 Mushinja sha tatu sha ukolamlima wa Asa mfalumi gwa Yuda, Baasha mwana gwa Ahiya, kanjiti kukolamlima Israeli kulawa Tiriza. Kakolitimlima kwa shaka sha vinja ishilini na msheshi. 34 Baasha katenditi makontola kulongolu kwa Mtuwa Mlungu, kafata njiira ya Yerobowamu na kutenda vidoda viraa virii vyeni kawatenditi wantu wa Israeli wavitendi.