1 Dawudi pakaweriti pakwegera kuhowa, kamshemiti mwana gwakuwi Selemani, kampanana lagalira pakalonga, 2 "Mwana gwangu, ntambu yayiwera kwa viwumbi vyoseri kuhowa, mashaka gangu gapera. Guweri shikambaku na mgangamala. 3 Gutenda malagalira ga Mtuwa Mlungu, Mlungu gwaku. Gufati njira zakuyi na gukoli lagiru zakuyi na amuli zakuyi na toza zakuyi na matakulu gakuyi, ntambu yayilembitwi mulilagaliru lya Musa su gupati mpatilu mukila shagutenda na koseri kwagugenda, 4 su Mtuwa Mlungu kashigangamaziyi shisoweru shakuyi shakatakuliti kuusu neni pakalonga, payiwera wiwuka waneni hawajimiri amuli zyakuwi na kumtendara kwa kwaminika woseri kwa moyu goseri, shaka shoseri hapeni gukosi muntu yakawera mfalumi pahala pa tati gwakuyi.

5 Nentu ya aga, guvimana viraa galii gakantendiriti Yoabu mwana gwa Seluya, ntambu yakawatendiriti wakulu wa mashonta wawili wa shonta lya Israeli, Abineri mwana gwa Neri na Amasa mwana gwa Yateri. Kawalagiti, kita mwazi shaka sha ponga handa shaka sha nkondu, na mwazi gwakuyi kagupakaziya mulufunga kuzyengeta shunu na vilwatu vyakuyi. 6 Su gwenga gutendi shiyasi sha luhala lwaku, ila hera nagumleka kahowi kwa ponga.

7 Kumbiti guwatenderi maheri wana gwa Bazilayi, kulawa Mgileyadi na guwatuli weri waweri pakati pa walii yawaliya pameza paku, toziya wantendiriti maheri shaka panimtiriti na kumtuga mlongu gwaku Abisalomu." 8 "Viraa, kapalaapa Shimeyi mwana gwa Gera, likabila lya Benjamini kulawa mji gwa Bahurimu, Mweni kanapiliriti na kumpangira nentu pang'enditi Mahanaimu, kumbiti pakiziti kunanka kulushemba lwa Yoridani, nimlapiriti kwa litawu lya Mtuwa Mlungu panimgambira, hapeni nikulagi kwa ligumba. 9 Kumbiti gwenga nagumleka hera hangu. Gwenga gwana ligoya, haguvimani shagufira kumtendera, tembera yomberi kana neziwu."

10 Dawudi kahowiti, kafindilwa kumji gwa gwakuwi, yagushemwa mji gwa Dawudi. 11 Kaweriti kakolamlima Israeli kwa shaka sha vinja alubayini, vinja saba pakawera Hebroni, na vinja selasini na tatu pakawera Yerusalemu. 12 Su, Selemani kawera mfalumi pahala pa Dawudi tati gwakuwi na ufalumi wakuyi uweriti ugangamala.

13 Shakapanu Adoniya, mwana gwa Higiti, kamgendiriti Batisheba, mawu gwakuwi Selemani. Basheba kamkosiya, "Hashi gwakwiza kwa ponga?" Adoniya kamwankula, "Yina, niza kwa ponga. 14 Ila nana shisoweru shimu sha kukugambira." Betisheba kamgambira, "Gulongi hera."

15 Adoniya kamgambira, "Guvimana handa neni meweri mfalumi na ata Israeli yoseri iweriti yankunolelera nweri mfalumi. Kumbiti mirandu ing'alambuka na mlongu gwangu kang'alambula toziya aga ndo yagaweriti mafiru gakuyi Mtuwa Mlungu. 16 Na vinu nanayi luwa yimu hera yeni nikuluwa nagumbelera." Betisheba kamgambira, "Gulongi hera."

17 Na yomberi kalonga, "Shonde, nikuluwa gumluwi mfalumi Selemani kanjimili nimtoli Abishagi, ulii muntu gwa Shunami, kaweri mdala gwangu, toziya nivimana hapeni kakubeleri."

18 Betisheba kamgambira, "Sawa, hanyoweri na mfalumi kwajili ya gwenga"

19 Su, Betisheba kamgendera mfalumi Selemani kumgambira luwa ya Adoniya. Mfalumi kagoloka kagenda kumwanka mawu gwakuyi, kamng'ong'onalira. Shakapanu kalivaga mshiti shakuyi sha ukulu, kalagalira mawu gwakuyi kajegerwi shiti, na yomberi kalivaga uwega wa kumliwu wa mfalumi. 20 Batisheba kalonga, "Nina luwa ndidini shonde gunjimiri na nikuluwa nagumbelera." Mfalumi kamgambira, "gulongi luwa yaku mawu gwangu, toziya hapeni nikubeleri,"

21 Na yomberi kalonga, "Gumjimiri mlongu gwaku Adoniya kamyugi Abishagi, gwa kulawa Shunami."

22 Mfalumi Selemani kamgambira mawu gwakuyi, "Na vii gumfira Adonia Abishagi muntu kulawa Shunani? Gumfiliri na ufalumi viraa toziya yomberi ndo mlongu gwangu mkulu viraa, mtambika Abiatari na mkulu gwa mashonta Yoabu mwana gwa Seluya wa uwega wakuyi!" 23 Panu mfalumi Selemani kalilapa kwa litawu lya Mtuwa Mlungu, pakalonga, "Mlungu na kanagiri kutali payiwera Adoniya hapeni kahowi toziya ya kulaviya luwa ayi! 24 Vinu, kwa litawu lya Mtuwa Mlungu yakawera mkomu, yakantuliti na kugangamaziya ufalumi wa tati gwangu Dawudi, na yakatenditi shakalongiti, kampanana ukulu neni na wiwuka wangu, Nililapa handa leru ayi Adoniya hakahowi!" 25 Hangu mfalumi Selemani kamlagalira Benaya, mwana gwa Yehoyada, na kamgendera Adoniya na kumlaga.

26 Mfalumi Selemani kamgambira mtambika Abiyatali, "Guwuki gugendi kulilambu lyaku aku Anatoti, Gufiruwa kulaguwa gwenga! Kumbiti vinu, hapeni nikulagi toziya gulitoliti Lisanduku lya Lipatanu lya Mtuwa Mlungu paguweriti na tati gwangu Dawudi, gutabisiyitwi pamuhera na yomberi." 27 Hangu mfalumi Selemani kamwinga Abiyatali, nakawera mtambika gwa Mtuwa Mlungu aku Shilu, ayi iwera nakaka kwa mtambika Eli na lukolu lwakuyi.

28 Yoabu pakapatiti shisoweru, katugiriti kuligeleri lya lilingu Linanagala lya Mlungu na kugakolera magoli ga shitalawanda, toziya kaweriti kamjimilira Adoniya kumbiti Abisalomu ndiri. 29 Mfalumi Selemani pakapikaniriti handa Yoabu katugiliti muliringu lya Mlungu na handa kagoloka pashitalawanda, kamtumiti Benaya mwana gwa Yehoyada, pakalonga, "Gugendi gwakamlagi." 30 Su, Benaya kagenda kuligeleri lya liringu lya Mlungu, kamgambira Yoabu, "Mfalumi kang'ambira gulawi kunja." Yoabu kankula,

"Neni hapenindawi, hamfuwiri palapanu."

Benaya kawuya kwa mfalumi na kumgambira ntambu yakamwankuliti Yoabu. 31 Selemani kalonga, "Gutendi ntambu yakalongiti, gumlagi na kumfindira. Hangu neni na wiwuka wamonga woseri wa Dawudi hapeni tutakulwi madoda kwa vitendu vya Yoabu kwa kuwalaga wantu yawahera vidoda. 32 Mlungu kamwazibu Yoabu kwa kulaga aku kwakatenditi pota tati gwangu Dawudi kuvimana visoweru avi. Yomberi kawalagiti wantu wawili weni waweriti wa mana nentu kuliku yomberi, viraa wamziditi kwa maheri, kawalagiti Abineri mwana gwa Neri, mkulu gwa shonta lya Israeli na Amasa mwana gwa Yeteri, mkulu gwa lishonta lya Yuda. 33 Azabu ya kulaga aku hayiweri pampindi pa Yoabu na wiwuka wakuyi mashaka goseri. Ila Mtuwa Mlungu hakawapanani ponga wiwuka wa Dawudi mashaka goseri yawafira kukalira shiti shakuyi sha ukulu."

34 Su, Benaya mwana gwa Yehoyada, kagenda mlilingu linanagala, kamlaga Yoabu mweni wamfindiriti mkaya kwawu, kushiwala. 35 Mfalumi kamtula Benaya mwana gwa Yehoyada, kaweri mkulu gwa shonta pahala pa Yoabu, na Sadoki kawera mtambika pahala pa Abiyatali.

36 Shakapanu mfalumi kalagalira Shimeyi kashemwi, kamgambira, "Gulinyawiri numba amu Yerusalemu. Gulikali panu pota kugenda pahali pamonga poseri. 37 Toziya lishaka pagulawa na kuloka mbwilu ya Kidironi, nukugambira nakaka haguhowi, na kulilawumu gamweni kwa kuhowa kwaku."

38 Shemeyi kankula, "Yina Mfalumi. Handendi ntambu yagulongiti." Su, kalikaliti Yerusalemu mashaka gavuwa.

39 "Kumbiti muupeleru wa shinja sha tatu, wamanda wawili wa Shimeyi watolikiti, wagenda kwa Akishi mwana gwa Maaki, mfalumi gwa Gati. Shimei kapikaniliti shisoweri ashi pakaweliti aku Gati," 40 Shimeyi kakweniti punda farasi gwakuyi, kagenditi aku kuwasakula, kwa mfalumi Akishi kulawa Gati. Su, kasoka kawapata kawawuziya ukaya. 41 Mfalumi Selemani pakapatiti visoweru handa Shimeyi kaweriti kalawa Yerusalemu na kagenda Gati na kuwuya, 42 kamshemiti Shimeyi na kumgambira, "Hashi, nikutenda ndiri gunapiliti kwa litawu lya Mtuwa Mlungu hapeni gulawi Yerusalemu. Na neni nukuberiziya pagulawa nakaka haguhowi, handa pagujeri kugenda kunja? Na gwenga gunjimira, gung'ambira, yina, nikujimira. 43 Hashi gumega shirapu kwa Mtuwa Mlungu na kulishera ndiri lagiru lyanikupananiti? 44 Mfalumi kendereyiti kumgambira Shimeyi, guvimana weri makontola gagumtenderiti tati gwangu Dawudi, su vinu toziya ya aga Mtuwa Mlungu hakakukomangi. 45 Kumbiti neni hakandekeleri, na shiti sha ukulu sha Dawudi hashigangamiziwi palongolu pa Mtuwa Mlungu mashaka goseri."

46 Panu mfalumi kamgambira Benaya mwana Yehoyada, na yomberi kalawa, kamkoma na kumlaga Shimeyi. Su, ufalumi ugangamala pasi pa Selemani.